સાપુતારા મોન્સૂન ફેસ્ટિવલ-૨૦૨૬ નો પ્રારંભ: નાયબ મુખ્યમંત્રી હર્ષ સંઘવીએ કર્યું ભવ્ય ઉદ્ઘાટન
ગુજરાતના એકમાત્ર હિલ સ્ટેશન સાપુતારા ખાતે ચોમાસાની રુમઝુમ ઋતુ સાથે ‘સાપુતારા મોન્સૂન ફેસ્ટિવલ-૨૦૨૬’ નો અદ્ભુત પ્રારંભ થઈ ચૂક્યો છે. રાજ્યના નાયબ મુખ્યમંત્રી હર્ષ સંઘવીએ આ ભવ્ય પ્રકૃતિ અને સંસ્કૃતિના મહોત્સવનું વિધિવત ઉદ્ઘાટન કર્યું હતું. ૨૯ ઓગસ્ટ સુધી ચાલનારા આ મહોત્સવમાં દેશભરમાંથી આવતા પ્રવાસીઓ માટે સાહસિક પ્રવૃત્તિઓ, સ્થાનિક આદિવાસી કલા, વાનગીઓ અને વિવિધ સાંસ્કૃતિક કાર્યક્રમોનું સુંદર આયોજન કરવામાં આવ્યું છે.
ઉદ્ઘાટન પ્રસંગે પ્રવાસીઓ અને સ્થાનિક નાગરિકોને સંબોધતા નાયબ મુખ્યમંત્રી હર્ષ સંઘવીએ જણાવ્યું હતું કે, “સાપુતારા માત્ર એક હિલ સ્ટેશન નથી, પરંતુ ડાંગ પ્રદેશની અનોખી સંસ્કૃતિ, પ્રાકૃતિક વૈવિધ્ય અને હરિયાળીનું જીવંત પ્રતીક છે. પ્રધાનમંત્રી નરેન્દ્ર મોદીના ‘વિકસિત ભારત@૨૦૪૭’ ના વિઝનને સાકાર કરવા માટે મુખ્યમંત્રી ભૂપેન્દ્ર પટેલના નેતૃત્વમાં ગુજરાત સરકારે પર્યટન ક્ષેત્રને આર્થિક વિકાસના મુખ્ય એન્જિન તરીકે આગળ ધપાવ્યું છે.”
સ્થાનિક અર્થતંત્ર અને રોજગારીનું મજબૂત માધ્યમ
નાયબ મુખ્યમંત્રીએ વધુમાં ભારપૂર્વક જણાવ્યું કે, પ્રવાસન ક્ષેત્ર માત્ર ફરવા કે મનોરંજન પૂરતું મર્યાદિત નથી, પરંતુ તે સ્થાનિક અર્થતંત્રને વેગ આપવાનું મોટું સાધન છે. સાપુતારા આવતા પ્રવાસીઓના કારણે સ્થાનિક હોટેલ ઉદ્યોગ, ટેક્સી ડ્રાઇવરો, ગાઇડ, મહિલા સ્વ-સહાય જૂથો, હસ્તકલા કારીગરો અને નાના વેપારીઓને સીધી આવક થાય છે. ગયા વર્ષે મોન્સૂન ફેસ્ટિવલ દરમિયાન ૨.૬૧ લાખથી વધુ પ્રવાસીઓએ મુલાકાત લીધી હતી અને ૨૯૦ થી વધુ સ્થાનિક સ્ટોલ્સ પરથી રૂ. ૧.૫૭ કરોડની વેચાણ આવક થઈ હતી.
પર્યટન રાજ્યમંત્રી ડૉ. જયરામ ગામીતે પ્રસંગોચિત પ્રવચનમાં યાદ અપાવ્યું હતું કે ૨૦૦૯ માં તત્કાલીન મુખ્યમંત્રી નરેન્દ્ર મોદીના માર્ગદર્શન હેઠળ શરૂ કરાયેલો આ મહોત્સવ આજે ડાંગની આદિવાસી કળાને વૈશ્વિક ઓળખ અપાવી રહ્યો છે. વર્ષ ૨૦૨૫ માં ૧૪.૬૭ લાખથી વધુ પ્રવાસીઓએ સાપુતારાની મુલાકાત લીધી હતી, જે તેની લોકપ્રિયતા દર્શાવે છે. રાજ્ય સરકારે ‘ગુજરાત પ્રવાસન વર્ષ’ અંતર્ગત ટુરિઝમ સેક્ટર માટે ₹૩,૦૯૦ કરોડની બજેટ જોગવાઈ કરી છે, જેનાથી સ્થાનિક યુવાનો માટે સ્વરોજગારીની વિપુલ તકો સર્જાશે.
‘એક ભારત, શ્રેષ્ઠ ભારત’ નો સંદેશ અને અદ્ભુત સાંસ્કૃતિક પ્રદર્શન
આ મહોત્સવ દરમિયાન પરિવારના દરેક સભ્ય માટે વિવિધ આકર્ષણો ગોઠવવામાં આવ્યા છે. જેમાં ‘એક ભારત, શ્રેષ્ઠ ભારત’ થીમ આધારિત પરેડ, હસ્તકલા વર્કશોપ, મ્યુઝિકલ પ્રોગ્રામ્સ, રેન ડાન્સ, નેચર ટ્રેઇલ્સ અને મનોહર સેલ્ફી પોઇન્ટ્સનો સમાવેશ થાય છે.
ઉદ્ઘાટન સમારોહ બાદ યોજાયેલા સાંસ્કૃતિક કાર્યક્રમમાં દેશના ૧૩ અલગ-અલગ રાજ્યોમાંથી આવેલા ૧૧૦ એવોર્ડ વિજેતા કલાકારોએ કોરિઓગ્રાફ્ડ નૃત્ય રજૂ કર્યા હતા. આ સાથે જ સ્થાનિક આદિવાસી કલાકારોએ પરંપરાગત ‘ડાંગી નૃત્ય’ ની મનોહર રજૂઆત કરીને ઉપસ્થિત શ્રોતાઓને મંત્રમુગ્ધ કરી દીધા હતા. આ પ્રસંગે સાંસદ ધવલ પટેલ, ધારાસભ્ય વિજય પટેલ, પ્રવાસન સચિવ ડૉ. કુલદીપ આર્ય અને જિલ્લા કલેક્ટર સહિતના અનેક મહાનુભાવો ઉપસ્થિત રહ્યા હતા.
