T20 વર્લ્ડ કપ 2026 પહેલાં આજે 4 વોર્મ-અપ મેચો, ધાંસૂ ટીમો વચ્ચે ટક્કર; 8 ટીમો એક જ દિવસે મેદાનમાં
T20 વર્લ્ડ કપ 2026ની શરૂઆત હવે ગણતરીના દિવસો દૂર છે. 7 ફેબ્રુઆરીથી શરૂ થનારા આ મહાકુંભ પહેલાં તમામ ટીમો પોતાની તૈયારીઓને અંતિમ રૂપ આપવા માટે વોર્મ-અપ મેચો રમી રહી છે. આ કડીમાં આજે 5 ફેબ્રુઆરીએ કુલ 4 વોર્મ-અપ મેચો રમાશે, જેમાં દુનિયાની 8 ટીમો અલગ-અલગ મેદાનો પર એક્શનમાં જોવા મળશે.
આજે રમાનારી મેચોમાં ઓસ્ટ્રેલિયા, ન્યૂઝીલેન્ડ, ઝિમ્બાબ્વે જેવી ફુલ મેમ્બર ટીમો સહિત નેધરલેન્ડ્સ, નેપાળ, કેનેડા, ઓમાન અને USA જેવી ટીમો પોતાની તાકાત અજમાવશે.
દિવસની પ્રથમ મેચ: ઝિમ્બાબ્વે સામે ઓમાન
આજની પહેલી વોર્મ-અપ મેચ કોલંબોના સિંહલીઝ સ્પોર્ટ્સ ક્લબ ગ્રાઉન્ડ પર ઝિમ્બાબ્વે અને ઓમાન વચ્ચે રમાશે. આ મેચ ભારતીય સમય મુજબ સવારે 11 વાગ્યે શરૂ થશે.
ઉલ્લેખનીય છે કે આ જ મેદાન પર 4 ફેબ્રુઆરીએ પાકિસ્તાન અને આયરલેન્ડ વચ્ચેની વોર્મ-અપ મેચ વરસાદને કારણે એક પણ બોલ ન પડ્યા વગર રદ્દ થઈ ગઈ હતી. જોકે, ઓમાન અને ઝિમ્બાબ્વે બંને ટીમો આત્મવિશ્વાસથી ભરેલી છે.
- ઓમાને પોતાની છેલ્લી વોર્મ-અપ મેચમાં શ્રીલંકા-Aને હરાવ્યું હતું.
- જ્યારે ઝિમ્બાબ્વેએ નેધરલેન્ડ્સ સામે જીત મેળવી હતી.
ઓસ્ટ્રેલિયા સામે નેધરલેન્ડ્સ: દિવસની સૌથી મોટી ટક્કર
આજની સૌથી ચર્ચિત મેચ કોલંબોના આર. પ્રેમદાસા સ્ટેડિયમમાં સાંજે 5 વાગ્યે રમાશે, જ્યાં 2021ના T20 વર્લ્ડ કપ ચેમ્પિયન ઓસ્ટ્રેલિયાનો સામનો નેધરલેન્ડ્સ સાથે થશે.
આ મેચ નેધરલેન્ડ્સ માટે મોટો પડકાર સાબિત થઈ શકે છે, પરંતુ જો ‘મેન ઇન ઓરેન્જ’ ઓસ્ટ્રેલિયા સામે સારું પ્રદર્શન કરે છે, તો ટીમનો આત્મવિશ્વાસ ચોક્કસપણે વધી જશે. ખાસ કરીને પાકિસ્તાન સામેના તેમના વર્લ્ડ કપના પ્રથમ મેચ પહેલાં આ મેચ નેધરલેન્ડ્સ માટે ખૂબ જ મહત્વપૂર્ણ છે.
ચેન્નઈમાં નેપાળ vs કેનેડા
દિવસની ત્રીજી વોર્મ-અપ મેચ ચેન્નઈના એમ. એ. ચિદમ્બરમ સ્ટેડિયમમાં રમાશે, જ્યાં નેપાળ અને કેનેડા આમને-સામને આવશે. આ મેચ બપોરે 1 વાગ્યે શરૂ થશે.
- કેનેડાને પોતાની છેલ્લી વોર્મ-અપ મેચમાં ઇટાલી સામે હારનો સામનો કરવો પડ્યો હતો.
- બીજી તરફ, નેપાળે UAE સામે 146 રનનો લક્ષ્યાંક સરળતાથી હાંસલ કરીને 7 વિકેટે જીત મેળવી હતી.
આ મેચ બંને ટીમો માટે પોતાની બેન્ચ સ્ટ્રેન્થ અને ટીમ કોમ્બિનેશન અજમાવવાની સારો મોકો છે.
નવિ મુંબઈમાં ન્યૂઝીલેન્ડ સામે USA
આજની છેલ્લી અને મહત્વપૂર્ણ મેચ નવિ મુંબઈના DY પાટીલ સ્ટેડિયમમાં સાંજે 7 વાગ્યે રમાશે. અહીં ન્યૂઝીલેન્ડ અને USA આમને-સામને હશે.ન્યૂઝીલેન્ડ ટીમ ભારત સામેની T20I સિરીઝમાં 1-4થી હાર્યા બાદ તાજેતરમાં જ ભારત પહોંચી છે અને આ મેચ તેમનો એકમાત્ર વોર્મ-અપ મેચ છે.બીજી તરફ, USA ટીમનો આત્મવિશ્વાસ ઊંચા સ્તરે છે. ભારત-A સામે 239 રનના વિશાળ લક્ષ્યાંકનો પીછો કરતા USAએ 200 રન બનાવ્યા હતા, જે તેમની બેટિંગ શક્તિ દર્શાવે છે.
5 ફેબ્રુઆરીની વોર્મ-અપ મેચોની સંપૂર્ણ સમયસૂચિ
- ઝિમ્બાબ્વે vs ઓમાન – કોલંબો ક્રિકેટ ક્લબ ગ્રાઉન્ડ, કોલંબો – સવારે 11 વાગ્યે
- નેપાળ vs કેનેડા – એમ. એ. ચિદમ્બરમ સ્ટેડિયમ, ચેન્નઈ – બપોરે 1 વાગ્યે
- ઓસ્ટ્રેલિયા vs નેધરલેન્ડ્સ – આર. પ્રેમદાસા સ્ટેડિયમ, કોલંબો – સાંજે 5 વાગ્યે
- ન્યૂઝીલેન્ડ vs USA – DY પાટીલ સ્ટેડિયમ, નવિ મુંબઈ – સાંજે 7 વાગ્યે
ભારતમાં વોર્મ-અપ મેચ કેવી રીતે જોવી?
ભારતીય ક્રિકેટ ચાહકો માટે ખાસ માહિતી એ છે કે:
- નેપાળ vs કેનેડા (ચેન્નઈ) અને ન્યૂઝીલેન્ડ vs USA (નવિ મુંબઈ) મેચનું લાઈવ સ્ટ્રીમિંગ Jio Hotstar પર ઉપલબ્ધ રહેશે.
- જોકે, આ મેચોનું ટીવી પર લાઈવ પ્રસારણ નહીં થાય.
- કોલંબોમાં રમાતી બંને વોર્મ-અપ મેચોનું ભારત માં કોઈ પણ માધ્યમ પર પ્રસારણ ઉપલબ્ધ નથી.
