T20 World Cup 2026: ICC મેન્સ T20 વર્લ્ડ કપ 2026ની યજમાની ભારત અને શ્રીલંકા સંયુક્ત રીતે કરી રહ્યા છે. ભારતે પોતાની પ્રથમ
T20 World Cup 2026 મેચમાં અમેરિકાને 29 રને હરાવીને શાનદાર શરૂઆત કરી છે. હવે ભારતની આગામી મેચ નામિબિયા સામે છે, પરંતુ ક્રિકેટ જગતની નજર તો માત્ર ભારત-પાકિસ્તાનની ટક્કર પર જ ટકેલી છે. આ મોટી મેચ પહેલા કેપ્ટન સૂર્યકુમાર યાદવે મીડિયા સાથે વાત કરતા ટીમની વ્યૂહરચના અને માનસિકતા વિશે ખુલીને વાત કરી હતી.
“વ્યક્તિગત રેકોર્ડ બીજા સ્થાને, ટીમ પહેલા”
સૂર્યકુમાર યાદવે ખૂબ જ પરિપક્વ નિવેદન આપતા જણાવ્યું હતું કે, ટીમમાં હવે એવો માહોલ છે કે કોઈ ખેલાડી પોતાના વ્યક્તિગત સ્કોર કે રેકોર્ડ વિશે વિચારતો નથી. તેમણે કહ્યું, “છેલ્લા દોઢ વર્ષમાં અમારું જે પ્રદર્શન રહ્યું છે, તેની પાછળનું મુખ્ય કારણ એકતા છે. જો કોઈ ખેલાડી 20 રન બનાવે છે અને તે ટીમના હિતમાં છે, તો અમારા માટે તે સદી બરાબર છે. જો અમે બિનજરૂરી દબાણ લઈએ અથવા વધુ પડતું વિચારવા માંડીએ, તો જ કોઈ ટીમ અમને રોકી શકે છે.”
સૂર્યાના મતે, ભારતીય ટીમની અસલી તાકાત તેની ‘નિર્ભયતા’ (Fearlessness) છે. જો ખેલાડીઓ મેદાન પર જઈને મુક્તપણે રમે, તો દુનિયાની કોઈ તાકાત તેમને ચેમ્પિયન બનતા રોકી શકશે નહીં.
ખુલ્લું વાતાવરણ: ડ્રેસિંગ રૂમનું રહસ્ય
કેપ્ટન તરીકે સૂર્યાએ ટીમમાં એવો માહોલ બનાવ્યો છે જ્યાં જુનિયર ખેલાડી પણ સિનિયરને પોતાનો વિચાર કહી શકે છે. તેમણે કહ્યું, “ટીમમાં પ્રામાણિકતા અને સંવાદ (Communication) ખૂબ જરૂરી છે. જ્યારે દરેક ખેલાડીને લાગે છે કે તેને સાંભળવામાં આવે છે, ત્યારે તેનો આત્મવિશ્વાસ બમણો થઈ જાય છે. અમે ડ્રેસિંગ રૂમમાં એવું વાતાવરણ રાખ્યું છે કે દરેક ખેલાડી પોતાની કુદરતી રમત રમી શકે.”
પાકિસ્તાન સામેની મેચ માટેની તૈયારી
ભારત-પાકિસ્તાન મેચ હંમેશા દબાણ વાળી હોય છે, પરંતુ સૂર્યા તેને માત્ર એક રમત તરીકે જોવાની સલાહ આપે છે. નામિબિયા સામેની મેચ ભારતીય ટીમ માટે આત્મવિશ્વાસ વધારવાની તક છે, જેથી પાકિસ્તાન સામેની મોટી મેચમાં ટીમ પૂરી તાકાત સાથે ઉતરી શકે. સૂર્યાએ સ્પષ્ટ કર્યું કે ટીમ ઈન્ડિયા માત્ર ટાઇટલ બચાવવા માટે જ નહીં, પણ ટી-20 ક્રિકેટમાં પોતાનું પ્રભુત્વ સાબિત કરવા માટે રમી રહી છે.
આંકડા શું કહે છે?
છેલ્લા બે વર્ષમાં ભારતનો T20 રેકોર્ડ શાનદાર રહ્યો છે. યુવા ખેલાડીઓએ બતાવ્યું છે કે તેઓ ગમે તેવા કપરા સંજોગોમાં મેચ જીતાડી શકે છે. સૂર્યકુમાર પોતે ICC T20 રેન્કિંગમાં મોખરે છે, પરંતુ કેપ્ટન તરીકે તેનો ટાર્ગેટ માત્ર એ સિલ્વર ટ્રોફી છે, જે હાલમાં ભારત પાસે છે અને તે ભારત પાસે જ રહે તેવા તેના પ્રયત્નો છે.
સૂર્યકુમાર યાદવના આક્રમક છતાં શાંત વલણથી લાગે છે કે ભારત ફરી એકવાર વિશ્વ વિજેતા બનવા માટે સજ્જ છે. પાકિસ્તાન સામેની મેચમાં હિટમેન રોહિત શર્મા (જે હવે માત્ર ODI રમે છે) ની ખોટ ચોક્કસ પડશે, પણ સૂર્યાની આગેવાનીમાં નવી બ્રિગેડ ઈતિહાસ રચવા તૈયાર છે.
