કબીર ખાન માટે કાર્તિકે બદલ્યો પ્લાન! કાશ્મીરમાં શૂટિંગ પૂરું કરી હવે ‘નાગઝિલા’ના સેટ પર કરશે વાપસી
બોલિવૂડના ‘પોકેટ ડાયનેમો’ ગણાતા કાર્તિક આર્યન અત્યારે પોતાની પ્રોફેશનલ લાઈફને લઈને ભારે ચર્ચામાં છે. એક તરફ તેની છેલ્લી ફિલ્મ ‘તૂ મેરી મૈં તેરા, મૈં તેરા તૂ મેરી’ બોક્સ ઓફિસ પર ધાર્યો કરિશ્મા કરી શકી નથી, તો બીજી તરફ તેની પાસે મોટા પ્રોજેક્ટ્સની લાંબી લાઈન લાગેલી છે. આ દરમિયાન સમાચાર આવ્યા કે કાર્તિક તેની ફિલ્મ ‘નાગઝિલા’ (Nagzilla) નું શૂટિંગ અધવચ્ચે છોડીને કાશ્મીરની વાદીઓમાં પહોંચી ગયો છે.
ફેન્સના મનમાં સવાલ હતો કે આખરે એવો કયો ડાયરેક્ટર છે, જેના માટે કાર્તિકે આટલો મોટો નિર્ણય લીધો? શું તેણે ફરીથી કોઈ જૂના મિત્રનો હાથ પકડ્યો છે? ચાલો, આ સસ્પેન્સ પરથી પડદો ઉચકીએ.
કાશ્મીરમાં કોની ફિલ્મ શૂટ કરી રહ્યો છે કાર્તિક?
તાજેતરમાં કાર્તિક આર્યન કાશ્મીરના સુંદર વિસ્તાર પહેલગામમાં જોવા મળ્યો હતો. ત્યાંની બરફવર્ષા અને હસીન વાદીઓ વચ્ચે કાર્તિકે તેની એક અનામી (Untitled) ફિલ્મના પ્રથમ શિડ્યુલનું શૂટિંગ પૂરું કર્યું છે. હવે ખુલાસો થયો છે કે કાર્તિકે ફરી એકવાર તેના મનપસંદ ડાયરેક્ટર કબીર ખાન સાથે હાથ મિલાવ્યા છે.
જી હા, એ જ કબીર ખાન જેમણે કાર્તિક સાથે ‘ચંદુ ચેમ્પિયન’ જેવી યાદગાર ફિલ્મ બનાવી હતી. ભલે ચંદુ ચેમ્પિયને બોક્સ ઓફિસ પર રેકોર્ડતોડ કમાણી ન કરી હોય, પરંતુ તે ફિલ્મમાં કાર્તિકના અભિનયે વિવેચકો અને પ્રેક્ષકોના દિલ જીતી લીધા હતા. આ જ ટ્યુનિંગને જોતા કબીર ખાન અને કાર્તિક આર્યન વધુ એક મોટા પ્રોજેક્ટ માટે સાથે આવ્યા છે. આ ફિલ્મને ‘અપ્લોઝ એન્ટરટેઈનમેન્ટ’ પ્રોડ્યુસ કરી રહ્યું છે. જોકે, ફિલ્મના નામની સત્તાવાર જાહેરાત હજુ બાકી છે.
‘નાગઝિલા’ અને અનુરાગ બાસુની ફિલ્મનું શું થયું?
કાર્તિક આર્યન પાસે હાલમાં બે અન્ય મહત્વની ફિલ્મો પાઈપલાઈનમાં છે, જેને લઈને ફેન્સ ખૂબ જ ઉત્સાહિત છે:
-
નાગઝિલા (Nagzilla): આ એક ‘ક્રિચર કોમેડી’ ફિલ્મ છે, જેનું નિર્દેશન મૃગદીપ સિંહ લાંબા કરી રહ્યા છે (એ જ જેમણે ‘ફુકરે’ બનાવી છે). આ ફિલ્મને ધર્મા પ્રોડક્શન્સ અને મહાવીર જૈન મળીને બનાવી રહ્યા છે. સમાચાર છે કે કાર્તિક કાશ્મીરથી પરત આવી ગયો છે અને હવે નાગઝિલાનું બાકી રહેલું 15 દિવસનું છેલ્લું શિડ્યુલ પૂરું કરશે.
-
અનુરાગ બાસુની મ્યુઝિકલ ડ્રામા: આ ફિલ્મમાં કાર્તિક આર્યન સાથે સાઉથની સેન્સેશન શ્રીલીલા જોવા મળવાની છે. ફિલ્મનું કામ લગભગ પૂરું થઈ ગયું છે, પરંતુ તેની રિલીઝ ડેટને લઈને હજુ પણ સસ્પેન્સ યથાવત છે. અનુરાગ બાસુ અને કાર્તિકની આ જોડી પાસેથી ફેન્સને ઘણી આશા છે.
બ્રેક વગર કામ કરી રહ્યો છે કાર્તિક
કાર્તિક આર્યનની વર્ક એથિક્સની ચર્ચા આખી ઈન્ડસ્ટ્રીમાં થાય છે. કાશ્મીર શિડ્યુલ પૂરું કર્યા પછી તેની પાસે આરામ કરવાનો સમય નથી. રિપોર્ટ્સ મુજબ, કબીર ખાનની ફિલ્મનું બીજું શિડ્યુલ માર્ચમાં શરૂ થશે. આ દરમિયાન જે સમય મળ્યો છે, તેમાં કાર્તિક ‘નાગઝિલા’ પૂરી કરશે. એટલે કે એક ફિલ્મના શિડ્યુલ વચ્ચેના ગેપમાં તે બીજી ફિલ્મનું કામ પતાવી રહ્યો છે.
2026 કાર્તિકના નામે રહેવાનું છે
કુલ મળીને જોવામાં આવે તો કાર્તિક આર્યન રોકાવવાનો નથી. કાશ્મીરનું શાનદાર શિડ્યુલ પૂરું કર્યા પછી તે હવે ‘નાગઝિલા’ દ્વારા દર્શકોને ડરાવવા અને હસાવવાની તૈયારીમાં છે. માર્ચથી તે ફરી કબીર ખાનની ફિલ્મના સેટ પર પરત ફરશે.
કોઈપણ ગોડફાધર વગર ઈન્ડસ્ટ્રીમાં પોતાની જગ્યા બનાવનાર કાર્તિક આર્યને સાબિત કરી દીધું છે કે એક હિટ કે ફ્લોપ તેના ઉત્સાહને ઓછો કરી શકતી નથી. કાશ્મીરની વાદીઓમાંથી નીકળેલો આ પ્રોજેક્ટ વર્ષ 2026ની સૌથી મોટી ફિલ્મોમાંની એક હોઈ શકે છે.
