‘તમામ મહિલાઓ અને દીકરીઓ માટે અધિકાર, ન્યાય અને અમલીકરણ’ થીમ સાથે વડોદરામાં મહિલા સશક્તિકરણ કાર્યક્રમ
આંતરરાષ્ટ્રીય મહિલા દિવસની ઉજવણીના ભાગરૂપે વડોદરાના પંડિત દિનદયાળ ઉપાધ્યાય ગૃહ ખાતે એક ભવ્ય કાર્યક્રમ યોજાયો હતો. ‘તમામ મહિલાઓ અને દીકરીઓ માટે અધિકાર, ન્યાય અને અમલીકરણ’ ની થીમ પર આધારિત આ કાર્યક્રમમાં રાષ્ટ્રીય મહિલા આયોગના અધ્યક્ષ શ્રીમતી વિજયા રાહતકર મુખ્ય અતિથિ તરીકે ઉપસ્થિત રહ્યા હતા. તેમણે રાષ્ટ્રીય મહિલા આયોગને મહિલાઓ માટેના ‘બીજા પિયર’ સમાન ગણાવીને ખાતરી આપી હતી કે આ સંસ્થા મહિલાઓની સુરક્ષા, સન્માન અને ન્યાય માટે હંમેશા કટિબદ્ધ છે.
‘વુમન-લેડ ડેવલપમેન્ટ’ દ્વારા વિકસિત ભારતનો સંકલ્પ
શ્રીમતી વિજયા રાહતકરે જણાવ્યું હતું કે વડાપ્રધાન શ્રી નરેન્દ્ર મોદીના નેતૃત્વમાં ભારત હવે મહિલા વિકાસથી આગળ વધીને ‘મહિલા નેતૃત્વ હેઠળના વિકાસ’ (વુમન-લેડ ડેવલપમેન્ટ) તરફ આગળ વધી રહ્યું છે. આજે ભારતની દીકરીઓ રક્ષણથી લઈને રેલવે અને પાયલોટ તરીકે વિશ્વભરમાં નામ રોશન કરી રહી છે. તેમણે ‘શક્તિ વંદન વિધેયક’ અને પીએમ આવાસ યોજના જેવા ઉદાહરણો આપીને જણાવ્યું હતું કે કેવી રીતે કાયદાકીય અને આર્થિક સુધારાઓ દ્વારા મહિલાઓને નિર્ણય પ્રક્રિયામાં ભાગીદાર બનાવવામાં આવી રહી છે. સાથોસાથ, તેમણે મહિલાઓને સાયબર ફ્રોડથી બચવા માટે ડિજિટલ સાક્ષરતા કેળવવા પર પણ ભાર મૂક્યો હતો.
વિવિધ યોજનાઓ હેઠળ લાભાર્થીઓને સહાય અને સન્માન
આ કાર્યક્રમમાં મહિલા કલ્યાણ ક્ષેત્રે ઉત્કૃષ્ટ કામગીરી કરનાર કર્મયોગીઓનું બહુમાન કરવામાં આવ્યું હતું. અધ્યક્ષશ્રીના હસ્તે ‘વ્હાલી દીકરી યોજના’, ‘ગંગા સ્વરૂપા આર્થિક સહાય’ અને ‘મહિલા સ્વાવલંબન યોજના’ જેવી કલ્યાણકારી યોજનાઓના મંજૂરી પત્રો તેમજ કીટનું વિતરણ કરવામાં આવ્યું હતું. વડોદરા જિલ્લા પંચાયતના પ્રમુખ અને અન્ય મહાનુભાવોની હાજરીમાં યોજાયેલા આ કાર્યક્રમમાં મોટી સંખ્યામાં મહિલાઓ અને કિશોરીઓએ ભાગ લીધો હતો, જે નારી શક્તિના વધતા આત્મવિશ્વાસનું પ્રતીક છે.
