દક્ષિણ વન વિભાગની ટીમે ઉગાણા ગામે દરોડો પાડી ₹1.65 લાખનો મુદ્દામાલ જપ્ત કર્યો
દક્ષિણ નાયબ વન સંરક્ષક નિરજ કુમારના માર્ગદર્શન હેઠળ વઘઈ વન વિભાગ અને પોલીસ સ્ટાફે એક મોટી સફળતા મેળવી છે. તારીખ ૫/૩/૨૦૨૬ના રોજ મળેલી ચોક્કસ બાતમીના આધારે, વઘઈ અને સાકરપાતળ રેન્જના વન અધિકારીઓ તથા પોલીસ સ્ટાફે ઉગા ગામના વિનોદભાઈ તુળશીરામભાઈ ભગરેના ઘરે ઓચિંતો દરોડો પાડ્યો હતો. આ કાર્યવાહી દરમિયાન પરવાનગી વગરનો કિંમતી સાગનો જથ્થો મળી આવતા વન વિભાગે કડક કાર્યવાહી હાથ ધરી છે.
લાખોની કિંમતનો મુદ્દામાલ અને ફર્નિચરના મશીનો જપ્ત
તપાસ દરમિયાન આરોપીના ઘરેથી વગર પાસ-પરમિટના સાગી સાઈઝના ૨૯૫ નંગ (આશરે ૧.૫૬૯ ઘનમીટર) લાકડા મળી આવ્યા હતા. આ સાથે જ ગેરકાયદેસર રીતે ફર્નિચર બનાવવા માટે વપરાતા આધુનિક રંધા મશીન અને કટર મશીન જેવા સાધનો પણ જપ્ત કરવામાં આવ્યા છે. વન વિભાગના જણાવ્યા મુજબ, લાકડા અને મશીનો મળીને કુલ અંદાજે રૂ. ૧,૬૫,૦૦૦/- ની કિંમતનો મુદ્દામાલ જપ્ત કરી કાયદેસરની કાર્યવાહી કરવામાં આવી છે.
આરોપીની અટકાયત અને આગળની કાયદેસરની તપાસ
વન ગુનામાં સંડોવાયેલા આરોપી વિનોદભાઈ ભગરેની સ્થળ પર જ અટકાયત કરવામાં આવી છે. વઘઈ રેન્જ ફોરેસ્ટ ઓફિસર આરતી આર. ડામોર અને તેમની ટીમ દ્વારા આ મામલે ઊંડી તપાસ શરૂ કરવામાં આવી છે કે આ લાકડા કયા જંગલમાંથી કાપવામાં આવ્યા હતા અને તેની પાછળ અન્ય કોઈ મોટી ગેંગ સક્રિય છે કે કેમ. વન વિભાગની આ ત્વરિત કામગીરીથી લાકડા ચોરી કરતા તત્વોમાં ફફડાટ વ્યાપી ગયો છે.
