પોરબંદરમાં વહીવટ, રમતગમત, વન વિભાગ સહિત વિવિધ ક્ષેત્રે મહિલાઓ બની રહી છે સશક્તિકરણનું પ્રતિક
પોરબંદર જિલ્લાનું વહીવટી તંત્ર નારીશક્તિના ગૌરવવંતા ઉદાહરણો પૂરા પાડી રહ્યું છે. જિલ્લાની મહિલાઓ માત્ર ઘરના ઉંબરા સુધી મર્યાદિત ન રહેતા શિક્ષણ, વહીવટ, કાયદો અને વ્યવસ્થા તેમજ રમતગમત જેવા અનેક ક્ષેત્રોમાં પોતાની પ્રતિભા સાબિત કરી રહી છે. સરકારી યોજનાઓના અસરકારક અમલીકરણ અને મક્કમ નિર્ધારને કારણે આજે પોરબંદરની અનેક મહિલા અધિકારીઓ સમાજ માટે એક નવી રાહ ચીંધી રહી છે.
વહીવટ અને સાહિત્યનો અનોખો સંગમ: રેખાબા સરવૈયા
પોરબંદર જિલ્લાના નિવાસી અધિક કલેક્ટર (RAC) રેખાબા સરવૈયા રાજપૂત સમાજના પ્રથમ મહિલા એડિશનલ કલેક્ટર બનવાનું બહુમાન ધરાવે છે. તેઓ માત્ર એક કુશળ વહીવટી અધિકારી જ નથી, પરંતુ એક જાણીતા સાહિત્યકાર પણ છે. વિજ્ઞાન અને પત્રકારત્વમાં ઉચ્ચ શિક્ષણ મેળવનાર રેખાબાએ ‘રેત પર લખાયેલ અક્ષર’ અને ‘ખોબામાં દરિયો’ જેવા અનેક પુસ્તકો દ્વારા સાહિત્ય જગતમાં પોતાની ઓળખ બનાવી છે. આકાશવાણીમાં સેવાઓ આપવાથી લઈને સાહિત્યિક એવોર્ડ મેળવવા સુધીની તેમની સફર અન્ય મહિલાઓ માટે અત્યંત પ્રેરણાદાયી છે.
સુરક્ષા અને પર્યાવરણના રક્ષણમાં મહિલાઓનું પ્રદાન
જિલ્લામાં કાયદો અને વ્યવસ્થા જાળવવાની જવાબદારી નાયબ પોલીસ અધિક્ષક (DySP) ઋતુબા રાબા સંભાળી રહ્યા છે, જેમની નિષ્ઠા મહિલાઓમાં આત્મવિશ્વાસ જગાડે છે. તેવી જ રીતે, વન વિભાગમાં રાજલબેન પાઠકે ગુજરાતના પ્રથમ મહિલા રેન્જ ફોરેસ્ટ ઓફિસર (RFO) તરીકે ઈતિહાસ રચ્યો છે. વાઈલ્ડલાઈફ બાયોલોજીમાં નિષ્ણાત રાજલબેન હાલમાં આસિસ્ટન્ટ કન્ઝર્વેટર ઓફ ફોરેસ્ટ (ACF) તરીકે વન્યજીવોના સંરક્ષણ માટે મહત્વની કામગીરી કરી રહ્યા છે. આ બંને અધિકારીઓ દર્શાવે છે કે સાહસિક ક્ષેત્રોમાં પણ મહિલાઓ સર્વોપરી છે.
શિક્ષણ અને ટેકનિકલ ક્ષેત્રે મેળવેલી સફળતા
કુતિયાણાના પ્રાંત અધિકારી નેહા સોજીત્રાએ સિવિલ એન્જિનિયરિંગનો અભ્યાસ કર્યા બાદ પોતાની મહેનતથી નાયબ કલેક્ટર સુધીની મજલ કાપી છે. તેમની વહીવટી સૂઝબૂઝ લોકોના પ્રશ્નો ઉકેલવામાં મદદરૂપ થઈ રહી છે. બીજી તરફ, રમતગમત ક્ષેત્રે ડૉ. પ્રવીણા પાંડાવડરાએ જુડોમાં રાષ્ટ્રીય સ્તરે અનેક મેડલ જીતીને પોરબંદરનું નામ રોશન કર્યું છે. હાલમાં તેઓ જિલ્લા રમતગમત અધિકારી તરીકે યુવા ખેલાડીઓને તૈયાર કરી રહ્યા છે, જે રમતગમત પ્રત્યેની તેમની અતૂટ શ્રદ્ધા દર્શાવે છે.
કૃષિ અને બાગાયતના વિકાસમાં મહિલા નેતૃત્વ
ખેતી અને બાગાયત ક્ષેત્રે પણ મહિલા અધિકારીઓનું યોગદાન નોંધપાત્ર છે. જિલ્લા બાગાયત અધિકારી કલ્પના જે. પંચાલ ખેડૂતોને આધુનિક ખેતી પદ્ધતિઓ અપનાવવા પ્રોત્સાહિત કરી રહ્યા છે, જ્યારે આત્મા વિભાગના ડાયરેક્ટર સીમા શર્મા પ્રાકૃતિક ખેતીના વ્યાપને વધારવા માટે કાર્યરત છે. સાથોસાથ જિલ્લા મહિલા અને બાળ અધિકારી હંસાબેન ટાઢાણી મહિલા કલ્યાણની યોજનાઓને ઘર-ઘર સુધી પહોંચાડી રહ્યા છે. આ તમામ મહિલા અધિકારીઓ પોરબંદર જિલ્લાના સર્વાંગી વિકાસના મજબૂત સ્તંભો છે.
