ભૂલથી પણ ન કરો આ કામ: કાનની સાંભળવાની શક્તિ ગુમાવી શકો છો, .જાણો કેવી રીતે રાખશો તમારા કાનનું ધ્યાન

સાવધાન! રોજિંદી આ ભૂલો તમને બનાવી શકે છે બહેરાશનો શિકાર: જાણો શું કહે છે નિષ્ણાતો

શરીરના અન્ય અંગોની જેમ કાનની સંભાળ રાખવી પણ અત્યંત જરૂરી છે. જોકે, આપણામાંથી ઘણા લોકો અજાણતા એવી ભૂલો કરે છે જે કાનની શ્રવણ શક્તિને કાયમી નુકસાન પહોંચાડી શકે છે. મેક્સ હોસ્પિટલના ઈએનટી (ENT) નિષ્ણાત ડો. સુવેન કાલરાએ કેટલીક એવી આદતો વિશે ચેતવણી આપી છે જે લાંબા ગાળે બહેરાશનું કારણ બની શકે છે.

કોટન બડ્સ અને અણીદાર વસ્તુઓનો ઉપયોગ ટાળો

મોટાભાગના લોકો સ્નાન કર્યા પછી અથવા કાનમાં ખંજવાળ આવે ત્યારે કોટન બડ્સ (Earbuds) નો ઉપયોગ કરતા હોય છે. ડો. કાલરાના જણાવ્યા મુજબ, કોટન બડ્સને ક્યારેય કાનના છિદ્રની અંદર ન નાખવા જોઈએ. આમ કરવાથી કાનનો મેલ બહાર આવવાને બદલે અંદરની તરફ ધકેલાય છે, જે બ્લોકેજ અથવા ઈન્ફેક્શનનું કારણ બને છે. આ સિવાય માચિસની સળી કે હેરપિન જેવી અણીદાર વસ્તુઓ કાનમાં નાખવી અત્યંત જોખમી સાબિત થઈ શકે છે. જો કાનમાં મેલ જમા થયો હોય, તો તેને જાતે સાફ કરવાને બદલે નિષ્ણાત ડોક્ટર પાસે જઈને સાફ કરાવવો હિતાવહ છે.

કાનમાં તેલ નાખવાની ભૂલ ન કરશો

ઘણા ઘરોમાં એવી માન્યતા હોય છે કે કાનમાં તેલ નાખવાથી ફાયદો થાય છે, પરંતુ ડોક્ટરો આ વાત સાથે સહમત નથી. કાનમાં તેલ નાખવાથી ફંગલ કે બેક્ટેરિયલ ઈન્ફેક્શન થવાનું જોખમ વધી જાય છે. ડો. કાલરા જણાવે છે કે કાનમાં કોઈપણ પ્રકારનું લિક્વિડ કે તેલ નાખતા પહેલા ડોક્ટરની સલાહ લેવી ખૂબ જ જરૂરી છે, કારણ કે તે કાનના પડદાને નુકસાન પહોંચાડી શકે છે.

મોટા અવાજ અને હેડફોનનો અતિરેક

લગ્ન-પ્રસંગોમાં ડીજેના મોટા અવાજમાં રહેવું અથવા લાંબા સમય સુધી હેડફોનનો ઉપયોગ કરવો કાન માટે હાનિકારક છે. નિષ્ણાતો ’60-60′ નો નિયમ પાળવાની સલાહ આપે છે: એટલે કે કાનમાં ઈયરફોન લગાવો ત્યારે અવાજ 60 ડેસિબલથી વધુ ન હોવો જોઈએ અને દર 60 મિનિટ પછી કાનને થોડો આરામ આપવો જોઈએ. વળી, કાનમાં દુખાવો કે પાણી નીકળવાની સમસ્યા હોય ત્યારે જાતે કોઈ પણ પેઈનકિલર દવા લેવાને બદલે ડોક્ટરનો સંપર્ક કરવો જોઈએ.

ન્યાયતંત્રમાં ડિજિટલ યુગનો પ્રારંભ: સુપ્રીમ કોર્ટે અદાલતોમાં આર્ટિફિશિયલ ઇન્ટેલિજન્સને આપી મંજૂરી

અત્યાધુનિક યુદ્ધ માટે તૈયાર ભારત: 20,000 કરોડના સ્વદેશી ડ્રોનથી સજ્જ થશે સેના

ચક્કર આવવા અને સંભળાવવામાં ઘટાડો: ગંભીર સંકેત

જો તમને અચાનક ઓછું સંભળાવા લાગે અથવા વારંવાર ચક્કર (Vertigo) આવે, તો તેને ક્યારેય નજરઅંદાજ ન કરો. ચક્કર આવવાની સમસ્યા ઘણીવાર કાનના અંદરના ભાગ (Inner Ear) સાથે જોડાયેલી હોય છે, જે શરીરનું સંતુલન જાળવવાનું કામ કરે છે. આ પ્રકારના લક્ષણો કાનની કોઈ ગંભીર બીમારીનો સંકેત હોઈ શકે છે, તેથી તુરંત ઈએનટી સ્પેશિયાલિસ્ટની મુલાકાત લેવી જોઈએ.

યાદ રાખો: કાન એ નાજુક અંગ છે, તેની યોગ્ય કાળજી જ તમને લાંબા સમય સુધી સાંભળવાની શક્તિ પ્રદાન કરશે.