IPL 2026: ગુજરાત ટાઇટન્સમાં ઓસ્ટ્રેલિયન દિગ્ગજની એન્ટ્રી, વિશ્વ વિજેતા ખેલાડી બન્યો ટીમનો નવો બેટિંગ કોચ
આઈપીએલ ૨૦૨૬નું કાઉન્ટડાઉન શરૂ થઈ ગયું છે. ભલે હજુ સુધી ભારતીય ક્રિકેટ કંટ્રોલ બોર્ડ (BCCI) દ્વારા સત્તાવાર શિડ્યુલ જાહેર કરવામાં આવ્યું નથી, પરંતુ તમામ ફ્રેન્ચાઇઝીઓએ પોતાની તૈયારીઓને આખરી ઓપ આપવાનું શરૂ કરી દીધું છે. આ દરમિયાન સમાચાર મળી રહ્યા છે કે ભૂતપૂર્વ ચેમ્પિયન ગુજરાત ટાઇટન્સે (GT) ઓસ્ટ્રેલિયાના દિગ્ગજ ઓપનર મેથ્યુ હેડનને ટીમના નવા બેટિંગ કોચ તરીકે નિયુક્ત કરવાનો નિર્ણય લીધો છે.
૨૮ માર્ચથી શરૂ થઈ શકે છે નવો સીઝન
IPL ૨૦૨૬ આ મહિનાના અંતમાં શરૂ થવાની પૂરેપૂરી શક્યતા છે. સૂત્રોના જણાવ્યા અનુસાર, ૨૮ માર્ચના રોજ સિઝનનો પ્રથમ મુકાબલો રમાઈ શકે છે. આગામી એક-બે દિવસમાં BCCI દ્વારા સંપૂર્ણ શિડ્યુલની જાહેરાત કરવામાં આવે તેવી આશા છે. આ મહત્વની ટુર્નામેન્ટ પહેલા ગુજરાત ટાઇટન્સે પોતાનો કોચિંગ સ્ટાફ મજબૂત કરીને અન્ય ટીમો માટે ખતરાની ઘંટડી વગાડી દીધી છે.
મેથ્યુ હેડનનો બહોળો અનુભવ ટીમ માટે સંજીવની
મેથ્યુ હેડન ઓસ્ટ્રેલિયાની તે સુવર્ણ પેઢીના ખેલાડી છે જેણે ૨૦૦૩ અને ૨૦૦૭માં વનડે વર્લ્ડ કપ જીત્યો હતો. તેમની પાસે આક્રમક બેટિંગનો વિશાળ અનુભવ છે. હેડન અગાઉ ૨૦૨૨ના T20 વર્લ્ડ કપ દરમિયાન પાકિસ્તાની ટીમના બેટિંગ કોચ અને મેન્ટર તરીકે પણ સેવા આપી ચૂક્યા છે. તેમની આક્રમક રણનીતિ અને માનસિક મજબૂતીનો સીધો ફાયદો હવે શુભમન ગિલની આગેવાની વાળી ગુજરાત ટાઇટન્સના બેટ્સમેનોને મળશે.
ધોનીની ટીમમાં રહી ચૂક્યા છે ચેમ્પિયન
મેથ્યુ હેડન માટે IPL કોઈ નવી વાત નથી. તેઓ એમએસ ધોનીની કપ્તાની હેઠળ ચેન્નાઈ સુપર કિંગ્સ (CSK) માટે વર્ષો સુધી ઓપનિંગ કરી ચૂક્યા છે. ૨૦૧૦માં જ્યારે CSK પ્રથમ વખત ચેમ્પિયન બન્યું ત્યારે હેડન તે ટીમના મહત્વના સભ્ય હતા. હવે તેઓ ગુજરાત ટાઇટન્સના ડ્રેસિંગ રૂમમાં આશિષ નેહરા સાથે મળીને રણનીતિ બનાવતા જોવા મળશે.
આશિષ નેહરા અને હેડનની જોડી પર નજર
ગુજરાત ટાઇટન્સે ૨૦૨૨માં ડેબ્યૂ સિઝનમાં જ હાર્દિક પંડ્યાની કપ્તાનીમાં ખિતાબ જીતીને બધાને ચોંકાવી દીધા હતા. ત્યારબાદ ૨૦૨૩માં ટીમ ફાઈનલ સુધી પહોંચી હતી. જોકે, હાર્દિક પંડ્યાના ગયા પછી ટીમનું પ્રદર્શન ગત સિઝનમાં થોડું નબળું રહ્યું હતું. હેડ કોચ આશિષ નેહરા પોતાની જવાબદારી સંભાળી રહ્યા છે, પરંતુ બેટિંગમાં જોવા મળતી ખામીઓને દૂર કરવા માટે હેડન જેવી વ્યક્તિની જરૂર હતી.
