મહિલાઓને ન્યાય માટે ‘આયોગ આપને દ્વાર’ અભિયાન હેઠળ વડોદરામાં જનસુનાવણી
આંતરરાષ્ટ્રીય મહિલા દિવસની ઉજવણીના ભાગરૂપે વડોદરાના સર્કિટ હાઉસ ખાતે રાષ્ટ્રીય મહિલા આયોગના અધ્યક્ષ શ્રીમતી વિજયા રહાટકરના અધ્યક્ષસ્થાને ‘મહિલા મહાજનસુનાવણી’ યોજાઈ હતી. આ વિશેષ કાર્યક્રમમાં વડોદરા શહેર અને ગ્રામ્ય વિસ્તારના કુલ ૧૫ જેટલા જટિલ કેસોની સુનાવણી હાથ ધરવામાં આવી હતી. જેમાંથી ૧૨ કેસોનો સ્થળ પર જ સફળતાપૂર્વક નિકાલ કરવામાં આવ્યો હતો, જ્યારે બાકીના કેસોને વધુ તપાસ અને કાયદાકીય પ્રક્રિયા માટે આગળ મોકલવામાં આવ્યા હતા.
‘આયોગ આપને દ્વાર’ અભિગમ: મહિલાઓને ઘરઆંગણે ન્યાય
અધ્યક્ષ શ્રીમતી વિજયા રહાટકરે આ પ્રસંગે જણાવ્યું હતું કે, ઘણી મહિલાઓ વિવિધ કારણોસર દિલ્હી સ્થિત આયોગની કચેરી સુધી પહોંચી શકતી નથી. આ સમસ્યાના ઉકેલ રૂપે ‘આયોગ આપને દ્વાર’ અભિગમ અપનાવવામાં આવ્યો છે, જેથી પીડિત મહિલાઓને તેમના જ જિલ્લામાં ન્યાય મળી રહે. તેમણે વધુમાં ઉમેર્યું કે છેલ્લા એક વર્ષમાં દેશભરમાં ૧૦૦ જેટલી જનસુનાવણીઓ કરવામાં આવી છે અને આગામી એક અઠવાડિયામાં વિવિધ જિલ્લાઓમાં વધુ ૫૦૦ સુનાવણીઓ પૂર્ણ કરવાનું લક્ષ્ય રાખવામાં આવ્યું છે.
ઘરેલું હિંસા અને શોષણ સામે કાયદાકીય માર્ગદર્શન અને સહાય
આ જનસુનાવણીનો મુખ્ય ઉદ્દેશ્ય મહિલાઓને ઘરેલું હિંસા, કાર્યસ્થળે જાતીય સતામણી, માનવ તસ્કરી અને અન્ય અન્યાય સામે અવાજ ઉઠાવવા માટે એક સરળ મંચ પૂરું પાડવાનો છે. સુનાવણી દરમિયાન પોલીસ અધિકારીઓ, કાયદાકીય નિષ્ણાતો અને પ્રોટેક્શન ઓફિસરોએ મહિલાઓને માત્ર સાંભળી જ નહીં, પરંતુ તેમને જરૂરી કાનૂની માર્ગદર્શન અને ભાવનાત્મક ટેકો પણ પૂરો પાડ્યો હતો. ગુજરાત રાજ્યમાં નોંધાયેલા અન્ય પેન્ડિંગ કેસો પર પણ આગામી સમયમાં ઝડપી કાર્યવાહી કરવાની ખાતરી આયોગ દ્વારા આપવામાં આવી હતી.
