મધ, નાગલી અને હસ્તનિર્મિત ઉત્પાદનો દ્વારા મહિલા સશક્તિકરણનું મોડેલ ઉભું કરનાર સોલધરા ગામની અસ્મિતાબેન
નવસારી જિલ્લાના ચિખલી તાલુકાના સોલધરા ગામના અસ્મિતાબેન અશોકભાઈ પટેલે “સ્ત્રી શક્તિ એ સમાજની સાચી શક્તિ” સૂત્રને સાર્થક કરી બતાવ્યું છે. એક સામાન્ય ખેડૂત પરિવારમાં ઉછરેલા અસ્મિતાબેને પિતાના અવસાન અને આર્થિક તંગી જેવી મુશ્કેલીઓનો મક્કમતાથી સામનો કર્યો. વર્ષ ૨૦૧૦-૧૧માં તેમણે મધ-ઉછેરનો કોર્સ કર્યો અને ઘરઆંગણે જ મધનું ઉત્પાદન શરૂ કર્યું. આજે તેઓ વાર્ષિક રૂ. ૧૦.૨૦ લાખની આવક મેળવી ‘લખપતિ દીદી’ બન્યા છે અને અન્ય ૧૦ મહિલાઓને પણ રોજગારી પૂરી પાડી આત્મનિર્ભર બનાવી છે.
‘સહ્યાદ્રી સખી મંડળ’ દ્વારા પ્રાકૃતિક ઉત્પાદનોનું સફળ નિર્માણ
અસ્મિતાબેને વર્ષ ૨૦૧૫માં ‘સહ્યાદ્રી સખી મંડળ’ની સ્થાપના કરી, જેમાં શરૂઆતમાં અથાણાં અને મોસમી વાનગીઓ બનાવવામાં આવતી હતી. ‘મિશન મંગલમ’ યોજના હેઠળ મળેલી આર્થિક સહાયથી તેમણે નાગલી (રાગી) ના પાપડ, બિસ્કિટ અને વેફર જેવા પૌષ્ટિક ઉત્પાદનો શરૂ કર્યા. વ્યવસાયને વિસ્તૃત કરવા માટે તેમણે હળદર પ્રોસેસિંગ મશીન ખરીદ્યું અને શુદ્ધ હળદર પાવડરનું વેચાણ શરૂ કર્યું. આજે આ મંડળ દ્વારા બનાવાયેલી વસ્તુઓ રાજ્ય અને રાષ્ટ્રીય કક્ષાના પ્રદર્શનોમાં આકર્ષણનું કેન્દ્ર બને છે.
રાષ્ટ્રીય સ્તરે સન્માન અને વાઇબ્રન્ટ ગુજરાત કોન્ફરન્સની નવી તકો
અસ્મિતાબેનના શ્રેષ્ઠ કાર્યની નોંધ લઈને ગુજરાત સરકાર દ્વારા તેમને “કૃષિ રત્ન પુરસ્કાર” અને જિલ્લા કક્ષાએ “આત્મા એવોર્ડ” એનાયત કરવામાં આવ્યો છે. તેમને ત્રણ વખત વડાપ્રધાન નરેન્દ્ર મોદીને મળવાનું બહુમાન પણ પ્રાપ્ત થયું છે. આગામી એપ્રિલ ૨૦૨૬માં સુરત ખાતે યોજાનારી ‘વાઇબ્રન્ટ ગુજરાત રીજનલ કોન્ફરન્સ’ (VGRC) માં અસ્મિતાબેન જેવા ગ્રામીણ ઉદ્યોગકારોને પોતાના ઉત્પાદનો વૈશ્વિક બજારમાં પ્રદર્શિત કરવાની નવી તક મળશે, જે તેમના વ્યવસાયને નવી ઊંચાઈ પર લઈ જશે.
મહિલા સશક્તિકરણ અને ગ્રામીણ અર્થતંત્રનું અનોખું મોડેલ
અસ્મિતાબેન ગર્વથી કહે છે કે તેમનું સખી મંડળ એક મજબૂત વૃક્ષ જેવું છે જેના મૂળ એકતામાં રહેલા છે. આ સફર માત્ર વ્યક્તિગત સફળતા નથી, પરંતુ તે સાબિત કરે છે કે જ્યારે ગ્રામીણ મહિલાઓ એકસાથે જોડાય છે ત્યારે તે આખા સમાજની પ્રગતિનું કારણ બને છે. વાંસના હસ્તકલા ઉત્પાદનો, આમળાની કેન્ડી અને મધ પ્રોસેસિંગ જેવા કાર્યો દ્વારા તેમણે સ્થાનિક સંસાધનોનો શ્રેષ્ઠ ઉપયોગ કર્યો છે. આંતરરાષ્ટ્રીય મહિલા દિવસે અસ્મિતાબેન જેવી શક્તિશાળી બહેનો ખરેખર સમાજમાં પરિવર્તનનું નવું પ્રકરણ લખી રહી છે.
