‘નથી ઈચ્છતા કે ભારતીય પ્રવાસીઓ ઓસ્ટ્રેલિયામાં રહે’, નિયો-નાઝી એક્ટિવિસ્ટે ઓકી નસલવાદી ઝેર
ઓસ્ટ્રેલિયાના જાણીતા નિયો-નાઝી એક્ટિવિસ્ટ થોમસ સેવેલના ભારત વિરોધી નિવેદનથી સોશિયલ મીડિયા પર હોબાળો મચી ગયો છે. મેલબર્ન કોર્ટમાં હાજર થયેલા સેવેલે પત્રકારો સાથે વાતચીત કરતા અત્યંત વાંધાજનક નિવેદન આપ્યું હતું. તેણે કહ્યું કે, “અમે નથી ઈચ્છતા કે ઓસ્ટ્રેલિયા ભારત જેવો ‘થર્ડ વર્લ્ડ કન્ટ્રી’ (ત્રીજી દુનિયાનો દેશ) બની જાય.” તેના આ નિવેદન બાદ ઓસ્ટ્રેલિયામાં રહેતા ભારતીય મૂળના લોકો અને સોશિયલ મીડિયા યુઝર્સ પોતાનો ગુસ્સો ઠાલવી રહ્યા છે.
કોર્ટમાં રજૂઆત અને ગંભીર આરોપો
32 વર્ષીય થોમસ સેવેલ પર એક સ્વદેશી વિરોધ કેમ્પમાં ‘વાંધાજનક વર્તન’ કરવા બદલ 25 જેટલા ગંભીર આરોપો લાગેલા છે. તેના પર કેમ્પના સભ્યો સાથે મારપીટ કરવાના પણ આરોપ છે. કોર્ટની સુનાવણી બાદ બહાર આવતા જ તેણે પત્રકારો સાથે ચર્ચા શરૂ કરી અને ઓસ્ટ્રેલિયામાં વસ્તીના માળખામાં થઈ રહેલા ફેરફાર (Demographic change) અંગે ઝેર ઓક્યું હતું. તેણે દાવો કર્યો હતો કે શ્વેત ઓસ્ટ્રેલિયન લોકોની જગ્યાએ હવે અન્ય દેશોના લોકો વધી રહ્યા છે, જે તેને મંજૂર નથી.
ભારત અને સૂદાન સાથે કરી સરખામણી
સેવેલે પત્રકારને ઉદ્દેશીને કહ્યું કે, “અમે નથી ઈચ્છતા કે ઓસ્ટ્રેલિયા ત્રીજી દુનિયાનો દેશ બને. અમે નથી ઈચ્છતા કે આ ભારત બની જાય, કે નથી ઈચ્છતા કે આ સૂદાન બની જાય. અમે તેને ઓસ્ટ્રેલિયન જ રાખવા માંગીએ છીએ. આ જ મુખ્ય મુદ્દો છે.” તેણે એમ પણ ઉમેર્યું કે ઓસ્ટ્રેલિયા અને સમગ્ર પશ્ચિમી દેશોમાં અત્યારે ‘વ્હાઈટ રિપ્લેસમેન્ટ’ (શ્વેત લોકોનું સ્થાન અન્ય લોકો દ્વારા લેવું) સૌથી મોટી સમસ્યા છે અને તેઓ માત્ર આ જ મુદ્દે વાત કરવા માંગે છે.
ભારતીય પ્રવાસીઓ વિશે વાંધાજનક ટિપ્પણી
જ્યારે પત્રકારે તેને જણાવ્યું કે સામાન્ય કરદાતાઓ (Taxpayers) તેના વર્તનથી ખુશ નથી, ત્યારે સેવેલે ઉશ્કેરાઈને કહ્યું કે, “મને લાગે છે કે સામાન્ય ઓસ્ટ્રેલિયન નથી ઈચ્છતો કે લાખો ભારતીય પ્રવાસીઓ આ દેશમાં રહે. અમે આ જ વાતનો વિરોધ કરી રહ્યા હતા. હજારો સ્વાર્થી લોકો એવું વિચારે છે કે અમારા દેશનો ભાગ બનવો એ તેમનો અધિકાર છે.” નોંધનીય છે કે ઓસ્ટ્રેલિયાના વિકાસમાં ભારતીય પ્રવાસીઓનો મોટો ફાળો રહ્યો છે, ત્યારે આવા વિભાજનકારી નિવેદને વાતાવરણ ગરમાવ્યું છે.
હિંસાના પણ છે આરોપો
થોમસ સેવેલ પર માત્ર તેના નિવેદનો જ નહીં, પરંતુ હિંસક કૃત્યોના પણ આરોપ છે. તેના પર કેમ્પના સભ્યોને મુક્કા મારવા, લાત મારવી અને હથિયારોથી હુમલો કરવાનો પ્રયાસ કરવા જેવા ગંભીર કેસો ચાલી રહ્યા છે. ઓસ્ટ્રેલિયન સત્તાવાળાઓ આ મામલે તપાસ કરી રહ્યા છે, પરંતુ તેના આ પ્રકારના વંશીય નિવેદનોએ ઓસ્ટ્રેલિયામાં વસતા લઘુમતી સમુદાયોમાં સુરક્ષાને લઈને ચિંતા જન્માવી છે.
