IDDRCનું ભવ્ય ઉદ્ઘાટન અને પ્રતિષ્ઠિત મહાનુભાવોની ઉપસ્થિતિ સાથે NFSUનો ઐતિહાસિક પ્રસંગ
નેશનલ ફોરેન્સિક સાયન્સિસ યુનિવર્સિટી (NFSU), ગાંધીનગરનો ચોથો દીક્ષાંત સમારોહ ૨૭ ફેબ્રુઆરી, ૨૦૨૬ના રોજ યોજાવા જઈ રહ્યો છે. આ ગરિમામય પ્રસંગે ભારતના મુખ્ય ન્યાયાધીશ (CJI) ન્યાયમૂર્તિ સૂર્યકાંત મુખ્ય અતિથિ તરીકે ઉપસ્થિત રહેશે. તેમની સાથે ગુજરાતના નાયબ મુખ્યમંત્રી હર્ષ સંઘવી અને ગુજરાત હાઈકોર્ટના મુખ્ય ન્યાયાધીશ સુનિતા અગ્રવાલ પણ અતિથિ વિશેષ તરીકે હાજરી આપશે. યુનિવર્સિટીના કુલપતિ અને પદ્મશ્રી ડૉ. જે.એમ. વ્યાસના હસ્તે વિદ્યાર્થીઓને ડિગ્રી એનાયત કરવામાં આવશે.
૧,૭૯૯ વિદ્યાર્થીઓને ડિગ્રી અને તેજસ્વીઓને ગોલ્ડ મેડલ એનાયત
આ વર્ષે દીક્ષાંત સમારોહમાં કુલ ૧,૭૯૯ વિદ્યાર્થીઓને તેમની શૈક્ષણિક સિદ્ધિ બદલ ડિગ્રી આપવામાં આવશે. જેમાં ૧૭ વિદ્યાર્થીઓ એવા છે જેમણે પીએચ.ડી. (Ph.D.) પૂર્ણ કરી છે. અભ્યાસમાં શ્રેષ્ઠ પ્રદર્શન કરનારા તેજસ્વી વિદ્યાર્થીઓને પ્રોત્સાહિત કરવા માટે ૫૨ જેટલા સુવર્ણ ચંદ્રક (ગોલ્ડ મેડલ) પણ એનાયત કરવામાં આવશે. આ કાર્યક્રમ વિદ્યાર્થીઓ અને તેમના પરિવારજનો માટે ગૌરવની ક્ષણ બની રહેશે.
આંતરરાષ્ટ્રીય ડિજિટલ વિવાદ નિવારણ કેન્દ્ર (IDDRC)નું ઉદ્ઘાટન
આ સમારોહ દરમિયાન એક ઐતિહાસિક પહેલનું પણ લોકાર્પણ કરવામાં આવશે. ભારતના મુખ્ય ન્યાયાધીશના હસ્તે ‘આંતરરાષ્ટ્રીય ડિજિટલ વિવાદ નિવારણ કેન્દ્ર’ (IDDRC)નું ઉદ્ઘાટન થશે. આ કેન્દ્ર આધુનિક ટેકનોલોજીના ઉપયોગથી કાયદાકીય વિવાદોનો ઝડપી અને પારદર્શક નિકાલ લાવવામાં મદદ કરશે. માત્ર ભારત જ નહીં, પરંતુ વૈશ્વિક સ્તરે ન્યાયિક પ્રક્રિયાને વધુ સરળ અને અસરકારક બનાવવાની દિશામાં આ એક મોટું કદમ માનવામાં આવે છે.
દેશ-વિદેશના મહાનુભાવોની ઉપસ્થિતિમાં ભવ્ય આયોજન
NFSUના આ કાર્યક્રમમાં ઝિમ્બાબ્વે અને સાઉદી અરેબિયા જેવા દેશોના પ્રતિનિધિઓ પણ હાજર રહેવાના છે. આ ઉપરાંત ભારતભરની કાયદા અમલીકરણ એજન્સીઓના ઉચ્ચ અધિકારીઓ, ન્યાયાધીશો અને શિક્ષણવિદો આ પ્રસંગના સાક્ષી બનશે. કેમ્પસ ડાયરેક્ટર પ્રો. (ડૉ.) એસ.ઓ. જુનારેએ જણાવ્યું હતું કે આ દીક્ષાંત સમારોહ ફોરેન્સિક સાયન્સ ક્ષેત્રે ભારતની વધતી જતી શક્તિનું પ્રતિક છે.
