મહેસાણામાં મિલેટ મહોત્સવ 2026નું ઉર્જા મંત્રી ઋષિકેશ પટેલના હસ્તે ઉદ્ઘાટન

મિલેટના પોષક મહત્વ પર ભાર, મહેસાણા મહોત્સવમાં ખેડૂતો અને નાગરિકોને સ્વસ્થ આહારનો સંદેશ

મહેસાણા ખાતે ગુજરાત સરકારના કૃષિ વિભાગ અને મહાનગરપાલિકા દ્વારા આયોજિત ‘મિલેટ મહોત્સવ અને પ્રાકૃતિક ફાર્મર માર્કેટ-૨૦૨૬’નું ઉર્જા મંત્રી ઋષિકેશ પટેલના હસ્તે ભવ્ય ઉદઘાટન કરવામાં આવ્યું હતું. આ પ્રસંગે મંત્રીશ્રીએ વિવિધ સ્ટોલની મુલાકાત લઈને ખેડૂતો અને વેચાણકર્તાઓ સાથે આત્મીય સંવાદ સાધ્યો હતો. તેમણે જણાવ્યું હતું કે વડાપ્રધાન નરેન્દ્રભાઈ મોદીના પ્રયાસોથી આજે આપણા પરંપરાગત જાડા ધાન્યો એટલે કે ‘મિલેટ્સ’ને વિશ્વ સ્તરે નવી ઓળખ મળી છે. આ મહોત્સવનો મુખ્ય હેતુ લોકોમાં પૌષ્ટિક આહાર પ્રત્યે જાગૃતિ લાવવાનો અને ખેડૂતોને પ્રોત્સાહન આપવાનો છે.

મિલેટના સ્વાસ્થ્યવર્ધક ફાયદા અને બદલાતી જીવનશૈલી

મિલેટના મહત્વ વિશે વાત કરતા મંત્રીશ્રીએ ઉમેર્યું હતું કે બાજરી, જુવાર અને રાગી જેવા ધાન્યોમાં પ્રોટીન, ફાઈબર અને મિનરલ્સ ભરપૂર માત્રામાં હોય છે, જે શરીરના સંતુલિત વિકાસ માટે અત્યંત જરૂરી છે. આજના સમયની બદલાતી જીવનશૈલીમાં થતા વિવિધ રોગો સામે રક્ષણ મેળવવા માટે મિલેટનો આહારમાં ઉપયોગ વધારવો જોઈએ. સરકારના પ્રયાસોની સાથે જો જનતા પણ સહિયારો પુરુષાર્થ કરે, તો મિલેટના ઉપયોગથી સ્વસ્થ સમાજનું નિર્માણ થઈ શકે છે. કાર્યક્રમ દરમિયાન મહાનુભાવોએ નાગરિકોને જંક ફૂડ છોડીને પૌષ્ટિક ‘શ્રી અન્ન’ અપનાવવા અનુરોધ કર્યો હતો.

પ્રાકૃતિક ખેતીનો વ્યાપ અને ખેડૂતો માટે બજેટરી જોગવાઈ

રાજ્યપાલશ્રી દ્વારા શરૂ કરવામાં આવેલી પ્રાકૃતિક ખેતીની મુહિમને વેગ આપતા મંત્રીશ્રીએ મહેસાણાના ખેડૂતોને રાસાયણિક મુક્ત ખેતી અપનાવવા હાકલ કરી હતી. લોકસભા સાંસદ હરિભાઈ પટેલે માહિતી આપી હતી કે કેન્દ્ર સરકારે વર્ષ ૨૦૨૬-૨૭ના બજેટમાં મિલેટની ખેતીને પ્રોત્સાહન આપવા માટે ૪૦૦ કરોડ રૂપિયાની વિશેષ જોગવાઈ કરી છે. આ ઉપરાંત, રાજ્યસભા સાંસદ મયંકભાઈ નાયકે પ્રાકૃતિક ઉત્પાદનોના વેચાણ માટે શહેરોમાં ‘અર્બન હાર્ટ’ જેવી વ્યવસ્થા ઉભી કરવા સૂચન કર્યું હતું, જેથી ખેડૂતોને તેમના ઉત્પાદનોના સીધા અને પોષણક્ષમ ભાવ મળી રહે.

રાજ્યપાલ શ્રી આચાર્ય દેવવ્રતજીનું પ્રાકૃતિક ખેતી અંગે રાજ્યવ્યાપી પ્રેરક સંબોધન

મિલેટ મહોત્સવ 2026 અંતર્ગત પોરબંદર ચોપાટી ખાતે બે દિવસીય ભવ્ય આયોજન

જન કલ્યાણકારી યોજનાઓના લાભોનું વિતરણ અને મહાનુભાવોની હાજરી

આ કાર્યક્રમમાં ધારાસભ્ય મુકેશભાઈ પટેલ સહિત અનેક જનપ્રતિનિધિઓએ હાજર રહીને સરકારની ખેડૂતલક્ષી યોજનાઓ વિશે માર્ગદર્શન આપ્યું હતું. મંત્રીશ્રી અને મહાનુભાવોના હસ્તે વિવિધ યોજનાઓના લાભાર્થીઓને સહાયના હુકમોનું વિતરણ કરવામાં આવ્યું હતું. જિલ્લા કલેક્ટર એસ.કે. પ્રજાપતિ અને જિલ્લા વિકાસ અધિકારી ડૉ. હસરત જૈસમીન સહિત વહીવટી તંત્રના અધિકારીઓએ વ્યવસ્થાઓનું નિરીક્ષણ કર્યું હતું. મોટી સંખ્યામાં ઉપસ્થિત ખેડૂતોએ પ્રાકૃતિક કૃષિ પદ્ધતિ અને મિલેટના મૂલ્યવર્ધન વિશે જાણકારી મેળવી હતી, જે આગામી સમયમાં જિલ્લાની કૃષિ અર્થવ્યવસ્થાને નવી દિશા આપશે.