ભારત-અમેરિકાની દોસ્તીથી પાકિસ્તાન સ્તબ્ધ: ટ્રમ્પ સામે પાકિસ્તાની સંરક્ષણ મંત્રીએ ઝેર ઓક્યું.
વૈશ્વિક રાજનીતિમાં અત્યારે ‘જેના મિત્ર એના દુશ્મન’ જેવી સ્થિતિ સર્જાઈ રહી છે. ભારત અને અમેરિકા વચ્ચે થયેલા મોટા વેપાર કરાર (Trade Deal) બાદ પાકિસ્તાનની છાવણીમાં શોક અને ગુસ્સાનો માહોલ છે. પાકિસ્તાનના સંરક્ષણ પ્રધાન ખ્વાજા આસિફે પાકિસ્તાની નેશનલ એસેમ્બલીમાં એક અત્યંત વિવાદાસ્પદ અને ચોંકાવનારું નિવેદન આપ્યું છે. તેમણે અમેરિકા પર પાકિસ્તાનનો સ્વાર્થ ખાતર ઉપયોગ કરવાનો અને પછી તેને તરછોડી દેવાનો ગંભીર આરોપ લગાવ્યો છે.
“અમારો ઉપયોગ ટોઇલેટ પેપર જેવો થયો”
પાકિસ્તાની સંરક્ષણ પ્રધાન ખ્વાજા આસિફે નેશનલ એસેમ્બલીમાં ભાષણ આપતા અત્યંત કડવા શબ્દોનો પ્રયોગ કર્યો હતો. તેમણે કહ્યું કે, “પાકિસ્તાને અમેરિકાને બધું જ આપ્યું – અમારા બંદરો, અમારો હવાઈ માર્ગ અને અમારી સેનાનો સાથ. અમે અફઘાનિસ્તાન યુદ્ધમાં તેમની મદદ કરી, પરંતુ બદલામાં વોશિંગ્ટને પાકિસ્તાનનો ઉપયોગ ‘ટોઇલેટ પેપર’ ની જેમ કર્યો અને પછી કચરાપેટીમાં ફેંકી દીધું.”
આસિફે વધુમાં ઉમેર્યું કે, પાકિસ્તાને રશિયા (સોવિયેત યુનિયન) સામે અને ૨૦૦૧ પછીના આતંકવાદ વિરુદ્ધના યુદ્ધમાં અમેરિકાનો સાથ આપ્યો હતો. પરંતુ આ કોઈ ધાર્મિક જેહાદ નહોતી, તે માત્ર રાજકીય લાભ અને મોટી શક્તિઓનો ટેકો મેળવવાની લાલચ હતી, જે અંતે પાકિસ્તાન માટે ઘાતક સાબિત થઈ.
Khwaja Asif admits in Parliament that Pakistan rented itself out to the U.S. for war and was later discarded “like toilet paper”. Afghanistan was destroyed by policies now openly acknowledged in parliament. Millions suffered. Generations were lost. The world cannot look away now… pic.twitter.com/aEQjrm16ME
— Mariam Solaimankhil (@Mariamistan) February 10, 2026
ભારત-અમેરિકા ડીલ: પાકિસ્તાન માટે મોટો આંચકો
ખ્વાજા આસિફનું આ નિવેદન એવા સમયે આવ્યું છે જ્યારે ભારત અને અમેરિકા વચ્ચે વ્યૂહાત્મક અને વ્યાપારી સંબંધો નવી ઊંચાઈએ પહોંચ્યા છે. ટ્રમ્પ વહીવટીતંત્રે ભારત સાથે કરેલા કરારથી સ્પષ્ટ થઈ ગયું છે કે અમેરિકા હવે દક્ષિણ એશિયામાં ભારતને જ પોતાનો મુખ્ય ભાગીદાર માને છે. પાકિસ્તાનના આર્મી ચીફ અસીમ મુનીર અને વડાપ્રધાન શાહબાઝ શરીફે ટ્રમ્પને રીઝવવા માટે કરેલા તમામ પ્રયત્નો નિષ્ફળ રહ્યા હોય તેમ જણાય છે. ખ્વાજાના શબ્દોમાં રહેલી કડવાશ સૂચવે છે કે હવે અમેરિકા-પાકિસ્તાન સંબંધો સુધરવાને બદલે કાયમ માટે તૂટવાના આરે છે.
પૂર્વ જનરલો પર ઠીકરું ફોડ્યું
સંરક્ષણ મંત્રીએ માત્ર અમેરિકા જ નહીં, પણ પાકિસ્તાનના ભૂતપૂર્વ સૈન્ય શાસકો જનરલ ઝિયા-ઉલ-હક અને પરવેઝ મુશર્રફની પણ આકરી ટીકા કરી હતી. તેમણે કહ્યું કે આ જનરલોએ સત્તા માટે દેશના બંદરો અને આકાશ અમેરિકાને વેચી દીધા હતા. આ “ભાડૂતી યુદ્ધ” (Mercenary War) ને કારણે પાકિસ્તાનમાં લાખો લોકો પ્રભાવિત થયા, પેઢીઓ બરબાદ થઈ અને આજે પણ દેશ આતંકવાદની જે આગમાં સળગી રહ્યો છે, તે તે સમયની ખોટી નીતિઓનું જ પરિણામ છે.
અફઘાનિસ્તાનમાંથી આવ્યો વળતો પ્રહાર
ખ્વાજા આસિફના આ કબૂલાતના વિડીયો સોશિયલ મીડિયા પર વાયરલ થયા છે. અફઘાનિસ્તાનના દેશનિકાલ પૂર્વ સાંસદ મરિયમ સોલેમાનખૈલે આ વિડીયો શેર કરતા લખ્યું કે, “પાકિસ્તાનની આ નીતિઓએ અફઘાનિસ્તાનને બરબાદ કરી નાખ્યું હતું. હવે તેઓ સંસદમાં ખુલ્લેઆમ સત્ય સ્વીકારી રહ્યા છે. વિશ્વ હવે પાકિસ્તાનના બેવડા ચહેરાથી અજાણ રહી શકે નહીં.”
પાકિસ્તાન માટે ભવિષ્યની રાહ મુશ્કેલ
હાલમાં પાકિસ્તાન ગંભીર આર્થિક કટોકટી અને આંતરિક સુરક્ષાના પ્રશ્નોથી ઘેરાયેલું છે. અમેરિકા તરફથી મળતી સૈન્ય અને આર્થિક મદદ લગભગ બંધ થઈ ગઈ છે. બીજી તરફ, અમેરિકાનું ભારત પ્રત્યેનું વધતું આકર્ષણ પાકિસ્તાનને રાજદ્વારી રીતે એકલું પાડી રહ્યું છે. ખ્વાજા આસિફનું નિવેદન ભલે આત્મનિરીક્ષણ જેવું લાગતું હોય, પરંતુ તે વાસ્તવમાં પાકિસ્તાનની હતાશા દર્શાવે છે.
ભારત-અમેરિકાની મિત્રતાએ પાકિસ્તાનના વર્ષો જૂના ‘વ્યૂહાત્મક ભાગીદાર’ હોવાના ભ્રમને તોડી નાખ્યો છે. પાકિસ્તાન હવે ભલે અમેરિકાને દોષ આપે, પરંતુ તેણે સ્વીકારવું પડશે કે વિશ્વ હવે બદલાઈ ગયું છે અને માત્ર બીજાના યુદ્ધ લડીને કોઈ દેશ મહાન બની શકતો નથી.
