IPL 2026: તિલક વર્માનો વટ, એકલો ખેલાડી આખી ગુજરાત ટાઇટન્સ પર પડ્યો ભારે!
ક્રિકેટ સામાન્ય રીતે 11 ખેલાડીઓની રમત ગણાય છે, જ્યાં આખી ટીમ સાથે મળીને જીત મેળવે છે. પરંતુ સોમવારે રાત્રે અમદાવાદના નરેન્દ્ર મોદી સ્ટેડિયમમાં કંઈક એવું બન્યું જેણે ક્રિકેટના ઈતિહાસમાં એક નવો અધ્યાય લખી દીધો. મુંબઈ ઇન્ડિયન્સના યુવા બેટ્સમેન તિલક વર્માએ એકલા હાથે એવી રમત રમી કે ગુજરાત ટાઇટન્સની આખી ટીમ તેના વ્યક્તિગત સ્કોરને પણ વટાવી શકી નહીં. આ આઈપીએલના ઈતિહાસમાં માત્ર 9મી વખત અને મુંબઈ ઇન્ડિયન્સ માટે પહેલીવાર બનેલી અકલ્પનીય ઘટના છે.
નંબર 5 પર આવીને તિલકે મચાવ્યું તોફાન
સામાન્ય રીતે ટી-20 ક્રિકેટમાં સદી ફટકારવાની તક ઓપનિંગ અથવા ટોપ-3 બેટ્સમેનો પાસે વધુ હોય છે, કારણ કે તેમની પાસે રમવા માટે વધુ બોલ હોય છે. પરંતુ તિલક વર્માએ આ માન્યતાને ખોટી પાડી દીધી. જ્યારે મુંબઈની ટીમ મુશ્કેલીમાં હતી ત્યારે તિલક નંબર 5 પર બેટિંગ કરવા આવ્યો હતો.
તેણે માત્ર 45 બોલમાં અણનમ 101 રન બનાવીને મેદાન ગજવી મૂક્યું. તેની આ તોફાની ઈનિંગમાં 8 ચોગ્ગા અને 7 ગગનચુંબી છગ્ગાનો સમાવેશ થાય છે. 224.44 ના સ્ટ્રાઈક રેટથી રમીને તેણે ગુજરાતના બોલરોને રીતસરના લાચાર કરી દીધા હતા. નવાઈની વાત એ છે કે મુંબઈનો બીજો કોઈ પણ બેટ્સમેન અર્ધસદી પણ ફટકારી શક્યો નહોતો (બીજો સર્વોચ્ચ સ્કોર નમન ધીરનો 45 રન હતો), છતાં તિલકના જોરે મુંબઈ 199 સુધી પહોંચ્યું.
ગુજરાત ટાઇટન્સનો ધબડકો: તિલક સામે પણ હારી ગઈ ટીમ
જ્યારે ગુજરાત ટાઇટન્સ 200 રનના લક્ષ્યાંકનો પીછો કરવા ઉતરી, ત્યારે કોઈએ કલ્પના નહોતી કરી કે તેમની હાલત આવી થશે. ગુજરાતની આખી ટીમ માત્ર 100 રનમાં ઓલઆઉટ થઈ ગઈ. આનો અર્થ એ થયો કે ગુજરાતની ટીમ તિલક વર્માના વ્યક્તિગત સ્કોર (101 રન) થી પણ 1 રન પાછળ રહી ગઈ!
વોશિંગ્ટન સુંદરે સૌથી વધુ 26 રન બનાવ્યા, પરંતુ બાકીના બેટ્સમેનો ‘આયા રામ, ગયા રામ’ જેવી સ્થિતિમાં હતા. ગુજરાતની ટીમ પૂરી 20 ઓવર પણ ટકી શકી નહીં અને 15.5 ઓવરમાં જ શરણાગતિ સ્વીકારી લીધી. 99 રનની આ હારથી ગુજરાતનો નેટ રન રેટ એટલો ખરાબ થયો છે કે પ્લેઓફની રેસમાં તેમને મોટું નુકસાન વેઠવું પડી શકે છે.
6 વર્ષ બાદ સર્જાયો આ દુર્લભ સંયોગ
આઈપીએલના ઈતિહાસમાં આવું બહુ ઓછી વાર બને છે જ્યારે વિરોધી ટીમ કોઈ એક ખેલાડીના રન કરતા પણ ઓછા રનમાં આઉટ થઈ જાય. તિલક વર્મા આ પરાક્રમ કરનાર આઈપીએલના ઈતિહાસનો 9મો ખેલાડી બન્યો છે. મુંબઈ ઇન્ડિયન્સ માટે આજ સુધી સચિન તેંડુલકર, રોહિત શર્મા કે સૂર્યકુમાર યાદવ જેવા દિગ્ગજો પણ આ સિદ્ધિ મેળવી શક્યા નહોતા.
છેલ્લે આવો કરિશ્મો 6 વર્ષ પહેલા એટલે કે 2020માં જોવા મળ્યો હતો. તે સમયે કિંગ્સ ઇલેવન પંજાબ (હવે પંજાબ કિંગ્સ) તરફથી રમતા કેએલ રાહુલે રોયલ ચેલેન્જર્સ બેંગલુરુ સામે અણનમ 132 રન બનાવ્યા હતા અને આરસીબીની આખી ટીમ માત્ર 109 રનમાં પેવેલિયન ભેગી થઈ ગઈ હતી. હવે 2026માં તિલક વર્માએ એ જ ઈતિહાસનું પુનરાવર્તન કર્યું છે.
