જિલ્લા પ્રાથમિક શિક્ષણ અધિકારી એમ. આર. પાંડેના પ્રયાસોથી 2012થી 2018 બેચના મુખ્ય શિક્ષકોને આદેશપત્રો એનાયત
વડોદરા જિલ્લાની સરકારી શાળાઓમાં ફરજ બજાવતા મુખ્ય શિક્ષકો માટે આજનો દિવસ ઐતિહાસિક અને આનંદનો રહ્યો છે. છેલ્લા ઘણા લાંબા સમયથી એચ-ટાટ (H-TAT) પાસ કરીને મુખ્ય શિક્ષક તરીકે નિમણૂક કે હુકમની રાહ જોઈ રહેલા શિક્ષકોની પ્રતિક્ષાનો અંત આવ્યો છે. વડોદરા જિલ્લા શિક્ષણ વિભાગ દ્વારા આ શિક્ષકોના પડતર પ્રશ્નોને ગંભીરતાથી લઈને તેના ઉકેલ માટે સકારાત્મક કામગીરી કરવામાં આવી છે, જેના પરિણામે વર્ષોથી અટવાયેલી પ્રક્રિયા ગતિમાં આવી હતી.
ખાસ કરીને વર્ષ ૨૦૧૨, ૨૦૧૪, ૨૦૧૬ અને ૨૦૧૮માં મુખ્ય શિક્ષક તરીકે ભરતી થયેલા ઉમેદવારો આ પ્રક્રિયા પૂર્ણ થવાની રાહ જોઈ રહ્યા હતા. આ શિક્ષકો પોતાની લાયકાત હોવા છતાં ટેકનિકલ કે વહીવટી કારણોસર ચોક્કસ આદેશ પત્રો મેળવી શક્યા નહોતા. વડોદરા જિલ્લા પ્રાથમિક શિક્ષણાધિકારી એમ. આર. પાંડેના અંગત રસ અને સતત પ્રયાસોને કારણે આ કાનૂની અને વહીવટી ગૂંચ ઉકેલાઈ છે, જે બદલ શિક્ષકોમાં રાહતની લાગણી જોવા મળી રહી છે.
આજે આયોજિત એક કાર્યક્રમમાં જિલ્લા શિક્ષણ વિભાગ દ્વારા કુલ ૧૬૧ મુખ્ય શિક્ષકોને આદેશ હુકમ પત્રો વિધિવત રીતે એનાયત કરવામાં આવ્યા હતા. આ હુકમ પત્રો મળતાની સાથે જ શિક્ષકોનો લાંબાગાળાનો માનસિક અને વ્યાવસાયિક પ્રશ્ન હલ થયો છે. અધિકારીઓએ પણ આ પ્રસંગે શિક્ષકોને અભિનંદન પાઠવ્યા હતા અને જણાવ્યું હતું કે શિક્ષકોના હિતમાં લેવાયેલો આ નિર્ણય જિલ્લાના શિક્ષણના સ્તરને વધુ ઊંચું લાવવામાં મદદરૂપ સાબિત થશે.
નિમણૂક પત્રો મળતાની સાથે જ હવે આ ૧૬૧ મુખ્ય શિક્ષકો પૂરા આત્મવિશ્વાસ અને નવી ઉર્જા સાથે શાળાઓમાં પોતાનું શૈક્ષણિક અને વહીવટી કાર્ય સંભાળી શકશે. શિક્ષકોએ પણ જિલ્લા શિક્ષણ તંત્રનો આભાર માનતા જણાવ્યું હતું કે આ હુકમથી તેમને મળવાપાત્ર લાભો અને હકો હવે સુનિશ્ચિત થયા છે. આ સફળ આયોજનને કારણે જિલ્લાની સરકારી પ્રાથમિક શાળાઓના વહીવટી માળખામાં પણ નવી મજબૂતી આવશે અને વિદ્યાર્થીઓને તેનો સીધો લાભ મળશે.
