ઈરાનની સત્તાનું સપનું જોતા રઝા પહેલવીને ટ્રમ્પનો મોટો ઝટકો: હવે શાસનની અંદરથી જ શોધવામાં આવશે નવો નેતા
ઈરાનના સુપ્રીમ લીડર અયાતુલ્લા અલી ખામેનેઈના નિધન બાદ એવી અટકળો તેજ હતી કે નિર્વાસિત જીવન જીવી રહેલા રઝા પહેલવી ફરી એકવાર ઈરાનની ગાદી સંભાળી શકે છે. જોકે, અમેરિકી રાષ્ટ્રપતિ ડોનાલ્ડ ટ્રમ્પે આ તમામ અટકળો પર વિરામ મૂકી દીધો છે. ટ્રમ્પે સ્પષ્ટ કર્યું છે કે તેમનું પ્રશાસન પહેલવીને સત્તા સોંપવાના પક્ષમાં નથી, જે પહેલવી અને તેમના સમર્થકો માટે એક મોટો રાજકીય આંચકો માનવામાં આવે છે.
પહેલવી સારા વ્યક્તિ, પણ પ્રભાવ અંગે શંકા
રાષ્ટ્રપતિ ટ્રમ્પે પોતાના તાજેતરના સંબોધનમાં જણાવ્યું હતું કે રઝા પહેલવી એક પ્રભાવશાળી અને સારા વ્યક્તિત્વ ધરાવતા માણસ છે, પરંતુ ઈરાનની જનતા તેમને સ્વીકારશે કે નહીં તે અંગે મોટો પ્રશ્ન છે. ટ્રમ્પે અગાઉ પણ સંકેત આપ્યો હતો કે દાયકાઓથી દેશની બહાર રહેલી વ્યક્તિ ઈરાનની જમીની હકીકતો અને ત્યાંના લોકોની અપેક્ષાઓ પર કેટલી ખરી ઉતરશે તે નક્કી કરવું મુશ્કેલ છે. રઝા પહેલવીના પિતા ઈરાનના છેલ્લા શાસક હતા, જેમને 1979ની ક્રાંતિ દરમિયાન સત્તા છોડવી પડી હતી.
શાસન વ્યવસ્થાની અંદરથી જ નવા નેતાની પસંદગી
ટ્રમ્પે એક મહત્વની જાહેરાત કરતા કહ્યું કે, અમેરિકા-ઈઝરાયેલ સૈન્ય અભિયાન સમાપ્ત થયા બાદ ઈરાનની સત્તા કોઈ બહારની વ્યક્તિને સોંપવાને બદલે વર્તમાન શાસન (System) ની અંદરથી જ કોઈ લાયક વ્યક્તિને શોધવામાં આવશે. ટ્રમ્પના મતે, જે લોકો પર અગાઉ ભરોસો હતો તેમાંથી ઘણા યુદ્ધમાં માર્યા ગયા છે, તેથી હવે એવા નેતાની જરૂર છે જે ઈરાની જનતાનો વિશ્વાસ જીતી શકે અને દેશમાં વિકાસના કામો કરી શકે.
લોકશાહી અને આઝાદીનો નવો યુગ
અમેરિકી રાષ્ટ્રપતિએ ભારપૂર્વક જણાવ્યું કે ઈરાનના લોકો હવે આઝાદી અને ખુલ્લા વાતાવરણમાં જીવવા માટે હકદાર છે. તેમણે કહ્યું કે, “અમે એવું નથી ઈચ્છતા કે ફરી કોઈ એવી વ્યક્તિ સત્તા પર આવે જે અગાઉના શાસકો જેવી જ ક્રૂર કે અણઘડ હોય.” જોકે, તેમણે એમ પણ ઉમેર્યું કે જો ઈરાનની જનતા પોતે જ પહેલવીને સ્વીકારે તો અમેરિકાને તેની સામે કોઈ વાંધો નથી, પરંતુ માત્ર જૂની ઓળખના આધારે કોઈને નેતૃત્વ સોંપવું યોગ્ય નથી.
પહેલવી રાજવંશની આશા પર પાણી ફરી વળ્યું
રઝા પહેલવી લાંબા સમયથી ઈરાનમાં લોકશાહીની પુનઃસ્થાપના માટે પશ્ચિમી દેશો પાસે મદદ માંગી રહ્યા હતા. ખામેનેઈ વિરુદ્ધ ઈઝરાયેલની કાર્યવાહી બાદ તેમણે ટ્રમ્પનો આભાર પણ માન્યો હતો. પરંતુ ટ્રમ્પના આ નિવેદન બાદ હવે એ સ્પષ્ટ થઈ ગયું છે કે અમેરિકા ઈરાનમાં કોઈ ‘પપેટ ગવર્નમેન્ટ’ અથવા જૂના રાજવંશને બેસાડવાને બદલે સ્થાનિક સ્તરે સ્વીકાર્ય હોય તેવા નેતૃત્વ પર દાવ ખેલવા માંગે છે.
