માં શૈલપુત્રીને ધરાવો બટાકાના શીરાનો ભોગ, જાણો ઝટપટ બની જતી આ ફરાળી રેસીપી
નવરાત્રિનો પ્રથમ દિવસ માં શૈલપુત્રીને સમર્પિત હોય છે. આ વર્ષે ચૈત્ર નવરાત્રિની શરૂઆત 19 માર્ચ, ગુરુવારથી થઈ રહી છે. નવરાત્રિના પ્રથમ દિવસે માતાજીના સ્વાગત માટે અને પ્રસાદ તરીકે બટાકાનો શીરો એક ઉત્તમ વિકલ્પ છે. આ શીરો બનાવવામાં જેટલો સરળ છે, ખાવામાં તેટલો જ સ્વાદિષ્ટ લાગે છે. ઉપવાસમાં ફરાળ તરીકે પણ આ વાનગી ખૂબ જ લોકપ્રિય છે.
બટાકાનો શીરો બનાવવા માટેની જરૂરી સામગ્રી
સ્વાદિષ્ટ અને ફરાળી શીરો બનાવવા માટે નીચે મુજબની સામગ્રી તૈયાર રાખો
- બટાકા: 3 મધ્યમ કદના (બાફેલા)
- ઘી: 3 મોટી ચમચી
- ખાંડ: અડધો કપ (અથવા સ્વાદ મુજબ)
- દૂધ: 1 કપ
- ઈલાયચી પાવડર: અડધી નાની ચમચી
- ડ્રાય ફ્રૂટ્સ: 2-2 ચમચી (કાજુ, બદામ, પિસ્તાના ટુકડા)
બટાકાનો શીરો બનાવવાની રીત
બટાકાનો શીરો બનાવવાની પ્રક્રિયા ખૂબ જ ઝડપી છે, જે તમે પૂજાની તૈયારીની સાથે પણ બનાવી શકો છો:
1. બટાકા તૈયાર કરવા:
સૌ પ્રથમ બટાકાને બાફી લો. ત્યારબાદ તેને છોલીને એક પ્લેટમાં બરાબર મેશ કરી લો (કાંટા ચમચી કે મેશરની મદદથી ગઠ્ઠા ન રહે તે રીતે દબાવી લો).
2. શેકવાની પ્રક્રિયા:
એક કડાઈમાં ઘી ગરમ કરવા મૂકો. ઘી ગરમ થાય એટલે તેમાં મેશ કરેલા બટાકા ઉમેરો. મધ્યમ આંચ પર બટાકાને સતત હલાવતા રહો. જ્યારે બટાકામાંથી સરસ સુગંધ આવવા લાગે અને તેનો રંગ હળવો ગોલ્ડન બ્રાઉન જેવો દેખાય ત્યારે તેમાં દૂધ ઉમેરો.
3. ખાંડ અને મસાલા:
બટાકા અને દૂધ એકરસ થઈ જાય અને મિશ્રણ ઘટ્ટ થવા લાગે એટલે તેમાં ખાંડ ઉમેરીને બરાબર મિક્સ કરો. જ્યારે ખાંડ ઓગળી જાય અને શીરો કડાઈની સપાટી છોડવા લાગે, ત્યારે તેમાં ઈલાયચી પાવડર અને અડધા ડ્રાય ફ્રૂટ્સ ઉમેરો.
4. સર્વિંગ:
જ્યારે શીરો સાઈડમાંથી ઘી છોડવા લાગે ત્યારે સમજી લેવું કે તે તૈયાર છે. ગેસ બંધ કરી દો. તૈયાર શીરાને સર્વિંગ બાઉલમાં કાઢી ઉપરથી બાકીના ડ્રાય ફ્રૂટ્સથી ગાર્નિશ કરો.
સ્વાદ વધારવા માટેની ખાસ ટિપ્સ
માવાનો ઉપયોગ: જો તમે શીરાનો સ્વાદ વધુ રિચ અને શાહી બનાવવા માંગતા હોવ, તો દૂધને બદલે માવાનો ઉપયોગ કરી શકાય છે.
ગોળનો વિકલ્પ: સ્વાસ્થ્ય પ્રત્યે જાગૃત લોકો ખાંડના સ્થાને ગોળનો ઉપયોગ કરી શકે છે, જેનાથી શીરાનો સ્વાદ અને રંગ બંને વધુ સરસ આવશે.
કેસર: દૂધમાં થોડું કેસર પલાળીને ઉમેરવાથી શીરામાં કુદરતી પીળો રંગ અને અદભૂત સુગંધ આવશે.
