કીવી ટીમની જાહેરાત દક્ષિણ આફ્રિકા સામેની શ્રેણી માટે સ્ટાર ખેલાડીઓની વાપસી, 15 માર્ચથી જામશે જંગ
ન્યૂઝીલેન્ડ ક્રિકેટ જગતમાંથી એક મોટા સમાચાર સામે આવ્યા છે. દક્ષિણ આફ્રિકા સામે રમાનારી 5 મેચોની T20I શ્રેણી માટે ન્યૂઝીલેન્ડની મહિલા ટીમની જાહેરાત કરવામાં આવી છે. આ ટીમમાં અનુભવી ખેલાડીઓ સોફી ડિવાઈન, સુઝી બેટ્સ અને ફાસ્ટ બોલર લી તાહુહુની વાપસી થઈ છે, જે આગામી ICC વુમેન્સ T20 વર્લ્ડ કપની તૈયારીઓ કરી રહેલી કીવી ટીમ માટે મોટી રાહત સમાન છે.
દિગ્ગજ ખેલાડીઓનું પુનરાગમન
સોફી ડિવાઈન ઝિમ્બાબ્વે સામેની છેલ્લી શ્રેણીમાં ઉપલબ્ધ નહોતી, કારણ કે તે ન્યૂઝીલેન્ડ ક્રિકેટ સાથે કેઝ્યુઅલ કોન્ટ્રાક્ટ પર છે. બીજી તરફ, સુઝી બેટ્સ ઈજાને કારણે ટીમની બહાર હતી, જે હવે સંપૂર્ણ ફિટ થઈ ગઈ છે. ફાસ્ટ બોલર લી તાહુહુએ તાજેતરમાં જ વનડે ક્રિકેટમાંથી નિવૃત્તિ જાહેર કરી હતી અને તેને વર્લ્ડ કપની તૈયારીઓના ભાગરૂપે આરામ આપવામાં આવ્યો હતો. જોકે, તાહુહુ પ્રથમ બે મેચમાં રમશે નહીં, તે માત્ર છેલ્લી ત્રણ T20 મેચો માટે ઉપલબ્ધ રહેશે.
કોચ બેન સોયરે વ્યક્ત કરી ખુશી
ખેલાડીઓની વાપસી પર મુખ્ય કોચ બેન સોયરે આનંદ વ્યક્ત કરતા જણાવ્યું હતું કે, “અમે સુઝી અને સોફીનું ટીમમાં ફરીથી સ્વાગત કરવા માટે ઉત્સાહિત છીએ. મેદાન પર તેમની રમત તો અદભૂત છે જ, પરંતુ ટીમની સંસ્કૃતિ અને માહોલમાં તેમનું યોગદાન પણ અમારા માટે અત્યંત મહત્વનું છે. અમને આશા છે કે તેઓ યુવા ખેલાડીઓ સાથે સારું તાલમેલ સાધશે.”
જ્યોર્જિયા પ્લિમેર અને ફ્લોરા ડેવોનશાયર પણ ફિટ
ટીમ માટે અન્ય એક સારા સમાચાર એ છે કે ઓપનર જ્યોર્જિયા પ્લિમેર પણ ખભાની ઈજામાંથી મુક્ત થઈને ટીમમાં પરત ફરી છે. પ્લિમેર અને સુઝી બેટ્સ ન્યૂઝીલેન્ડની નિયમિત ઓપનિંગ જોડી છે. આ ઉપરાંત, 23 વર્ષીય ઓલરાઉન્ડર ફ્લોરા ડેવોનશાયર પણ આંગળીની ઈજામાંથી ઉભરીને ટીમમાં પરત આવી છે. ડેવોનશાયર પણ તાહુહુની જેમ માત્ર અંતિમ ત્રણ મેચો માટે જ ઉપલબ્ધ રહેશે.
ડબલ હેડર તરીકે રમાશે શ્રેણી
ન્યૂઝીલેન્ડ અને દક્ષિણ આફ્રિકા વચ્ચે પાંચ મેચોની T20 શ્રેણી 15 માર્ચથી ‘બે ઓવલ’ ખાતે શરૂ થશે. આ શ્રેણી પુરુષ ટીમોના મુકાબલા સાથે ડબલ હેડર તરીકે રમાશે. અમેલિયા કેર પૂર્ણકાલીન કેપ્ટન બન્યા બાદ ન્યૂઝીલેન્ડની આ બીજી T20I શ્રેણી હશે.
T20I શ્રેણી માટે ન્યૂઝીલેન્ડની મહિલા ટીમ:
અમેલિયા કેર (કેપ્ટન), સુઝી બેટ્સ, સોફી ડિવાઈન, ફ્લોરા ડેવોનશાયર (માત્ર અંતિમ 3 મેચ), ઇસાબેલા ગેઝ, મેડી ગ્રીન, બ્રુક હોલિડે, બ્રી ઇલિંગ (પ્રથમ 2 મેચ), પોલી ઇંગ્લિસ (પ્રથમ 2 મેચ), જેસ કેર, રોઝમેરી મેયર, નેન્સી પટેલ, જ્યોર્જિયા પ્લિમેર, ઇઝી શાર્પ, લી તાહુહુ (માત્ર અંતિમ 3 મેચ).
