ઘરે બેઠા UTIનું નિદાન શક્ય બનાવતી વૈજ્ઞાનિકોની અનોખી શોધ, દર્દીઓ માટે મોટી રાહત
ભાવનગરની CSMCRIની વૈજ્ઞાનિક ટીમે એક એવી નવીન કિટ વિકસાવી છે, જે યુરિન ઇન્ફેક્શનની ઓળખ હવે દિવસો નહીં પરંતુ કલાકોમાં કરી શકે છે. સામાન્ય રીતે રિપોર્ટ આવવા બે દિવસ જેટલો સમય લાગે છે, પરંતુ આ કિટ દ્વારા ફક્ત 6 થી 9 કલાકમાં ચોક્કસ પરિણામ મળી રહે છે. ખાસ વાત એ છે કે આ કિટ ખૂબ જ ઓછા ખર્ચે બને છે અને ઘરે બેઠા ટેસ્ટ કરી શકાય છે. દર્દીઓનો સમય અને ખર્ચ બંને બચાવે તેવું આ સંશોધન આરોગ્ય ક્ષેત્ર માટે મહત્વપૂર્ણ સાબિત થાય છે.
સંશોધકોની પાંચ વર્ષની મહેનત પછી તૈયાર થયેલી આ કિટની ખાસિયતો
CSMCRIના ચીફ સાયન્ટિસ્ટ ડો. એસ. હલદર, પ્રિન્સિપલ સાયન્ટિસ્ટ કાંતિ ભૂષણ પાંડે અને તેમની ટીમે લગભગ 5 થી 6 વર્ષ સુધી સતત અભ્યાસ કરીને આ કિટ વિકસાવી છે. કિટનો ઉત્પાદન ખર્ચ માત્ર 10 થી 15 રૂપિયા આવે છે, જેથી સામાન્ય લોકો માટે પણ તેનો ઉપયોગ સરળ બને છે. ઠંડા સ્ટોરેજની જરૂર ન હોવાથી તે દૂરસ્ત વિસ્તારોમાં પણ સરળતાથી પહોંચાડી શકાય છે. હેલ્થ વર્કર્સ ખૂબ ઓછી તાલીમ સાથે તેનો ઉપયોગ કરી શકે તેવું તેને ડિઝાઇન કરવામાં આવ્યું છે.
યુરિનરી ટ્રેક્ટ ઇન્ફેક્શનની ઝડપી ઓળખથી દર્દીઓને થશે મોટો લાભ
વૈજ્ઞાનિકોના જણાવ્યા મુજબ UTI ખાસ કરીને મહિલાઓમાં સૌથી સામાન્ય ઇન્ફેક્શન ગણાય છે. ઇન્ફેક્શનની મોડે ઓળખ થવાથી ઘણી વાર કિડની સુધી અસર પહોંચે છે. આ નવી કિટથી ઓછા સમયમાં ચોક્કસ રિપોર્ટ મળતા સારવાર જલદી શરૂ કરી શકાય છે. લેબમાં જવાની જરૂર ન હોવાથી દર્દીઓને વધારાનો ખર્ચ પણ નહીં થાય. ઝડપથી નિદાન થતા સારવારની અસરકારકતા પણ વધશે.
કિટ કેવી રીતે કામ કરે છે અને પરિણામ કેવી રીતે જાણી શકાય
આ ટેસ્ટ માટે દર્દીનું યુરિન સેમ્પલ લઈને તેમાં કિટની મેમ્બ્રેન મૂકી 6 થી 9 કલાક સુધી રાખવું પડે છે. જો સેમ્પલમાં કોઈ રંગ બદલાતો ન હોય તો બેક્ટેરિયા હાજર નથી એવી શક્યતા રહે છે. પરંતુ કલર ગુલાબી થઈ જાય તો તેમાં ઇન્ફેક્શન હોવાનું માનવામાં આવે છે. આ બદલાવ નરી આંખે જ જોઈ શકાય એવો હોય છે, જેથી સરળતાથી સામાન્ય વ્યક્તિ પણ પરિણામ સમજી શકે છે. આ પ્રક્રિયા સંપૂર્ણપણે ઘરેથી પણ થઈ શકે છે.
બે ડબ્બાથી ચાલતી સરળ રચના અને દવા નક્કી કરવાની સુવિધા
ડો. એસ. હલદર અને ડો. કાન્નન શ્રીનિવાસનના જણાવ્યા મુજબ કિટમાં માત્ર બે નાનાં ડબ્બા હોય છે, જેનામાં યુરિન મૂકીને મેમ્બ્રેન નાખવામાં આવે છે. કલર ચેન્જથી માત્ર ઇન્ફેક્શન જ નહીં, પરંતુ કયા પ્રકારના બેક્ટેરિયા છે તેની પણ ઓળખ થઇ જાય છે. તેના આધારે કઈ દવા અપાય તે નક્કી કરવામાં વધુ સરળતા મળે છે. કિટમાં ટેક્નિશિયન કે ખાસ કૌશલ્યની જરૂર ન હોવાથી સામાન્ય લોકો પણ તેનો ઉપયોગ કરી શકે છે.
