રાજસ્થાન હાઇકોર્ટના એક્ટિંગ CJ સામે આરોપો પર CJI સૂર્ય કાંતનું નિવેદન: જાણો શું આપી સ્પષ્ટતા
રાજસ્થાન હાઇકોર્ટના કાર્યકારી મુખ્ય ન્યાયાધીશ (Acting Chief Justice) સંજીવ પ્રકાશ શર્મા સામે સુપ્રીમ કોર્ટના ન્યાયાધીશ જસ્ટિસ સંદીપ મહેતા દ્વારા કરાયેલા ગંભીર આરોપોના વિવાદ વચ્ચે ભારતના મુખ્ય ન્યાયાધીશ (CJI) સૂર્ય કાંતનું મહત્વપૂર્ણ નિવેદન સામે આવ્યું છે. CJI કાંતે બુધવારે સ્પષ્ટતા કરી હતી કે તેઓ અને સુપ્રીમ કોર્ટ કોલેજિયમના અન્ય વરિષ્ઠ ન્યાયાધીશોએ આ ચિંતાઓની ગંભીર નોંધ લીધી છે. જોકે, તેમણે ભારપૂર્વક જણાવ્યું હતું કે માત્ર આરોપો લગાવવાથી તેને સાબિત કે આખરી તારણ (Findings) ગણી શકાય નહીં અને ઉચ્ચ ન્યાયતંત્ર સામેની ફરિયાદોનો સામનો પ્રસ્થાપિત સંસ્થાકીય પ્રક્રિયા અને યોગ્ય તક આપીને જ કરી શકાય.
આ વિવાદ સુપ્રીમ કોર્ટના જસ્ટિસ સંદીપ મહેતા દ્વારા CJI ને લખવામાં આવેલા ત્રણ પત્રો બાદ સપાટી પર આવ્યો હતો, જેમાં તેમણે રાજસ્થાન હાઇકોર્ટના કાર્યકારી મુખ્ય ન્યાયાધીશ સંજીવ પ્રકાશ શર્મા પર ગેરવહીવટ અને અન્ય ગંભીર અનિયમિતતાઓના આરોપ લગાવ્યા હતા. જસ્ટિસ મહેતાએ “સંસ્થાને વધુ નુકસાનથી બચાવવા” માટે રાજસ્થાન હાઇકોર્ટમાં તાત્કાલિક અન્ય રાજ્યમાંથી પૂર્ણકાલિક મુખ્ય ન્યાયાધીશની નિમણૂક કરવાની માંગ કરી હતી.
CJI ની સ્પષ્ટતા: જસ્ટિસ શર્માને પક્ષ મૂકવાની યોગ્ય તક આપવામાં આવશે
પ્રેસ નિવેદનમાં CJI સૂર્ય કાંતે જણાવ્યું હતું કે જસ્ટિસ મહેતા દ્વારા મોકલવામાં આવેલા પત્રોની સામગ્રી અત્યારે જાહેરમાં જાહેર કરી શકાય નહીં. ન્યાયના સિદ્ધાંત મુજબ કોઈપણ નિષ્કર્ષ પર પહોંચતા પહેલા જસ્ટિસ સંજીવ પ્રકાશ શર્માને પોતાના પર લાગેલા આરોપોનો જવાબ આપવા માટે પૂરતી તક મળવી અનિવાર્ય છે.
CJI એ ભારપૂર્વક કહ્યું કે, “કોઈપણ ન્યાયાધીશ સામે માત્ર આરોપો મૂકવામાં આવ્યા છે તે વાતને તેમના વિરુદ્ધ પુરાવા કે તારણ તરીકે ન સ્વીકારી શકાય.” તેમણે ઉમેર્યું કે આ સમગ્ર બાબતની તપાસ સંસ્થાકીય સ્તરે યોગ્ય રીતે થઈ રહી છે, જેમાં જસ્ટિસ મહેતા દ્વારા રજૂ કરવામાં આવેલી સામગ્રી અને જસ્ટિસ શર્માના પ્રતિભાવ બંનેને ધ્યાનમાં લેવામાં આવશે. જસ્ટિસ શર્માને હોદ્દા પર ચાલુ રાખવા, ટ્રાન્સફર કરવા કે અન્ય કોઈ વહીવટી પગલાં લેવા અંગેનો આખરી નિર્ણય તમામ પાસાઓની વિચારણા કર્યા બાદ જ લેવાશે. વધુમાં, કોલેજિયમ હાલ દેશની તમામ હાઇકોર્ટોમાં મુખ્ય ન્યાયાધીશોની ખાલી પડેલી જગ્યાઓ પર નિમણૂક કરવાની પ્રક્રિયા પર સક્રિયતાથી કામ કરી રહ્યું છે.
જસ્ટિસ સંદીપ મહેતાના પત્રોમાં શું આરોપો લગાવવામાં આવ્યા?
સુપ્રીમ કોર્ટના ન્યાયાધીશ જસ્ટિસ સંદીપ મહેતા, જેઓ પોતે રાજસ્થાન હાઇકોર્ટમાંથી આવે છે, તેમણે ૨, ૧૦ અને ૧૭ ઓગસ્ટના રોજ CJI ને પત્રો લખ્યા હતા. આ પત્રોમાં તેમણે જસ્ટિસ સંજીવ પ્રકાશ શર્મા પર નીચે મુજબના ગંભીર આરોપો લગાવ્યા છે:
રોસ્ટર પાવરનો દુરુપયોગ: જસ્ટિસ મહેતાનો આરોપ છે કે કાર્યકારી CJ પસંદગીપૂર્વક અન્ય બેન્ચોમાંથી કેસો પાછા ખેંચીને પોતાની કોર્ટમાં ટ્રાન્સફર કરી રહ્યા છે.
ભ્રષ્ટાચાર અને પક્ષપાત: પત્રોમાં ભાઈ-ભત્રીજાવાદ, પક્ષપાત અને પ્રભાવશાળી અરજદારો તેમજ વકીલોને અનુકૂળ રહે તેવા વહીવટી નિર્ણયો લેવાનો આરોપ મુકાયો છે.
ન્યાયિક નિષ્પક્ષતા પર સવાલ: જસ્ટિસ મહેતાએ નોંધ્યું કે તેમને જસ્ટિસ શર્માની ન્યાયિક કામગીરી અંગે એવી ઘણી ફરિયાદો મળી છે જે પ્રથમ દર્શનીય (Prima facie) તેમની પ્રામાણિકતા પર શંકા ઊભી કરે છે.
