વૈભવ સૂર્યવંશીની દિવાળી બની ખાસ, IPLમાં ધમાલ મચાવનાર 15 વર્ષના ક્રિકેટરને મળી ટાટા સીએરા SUV
ભારતીય ક્રિકેટના યુવા સનસનાટીભર્યા બેટ્સમેન વૈભવ સૂર્યવંશી માટે આ વર્ષની દિવાળી બેવડી ખુશીઓ લઈને આવી છે. IPL 2026માં પોતાના આક્રમક બેટિંગ પ્રદર્શનથી દુનિયાભરના ક્રિકેટ ચાહકોનું ધ્યાન ખેંચનાર વૈભવને આખરે તેની મહેનતનું ખાસ ઇનામ મળી ગયું છે. 15 વર્ષના આ યુવા ક્રિકેટરને દિવાળીના અવસર પર નવી ટાટા સીએરા SUVની ડિલિવરી મળી છે. ખાસ વાત એ છે કે આ કાર વૈભવના પરિવારે ખરીદી નથી, પરંતુ IPL 2026માં સુપર સ્ટ્રાઈકર ઓફ ધ સીઝનનો એવોર્ડ જીતવા બદલ તેને ઇનામ તરીકે આપવામાં આવી હતી. વૈભવના મોટા ભાઈ ઉજ્જ્વલ સૂર્યવંશીએ સોશિયલ મીડિયા પર કારની ડિલિવરીની તસવીરો શેર કરી હતી. આ તસવીરોમાં વૈભવ પોતાના માતા-પિતા અને ભાઈઓ સાથે નવી કારની ડિલિવરી લેતો જોવા મળે છે. IPLમાં ઐતિહાસિક પ્રદર્શન કર્યા બાદ મળેલી આ ભેટે તેના પરિવારની દિવાળીને વધુ યાદગાર બનાવી દીધી છે.
IPL 2026માં 237ના સ્ટ્રાઈક રેટથી મચાવી હતી ધમાલ
વૈભવ સૂર્યવંશી માટે IPL 2026ની સિઝન યાદગાર રહી હતી. રાજસ્થાન રોયલ્સ તરફથી રમતા આ યુવા બેટ્સમેને પોતાની આક્રમક બેટિંગથી મોટા-મોટા બોલરોને મુશ્કેલીમાં મૂક્યા હતા. તેણે સમગ્ર સિઝનમાં 16 મેચ રમીને 48.50ની સરેરાશથી કુલ 776 રન બનાવ્યા હતા. આ દરમિયાન તેનો સ્ટ્રાઈક રેટ 237.30 રહ્યો હતો, જે તેની વિસ્ફોટક બેટિંગનો પુરાવો છે.
આ શાનદાર પ્રદર્શનના આધારે વૈભવે ઓરેન્જ કેપ પોતાના નામે કરી હતી. તે IPLના ઇતિહાસમાં ઓરેન્જ કેપ જીતનાર સૌથી યુવા ખેલાડી પણ બન્યો હતો. તેની બેટિંગની સૌથી મોટી ખાસિયત મોટા પ્રમાણમાં છગ્ગા ફટકારવાની રહી હતી. તેણે આખી સિઝનમાં કુલ 72 છગ્ગા ફટકાર્યા હતા અને IPLની એક સિઝનમાં સૌથી વધુ છગ્ગા ફટકારવાનો નવો રેકોર્ડ બનાવ્યો હતો. આ સાથે તેણે ક્રિસ ગેઇલનો એક સિઝનમાં 59 છગ્ગાનો જૂનો રેકોર્ડ તોડી નાખ્યો હતો.
વૈભવે આ સિઝનમાં એક સદી અને પાંચ અડધી સદી પણ ફટકારી હતી. સનરાઇઝર્સ હૈદરાબાદ સામેની મેચમાં તેણે માત્ર 37 બોલમાં 103 રનની તોફાની ઇનિંગ રમી હતી. તેના આ પ્રદર્શનને કારણે તેને ઓરેન્જ કેપ ઉપરાંત મોસ્ટ વેલ્યુએબલ પ્લેયર (MVP), સુપર સ્ટ્રાઈકર ઓફ ધ સીઝન અને ઇમર્જિંગ પ્લેયર ઓફ ધ સીઝન સહિતના મોટા પુરસ્કારો મળ્યા હતા.
સુપર સ્ટ્રાઈકર એવોર્ડના ઇનામ તરીકે મળી ટાટા સીએરા
IPL 2026માં વૈભવને તેના શાનદાર સ્ટ્રાઈક રેટ માટે સુપર સ્ટ્રાઈકર ઓફ ધ સીઝન જાહેર કરવામાં આવ્યો હતો. આ એવોર્ડના ઇનામ તરીકે તેને ટાટા સીએરા SUV આપવામાં આવી હતી. જોકે, ટૂર્નામેન્ટ દરમિયાન જાહેર થયેલી આ ભેટની ડિલિવરી ઘણા મહિના બાદ થઈ હતી.
હવે ધનતેરસ અને દિવાળીના તહેવારની આસપાસ વૈભવને આ નવી કાર મળી છે. તેના મોટા ભાઈ ઉજ્જ્વલ સૂર્યવંશીએ ઇન્સ્ટાગ્રામ પર કારની ડિલિવરીની તસવીરો શેર કરીને આ ખુશીના સમાચાર આપ્યા હતા. વૈભવ પોતાના પિતા સંજીવ સૂર્યવંશી, માતા અને બંને ભાઈઓ સાથે શોરૂમ પહોંચ્યો હતો. સમગ્ર પરિવારે સાથે મળીને આ ખાસ ક્ષણની ઉજવણી કરી હતી.સોશિયલ મીડિયા પર સામે આવેલી તસવીરોમાં વૈભવ નવી ટાટા સીએરા સાથે જોવા મળે છે. IPLમાં પોતાના પ્રદર્શનના ઇનામ તરીકે મળેલી આ કાર તેના માટે માત્ર એક લક્ઝરી ગિફ્ટ નથી, પરંતુ તેની મહેનત અને સફળતાની યાદગાર નિશાની પણ છે. માત્ર 15 વર્ષની ઉંમરે આટલી મોટી સિદ્ધિ મેળવવી તેની પ્રતિભા દર્શાવે છે.
કારની ભેટ સાથે વૈભવને મળી નવી જવાબદારી
વૈભવ સૂર્યવંશી માટે વર્ષ 2026 માત્ર IPLની સફળતા પૂરતું મર્યાદિત રહ્યું નથી. તેની ક્રિકેટ કારકિર્દીમાં આ વર્ષે અનેક મહત્વપૂર્ણ પડાવ આવ્યા છે. IPLમાં શાનદાર પ્રદર્શન કર્યા બાદ તેણે જુલાઈ મહિનામાં ભારતીય ટીમ તરફથી આંતરરાષ્ટ્રીય ક્રિકેટમાં પદાર્પણ પણ કર્યું હતું.
હવે વૈભવની કારકિર્દીમાં વધુ એક મહત્વપૂર્ણ જવાબદારી ઉમેરાઈ છે. તેને સૈયદ મુશ્તાક અલી ટ્રોફીની શરૂઆતની બે મેચો માટે બિહારની સિનિયર ક્રિકેટ ટીમનો કેપ્ટન બનાવવામાં આવ્યો છે. આ પહેલીવાર હશે જ્યારે તે બિહારની સિનિયર ટીમનું નેતૃત્વ કરશે.બિહારની ટીમ 14 નવેમ્બરે ઇન્દોરમાં સૌરાષ્ટ્ર સામે પોતાની પ્રથમ મેચ રમશે. આ ટૂર્નામેન્ટમાં વૈભવની કેપ્ટનશિપ અને બેટિંગ બંને પર ક્રિકેટ ચાહકોની નજર રહેશે.
