રસ્તો જામ કરી આતશબાજી, ઉદ્યોગપતિના બેફામ વર્તનથી રોષ
સુરત શહેરમાંથી ઉદ્યોગપતિની દાદાગીરીનો વધુ એક ચોંકાવનારો કિસ્સો સામે આવ્યો છે. ડુમસ ગામના ઉદ્યોગપતિ દીપક ઈજારદારે પોતાના દીકરાના જન્મદિવસની ઉજવણી જાહેર રોડ પર કરી હોવાનો બનાવ સામે આવ્યો છે. જન્મદિવસની ઉજવણી માટે રસ્તો જામ કરી દેતા સામાન્ય વાહનચાલકો અને રાહદારીઓને ભારે મુશ્કેલીનો સામનો કરવો પડ્યો હતો. જાહેર માર્ગ પર આવા તાયફા થતા હોવા છતાં કોઈ ભય કે સંકોચ વિના ઉદ્યોગપતિએ ખુલ્લેઆમ દાદાગીરી બતાવતાં સમગ્ર વિસ્તારમાં રોષ ફેલાયો છે.
રસ્તા પર ફટાકડા અને આતશબાજીથી અફરાતફરી
ડુમસ ગામમાં રહેતા ઉદ્યોગપતિ દીપક ઈજારદારે પોતાના દીકરાના જન્મદિવસની ઉજવણી માટે રસ્તાને જ મંચ બનાવી દીધો હતો. હાથમાં ફટાકડા લઈને રસ્તા પર આતશબાજી કરવામાં આવી હતી, જેના કારણે ટ્રાફિક સંપૂર્ણ રીતે ઠપ્પ થઈ ગયો હતો. વાહનચાલકો લાંબા સમય સુધી અટવાઈ ગયા હતા અને રસ્તા પરથી પસાર થનારા લોકોમાં ભય અને અસંતોષ જોવા મળ્યો હતો. જાહેર રોડ પર આવી રીતે આતશબાજી કરવી કાયદાનો ખુલ્લેઆમ ભંગ હોવા છતાં કોઈ રોકટોક ન થવાને લઈને અનેક સવાલો ઊભા થયા છે.
હોર્ન મારતાં રાહદારીઓ પર ઉદ્યોગપતિનો ગુસ્સો
રસ્તો ખુલ્લો કરાવવા માટે લોકોએ હોર્ન વગાડ્યા ત્યારે ઉદ્યોગપતિ દીપક ઈજારદારે રાહદારીઓ પર ગુસ્સો ઠાલવ્યો હોવાનો આક્ષેપ છે. તેણે લોકો સાથે ઉગ્ર વર્તન કર્યું હતું અને ગાડી પર આતશબાજી ફોડવાની ચીમકી પણ આપી હતી. આ સમગ્ર ઘટનાના વીડિયો સોશિયલ મીડિયામાં વાયરલ થતાં લોકોમાં ભારે આક્રોશ જોવા મળ્યો છે. સામાન્ય નાગરિકો માટે નિયમો કડક હોવા છતાં પ્રભાવશાળી લોકો નિયમો તોડે ત્યારે કાર્યવાહી કેમ નથી થતી તે અંગે ચર્ચા તેજ બની છે.
દાદાગીરીના વીડિયો વાયરલ, પોલીસ કાર્યવાહી પર સવાલ
દીપક ઈજારદારની દાદાગીરી દર્શાવતા અનેક વીડિયો સામે આવ્યા છે, જેમાં જાહેરમાં બેફામ વર્તન સ્પષ્ટ જોવા મળે છે. દીકરાના જન્મદિવસના બહાને ઉદ્યોગપતિએ જાહેર રસ્તા પર જે રીતે તાયફા કર્યા તે કાયદો અને વ્યવસ્થાની સ્થિતિ પર પ્રશ્નચિહ્ન ઊભું કરે છે. સામાન્ય નાગરિકો નિયમો તોડે ત્યારે પોલીસ તાત્કાલિક કાર્યવાહી કરી પાઠ ભણાવે છે, પરંતુ આવા પ્રભાવશાળી ઉદ્યોગપતિ સામે પોલીસ શું પગલાં લે છે તે જોવું મહત્વપૂર્ણ બની ગયું છે.
અગાઉ પણ વિવાદોમાં રહી ચૂક્યો છે દીપક ઈજારદાર
ઉલ્લેખનીય છે કે દીપક ઈજારદાર અગાઉ પણ અનેક વિવાદોમાં સંડોવાઈ ચૂક્યો છે. ડુમસ ગામના સુલતાનાબાદ વિસ્તારમાં બાપુજીની વાડી નામના બંગલોમાં રહેતા પટેલ પરિવારને તેણે પોતાના બે થી ત્રણ બોડીગાર્ડ સાથે મળીને ધમકાવ્યો હતો. આ ઘટનામાં તે પરિવારના ઘરના આંગણે ઘૂસી ગયો હતો અને પરણીત મહિલા તથા તેના બે પુત્રોને ગોળી મારી નાખવાની ધમકી આપી હતી. આખરે ભોગ બનનાર મહિલાએ ડુમસ પોલીસ મથકમાં ફરિયાદ નોંધાવતા પોલીસ દ્વારા દીપક ઈજારદાર અને તેના બોડીગાર્ડ સામે ગુનો દાખલ કરવામાં આવ્યો હતો.
‘તારા બાપનો રોડ છે’ કહી દાદાગીરીનો આરોપ
ફરિયાદ અનુસાર, દીપક ઈજારદારે ‘તારા બાપનો રોડ છે’ જેવી ભાષા ઉપયોગ કરીને ગાળો ભાંડી હતી અને બોડીગાર્ડ સાથે મળીને મહિલાના ઘરમાં ઘુસી ગયો હતો. આ ઘટના બાદ પણ દીપક ઈજારદાર સામે કડક કાર્યવાહી ન થવાને લઈને લોકોમાં નારાજગી છે. હવે જાહેર રોડ પર જન્મદિવસની ઉજવણીનો આ નવો વિવાદ સામે આવતાં ફરી એકવાર પોલીસની ભૂમિકા અને કાયદાની અમલવારી પર સવાલ ઊભા થયા છે.
