નાયબ મુખ્યમંત્રી હર્ષભાઈ સંઘવીના હસ્તે વડોદરામાં રૂ. ૨૦૩ કરોડના વિકાસ પ્રકલ્પોનું લોકાર્પણ અને ખાતમુહૂર્ત

વડોદરા પ્રવાસે નાયબ મુખ્યમંત્રી હર્ષ સંઘવી, વિકાસ કાર્યો સાથે સ્વર્ણિમ ગુજરાત સ્પોર્ટ્સ યુનિવર્સિટીમાં દીકરીઓના હોસ્ટેલનું ખાતમુહૂર્ત

વડોદરાના પ્રવાસે આવેલા નાયબ મુખ્યમંત્રી હર્ષ સંઘવીએ વડોદરા મહાનગરપાલિકાના રૂ. ૨૦૩ કરોડના વિવિધ વિકાસ પ્રકલ્પોનું લોકાર્પણ અને ખાતમુહૂર્ત કર્યું હતું. આ પ્રસંગે તેમણે ડેસર ખાતે આવેલી સ્વર્ણિમ ગુજરાત સ્પોર્ટ્સ યુનિવર્સિટીમાં દીકરીઓ માટે નવી હોસ્ટેલનું પણ ખાતમુહૂર્ત કર્યું હતું. મંત્રીશ્રીએ જણાવ્યું હતું કે, ૨૦૪૭ સુધીમાં જ્યારે રાજ્યની મોટાભાગની વસ્તી શહેરોમાં હશે, ત્યારે તેને ધ્યાનમાં રાખીને સરકાર અત્યારથી જ આયોજનબદ્ધ માળખાગત સુવિધાઓ ઊભી કરવા માટે મક્કમ નિર્ધાર સાથે કામ કરી રહી છે.

વડોદરાના નવા વિસ્તારો માટે ૧૦૦૦ કરોડની વિશેષ જોગવાઈ

શહેરના નવા ભળેલા વિસ્તારોના વિકાસ માટે બજેટમાં રૂ. ૧૦૦૦ કરોડની મોટી રકમ ફાળવવામાં આવી છે. જેમાંથી ૮૦૦ કરોડ પાણીની લાઈનો માટે, ૭૦૦ કરોડ ડ્રેનેજ નેટવર્ક માટે અને ૪૦૦ કરોડ રસ્તાઓના કામ માટે વપરાશે. અમૃત ૨.૦ યોજના હેઠળ ભાયલી અને સેવાસી વિસ્તારમાં નવી પાણીની ટાંકીઓના લોકાર્પણથી પચાસ હજારથી વધુ લોકોને શુદ્ધ પીવાનું પાણી મળશે. આ સુવિધાઓને કારણે છેલ્લા ત્રણ વર્ષમાં પાણીજન્ય રોગોમાં ૫૦ ટકાનો ઘટાડો થયો છે, જે શહેરના આરોગ્ય માટે સુખદ બાબત છે.

સુરસાગર અને ન્યાય મંદિર બનશે પ્રવાસીઓ માટે આકર્ષણનું કેન્દ્ર

વડોદરાના ઐતિહાસિક વારસાને જાળવવા માટે સુરસાગર તળાવ ખાતે ૪૦ કરોડના ખર્ચે ઇન્ટરનેશનલ ફાઉન્ટેન અને ૩-ડી ડિજિટલ મેપિંગ શો જેવી સુવિધાઓ વિકસાવવામાં આવશે. ન્યાય મંદિર પાસે ‘હેરિટેજ સ્ક્વેર’ બનાવીને તેને પ્રવાસનનું કેન્દ્ર બનાવાશે. વિશ્વામિત્રી નદીના ઉંડીકરણની કામગીરી રેકોર્ડ સમયમાં પૂરી કરવા બદલ મંત્રીશ્રીએ તંત્રને બિરદાવ્યું હતું. વડોદરા હવે આઈટી અને સેમીકન્ડક્ટર જેવા ક્ષેત્રોમાં નવી રોજગારી મેળવવા તરફ આગળ વધી રહ્યું છે, જે શહેરના આર્થિક વિકાસને નવી ગતિ આપશે.

ઓલ ઇન્ડીયા ઇન્ટર યુનિવર્સિટી જુડો સ્પર્ધામાં સ્વર્ણિમ ગુજરાત સ્પોર્ટ્સ યુનિવર્સિટીના ખેલાડીઓનું દમદાર પ્રદર્શન

વડોદરાની બીના ખીમાણીનો અનોખો શોખ, કારગિલ યુદ્ધની યાદોને સ્ક્રેપબુકમાં જીવંત રાખી

વડોદરાને દેશમાં સૌથી સ્વચ્છ શહેર બનાવવા ‘સ્વચ્છતા ચેલેન્જ’

મંત્રીશ્રીએ વડોદરાવાસીઓને ‘સ્વચ્છતા ચેલેન્જ’ આપતા અનુરોધ કર્યો કે વડોદરાને દેશમાં પ્રથમ ક્રમે લાવવા માટે માત્ર સરકાર નહીં, પણ જન ભાગીદારી જરૂરી છે. ગમે ત્યાં કચરો ન ફેંકીને અને જાહેર મિલકતોની જાળવણી કરીને નાગરિકોએ સ્વચ્છતા દૂતોને મદદ કરવી જોઈએ. મેયર પિન્કીબેન સોનીએ પણ જણાવ્યું કે વડોદરાનો વિકાસ નાગરિક કેન્દ્રિત છે, જેમાં છેવાડાના માનવીની સુવિધાનો પણ ખ્યાલ રાખવામાં આવ્યો છે. આ કાર્યક્રમમાં ધારાસભ્યો, સાંસદ અને મોટી સંખ્યામાં શહેરીજનો ઉપસ્થિત રહી વિકાસયાત્રાના સાક્ષી બન્યા હતા.