વઘઈ સરકારી વિનયન અને વાણિજ્ય કોલેજમાં ‘રંગત-૨૦૨૬’ વાર્ષિકોત્સવ ઉજવાયો

શૈક્ષણિક, રમતગમત અને સાંસ્કૃતિક ક્ષેત્રે સિદ્ધિ મેળવનાર વિદ્યાર્થીઓનું સન્માન

ડાંગ જિલ્લાની સરકારી વિનયન અને વાણિજ્ય કોલેજ, વઘઈ ખાતે ‘રંગત-૨૦૨૬’ થીમ આધારિત વાર્ષિકોત્સવ અને ઈનામ વિતરણ સમારોહ યોજાયો હતો. ગુજરાત વિધાનસભાના નાયબ મુખ્ય દંડક અને ડાંગના ધારાસભ્ય વિજયભાઈ પટેલના અધ્યક્ષસ્થાને યોજાયેલા આ કાર્યક્રમમાં વિદ્યાર્થીઓને પ્રોત્સાહિત કરવામાં આવ્યા હતા. ધારાસભ્યશ્રીએ જણાવ્યું હતું કે જીવનમાં સફળતા મેળવવા માટે મહેનત જ એકમાત્ર વિકલ્પ છે. તેમણે વિદ્યાર્થીઓને આત્મવિશ્વાસ, શિસ્તબદ્ધ જીવન અને સકારાત્મક દૃષ્ટિકોણ કેળવીને આગળ વધવા માટે પ્રેરણા આપી હતી.

ડાંગના યુવાનો માટે શિક્ષણ અને આધુનિક લાઈબ્રેરીની સુવિધાઓમાં વધારો

ધારાસભ્ય વિજયભાઈ પટેલે વધુમાં માહિતી આપી હતી કે ડાંગના વિદ્યાર્થીઓને ઉચ્ચ અભ્યાસ માટે જિલ્લાની બહાર ન જવું પડે તે માટે વઘઈ અને સુબીરમાં નવી કોલેજો શરૂ કરવામાં આવી છે. શિક્ષણના સ્તરને સુધારવા માટે આહવા અને વઘઈમાં રૂ. ૯ કરોડના ખર્ચે આધુનિક લાઈબ્રેરીનું નિર્માણ કાર્ય ચાલી રહ્યું છે, જ્યારે સુબીરમાં પણ રૂ. ૫ કરોડના ખર્ચે ટૂંક સમયમાં અત્યાધુનિક લાઈબ્રેરી બનાવવામાં આવશે. આ સુવિધાઓ દ્વારા અંતરિયાળ વિસ્તારના યુવાનોને સ્પર્ધાત્મક પરીક્ષાઓ અને અભ્યાસ માટે ઉત્તમ વાતાવરણ મળી રહેશે.

શિક્ષણની સાથે નૈતિક મૂલ્યો અને નેતૃત્વ ક્ષમતા વિકસાવવા પર ભાર

કાર્યક્રમમાં ઉપસ્થિત મહાનુભાવોએ વિદ્યાર્થીઓને માત્ર ડિગ્રી મેળવવા પૂરતું સીમિત ન રહીને જીવનમાં સંસ્કાર અને સામાજિક જવાબદારી સમજવા આહ્વાન કર્યું હતું. ડાયટ પ્રાચાર્ય ભગુભાઈ રાઉત અને વાંસદા કોલેજના આચાર્ય ડો. વાય. જે. મિસ્ત્રીએ સમયનું સંચાલન અને સંશોધન પ્રત્યે રુચિ કેળવવા પર ભાર મૂક્યો હતો. તેમણે જણાવ્યું કે કોલેજ જીવન એ નેતૃત્વ ક્ષમતા વિકસાવવાનો સુવર્ણ અવસર છે, જેનો ઉપયોગ કરીને યુવાનો રાષ્ટ્રના વિકાસમાં પોતાનું અમૂલ્ય યોગદાન આપી શકે છે.

ડાંગ જિલ્લામાં વિશ્વ ક્ષય દિવસ નિમિત્તે ૪૫ ગ્રામ પંચાયતોને ટીબી મુક્ત સન્માન

ડાંગના સુબીર તાલુકાના ઘાણીઆંબા ગામમાં પ્રાકૃતિક ખેતી તાલીમ

સાંસ્કૃતિક કાર્યક્રમોની રમઝટ અને તેજસ્વી વિદ્યાર્થીઓનું સન્માન

વાર્ષિકોત્સવ દરમિયાન વિદ્યાર્થીઓએ ગરબો, ગામિત નૃત્ય અને વિવિધ સાંસ્કૃતિક કૃતિઓ રજૂ કરીને સૌને મંત્રમુગ્ધ કર્યા હતા. વર્ષ દરમિયાન શૈક્ષણિક પ્રવૃત્તિઓ, રમતગમત અને અન્ય ઇત્તર પ્રવૃત્તિઓમાં વિશેષ સિદ્ધિ હાંસલ કરનાર તેજસ્વી વિદ્યાર્થીઓને મહાનુભાવોના હસ્તે ઈનામો આપીને સન્માનિત કરવામાં આવ્યા હતા. આ પ્રસંગે કોલેજના આચાર્ય, પ્રાધ્યાપકો અને મોટી સંખ્યામાં વિદ્યાર્થીઓ ઉપસ્થિત રહ્યા હતા, જેનાથી સમગ્ર વાતાવરણ ઉત્સાહમય બની ગયું હતું.