‘દિલ તોડવામાં કોઈ વાંધો નથી’: ભારત સામેની ફાઈનલ પહેલા મિશેલ સેન્ટનરનું આક્રમક નિવેદન
T20 WC Final: અમદાવાદના નરેન્દ્ર મોદી સ્ટેડિયમમાં રવિવારે યોજાનારી T20 વર્લ્ડ કપ 2026ની ફાઈનલ મેચ પહેલા ન્યુઝીલેન્ડના કેપ્ટન મિશેલ સેન્ટનરે માહોલ ગરમાવી દીધો છે. ઓસ્ટ્રેલિયન કેપ્ટન પેટ કમિન્સની રણનીતિને અનુસરતા સેન્ટનરે સ્પષ્ટ કર્યું છે કે તેમનો હેતુ અમદાવાદના લાખો ભારતીય ચાહકોને ચૂપ કરાવીને ટ્રોફી જીતવાનો છે.
ન્યુઝીલેન્ડની ટીમ છેલ્લા કેટલાક વર્ષોમાં અનેકવાર ICC ટૂર્નામેન્ટની ફાઈનલમાં પહોંચી છે, પરંતુ દર વખતે તેઓ ટ્રોફી જીતવાથી વંચિત રહ્યા છે. 2019 વર્લ્ડ કપ, 2021 T20 વર્લ્ડ કપ અને 2025ની ચેમ્પિયન્સ ટ્રોફીમાં હાર બાદ હવે સેન્ટનર કોઈપણ ભોગે ન્યુઝીલેન્ડનું નસીબ બદલવા માંગે છે.
‘બેટર ટુ બી બેડ ગાઈઝ’: સેન્ટનરનો ભારતને પડકાર
પ્રી-મેચ પ્રેસ કોન્ફરન્સ દરમિયાન જ્યારે એક રિપોર્ટરે સેન્ટનરને પૂછ્યું કે શું ન્યુઝીલેન્ડ આ વખતે ‘બુરા લોકો’ (Bad Guys) બનીને અબજો ભારતીયોના દિલ તોડવા તૈયાર છે? તેના જવાબમાં સેન્ટનરે સ્મિત સાથે કહ્યું, “મને ટ્રોફી જીતવા માટે દિલ તોડવામાં કોઈ વાંધો નહીં હોય.”
તેણે વધુમાં ઉમેર્યું, “અમે જાણીએ છીએ કે અમે આ મેચમાં ફેવરિટ નથી. ભારત તેમની હોમ ગ્રાઉન્ડ પર રમી રહ્યું છે અને પ્રેશર તેમના પર છે. જો અમે અમારી નાની-નાની વસ્તુઓ બરાબર કરીશું અને એક મજબૂત ટીમ પ્રદર્શન કરીશું, તો અમે ટ્રોફી જીતવા માટે સારી સ્થિતિમાં હોઈશું. ભારતની પાર્ટી ખરાબ કરવામાં અમને કોઈ વાંધો નથી.”
‘લક્ષ્ય ભીડને શાંત કરવાનું છે’
સેન્ટનરે 2023ના વનડે વર્લ્ડ કપ ફાઈનલની યાદ અપાવતા કહ્યું કે તેમનું લક્ષ્ય સ્ટેડિયમમાં હાજર 1.3 લાખથી વધુ ચાહકોને શાંત કરવાનું હશે. તેણે કહ્યું, “ટી20 ક્રિકેટમાં ઘણા ચલ (variables) હોય છે અને પરિણામ ક્ષણવારમાં બદલાઈ શકે છે. ભારત પર પોતાના ઘરે વર્લ્ડ કપ જીતવાનું ભારે દબાણ છે. જો અમે શરૂઆતથી જ તેમના પર એક્સ્ટ્રા પ્રેશર બનાવી શકીએ, તો રમત ગમે ત્યારે પલટાઈ શકે છે.”
ન્યુઝીલેન્ડે સેમીફાઈનલમાં દક્ષિણ આફ્રિકા જેવી મજબૂત ટીમને હરાવીને ફાઈનલમાં પ્રવેશ કર્યો છે. ફિન એલનની શાનદાર સદીએ કિવી ટીમના આત્મવિશ્વાસમાં વધારો કર્યો છે.
