ટ્રમ્પની ઓવલ ઓફિસમાં પ્રાર્થના: ઈરાન સાથેના જંગ વચ્ચે પાદરીઓએ માથે હાથ કેમ મૂક્યો? શું આ કોઈ જાદુ-ટોણો હતો?
ઈરાન અને અમેરિકા વચ્ચે ચાલી રહેલા ભીષણ યુદ્ધની વચ્ચે સોશિયલ મીડિયા પર એક તસવીર વાયરલ થઈ રહી છે. આ તસવીરમાં અમેરિકી રાષ્ટ્રપતિ ડોનાલ્ડ ટ્રમ્પ તેમની ઓવલ ઓફિસની ડેસ્ક પર બેઠા છે અને તેમની આસપાસ ઉભેલા પાદરીઓ તેમના પર હાથ રાખીને પ્રાર્થના કરી રહ્યા છે. આ દ્રશ્યને જોઈને સોશિયલ મીડિયા પર ચર્ચા શરૂ થઈ છે કે શું આ કોઈ જાદુ-ટોણો છે? જોકે, વાસ્તવિકતા એ છે કે આ કોઈ અંધવિશ્વાસ નથી પરંતુ ખ્રિસ્તી ધર્મની ‘ઇવેન્જેલિકલ’ (Evangelical) પરંપરાનો એક ભાગ છે.
શું છે આ ખાસ પ્રાર્થના અને પરંપરા?
‘ઇવેન્જેલિકલ’ તે પ્રોટેસ્ટન્ટ ખ્રિસ્તીઓને કહેવામાં આવે છે જેઓ બાઈબલની સર્વોપરિતા અને ઈસુ ખ્રિસ્તના ઉપદેશોના પ્રચારમાં દ્રઢ વિશ્વાસ રાખે છે. ટ્રમ્પ પર હાથ રાખીને કરવામાં આવેલી આ પ્રાર્થના એ આશીર્વાદ અને શક્તિ પ્રદાન કરવાની એક પરંપરાગત રીત છે. બાઈબલના ‘એક્ટ્સ’ અને ‘હિબ્રૂ’ પુસ્તકોમાં પણ આ રીતે હાથ રાખીને આશીર્વાદ આપવાનો ઉલ્લેખ મળે છે. પાદરીઓનું માનવું છે કે આ રીતે પ્રાર્થના કરવાથી રાષ્ટ્રપતિને ઈશ્વરીય માર્ગદર્શન અને રક્ષણ મળે છે.
રાષ્ટ્રપતિ માટે શું માંગવામાં આવી દુઆ?
વ્હાઇટ હાઉસમાં દેશભરના પાદરીઓના એક જૂથે ટ્રમ્પ સાથે મુલાકાત કરી હતી. ‘ક્રાઈસ્ટ ફેલોશિપ’ના સ્થાપક પાસ્ટર ટોમ મુલિન્સે આ પ્રાર્થનાનું નેતૃત્વ કર્યું હતું. તેમણે પ્રાર્થના કરતા કહ્યું, “હે ઈશ્વર, હું પ્રાર્થના કરું છું કે તમે રાષ્ટ્રપતિ પર તમારા આશીર્વાદ અને સુરક્ષા જાળવી રાખો. સાથે જ અમારા સૈનિકો અને સશસ્ત્ર દળોમાં સેવા આપતા તમામ પુરુષો અને સ્ત્રીઓ પર તમારી કૃપા રહે. અમારા રાષ્ટ્રપતિને તે શક્તિ આપો જેની તેમને દેશનું નેતૃત્વ કરવા માટે જરૂર છે.”
યુદ્ધના મેદાનમાં ગરમાવો
આ પ્રાર્થના એવા સમયે થઈ રહી છે જ્યારે અમેરિકા અને ઈરાન વચ્ચે સીધો લશ્કરી સંઘર્ષ ચાલી રહ્યો છે. અમેરિકાના રક્ષા સચિવ પીટ હેગસેથે ચેતવણી આપી છે કે ઈરાન પર બોમ્બમારો હજુ તેજ કરવામાં આવશે. અમેરિકાના B-2 બોમ્બર્સ ઈરાનના બેલિસ્ટિક મિસાઈલ લોન્ચર ઠેકાણાઓ પર હુમલા કરી રહ્યા છે. આ જંગમાં બંને પક્ષે મોટું નુકસાન થયું છે. અમેરિકાએ સત્તાવાર રીતે તેના 6 સૈનિકોના મોતના સમાચાર સ્વીકાર્યા છે, જ્યારે ઈરાનમાં અત્યાર સુધીમાં 1200થી વધુ લોકોના મોત થયા હોવાનું કહેવાય છે.
