મિડલ ઈસ્ટ પરિસ્થિતિ વચ્ચે વડોદરામાં ગેસ અછતની અફવા ખોટી સાબિત, તંત્રની સમયસર કાર્યવાહીથી સ્થિતિ કાબૂમાં

પેનિક બુકિંગમાં ઘટાડો, તંત્ર અને નાગરિકોના સહકારથી વડોદરામાં ગેસ વિતરણ વ્યવસ્થા સ્થિર

મિડલ ઈસ્ટની ભૌગોલિક પરિસ્થિતિને ટાંકીને સોશિયલ મીડિયા પર ગેસની અછત અંગેના ખોટા વીડિયો વાયરલ થતા વડોદરા સહિત સમગ્ર રાજ્યમાં ગભરાટ ફેલાયો હતો. આ અફવાઓને કારણે ગેસ એજન્સીઓ પર લાંબી લાઈનો લાગી હતી અને લોકો ગભરાટમાં આવીને બિનજરૂરી ‘પેનિક બુકિંગ’ કરવા લાગ્યા હતા. જોકે, વડોદરા જિલ્લા વહીવટી તંત્રે આ સ્થિતિને ગંભીરતાથી લઈને તાત્કાલિક પગલાં ભર્યા હતા. અનઅધિકૃત જથ્થો જપ્ત કરી, અફવા ફેલાવનારા અને વધુ પૈસા પડાવતા એજન્ટો વિરુદ્ધ કડક કાર્યવાહી કરવામાં આવતા પરિસ્થિતિ હવે નિયંત્રણ હેઠળ આવી છે.

પારદર્શક માહિતી અને હેલ્પલાઇન દ્વારા નાગરિકોમાં જાગૃતિ

વહીવટી તંત્ર દ્વારા ગેસના સ્ટોક અંગે સમયાંતરે પારદર્શક માહિતી આપવા માટે હેલ્પલાઇન નંબર જાહેર કરવામાં આવ્યો હતો. તંત્રની સતત અપીલ અને જનજાગૃતિના પ્રયાસોને કારણે હવે પેનિક બુકિંગમાં મોટો ઘટાડો નોંધાયો છે. આજના દિવસે હેલ્પલાઇન પર માત્ર ૬૨ ઇન્ક્વાયરી આવવી એ બાબતની સાક્ષી પૂરે છે કે લોકોમાં હવે તંત્ર પ્રત્યે વિશ્વાસ વધ્યો છે. વડોદરાના એક જાગૃત નાગરિક ભૂપેન્દ્રભાઈ શાહે પણ લોકોને અપીલ કરી છે કે જે ગ્રાહકો પાસે ગેસ પાઇપલાઇન કનેક્શન હોય, તેમણે વધારાના સિલિન્ડર જમા કરાવી દેવા જોઈએ જેથી જરૂરિયાતમંદોને મદદ મળી રહે.

એજન્સીઓ પર સ્થિતિ સામાન્ય અને પૂરતો પુરવઠો ઉપલબ્ધ

વડોદરાની ગેસોલીટ ગેસ એજન્સીના મેનેજર મિતેશ પટેલે સ્પષ્ટતા કરી છે કે ગેસ સિલિન્ડરની કોઈ અછત નથી અને પુરવઠો નિયમિત રીતે આવી રહ્યો છે. ગ્રાહકોના બુકિંગ મુજબ ઘરે બેઠા ડિલિવરી કરવાની વ્યવસ્થા કાર્યરત છે, તેથી નાગરિકોએ ખોટી ઉતાવળ કે ગભરાટમાં આવી બુકિંગ કરાવવું નહીં. વહીવટી તંત્ર દ્વારા સ્થળ વિઝિટ કરીને એ પણ સુનિશ્ચિત કરવામાં આવી રહ્યું છે કે કોઈ પણ ગ્રાહકને ડિલિવરીમાં મુશ્કેલી ન પડે. તંત્ર અને એજન્સીઓના સંકલનથી બજારમાં ગેસનો પુરવઠો સ્થિર બન્યો છે.

ઓલ ઇન્ડીયા ઇન્ટર યુનિવર્સિટી જુડો સ્પર્ધામાં સ્વર્ણિમ ગુજરાત સ્પોર્ટ્સ યુનિવર્સિટીના ખેલાડીઓનું દમદાર પ્રદર્શન

વડોદરાની બીના ખીમાણીનો અનોખો શોખ, કારગિલ યુદ્ધની યાદોને સ્ક્રેપબુકમાં જીવંત રાખી

વડોદરા જિલ્લામાં ગેસ સિલિન્ડરના સ્ટોકની વિગતવાર સ્થિતિ

૧૮ માર્ચ ૨૦૨૬ની સ્થિતિએ વડોદરા જિલ્લામાં તમામ મુખ્ય ઓઈલ કંપનીઓ પાસે પૂરતો સ્ટોક ઉપલબ્ધ છે. ઇન્ડિયન ઓઈલ પાસે ૯૯૯૬, ભારત પેટ્રોલિયમ પાસે ૩૭૮૮ અને હિન્દુસ્તાન પેટ્રોલિયમ પાસે ૫૯૪૧ સિલિન્ડર મળીને કુલ ૧૯,૭૨૨ સિલિન્ડરનો જથ્થો ઉપલબ્ધ છે. જિલ્લાની દૈનિક જરૂરિયાત અંદાજે ૧૪,૦૯૮ સિલિન્ડરની છે, જેની સામે ઉપલબ્ધ સ્ટોક ઘણો વધારે છે. આમ, તેલ વિતરણ કંપનીઓ અને વહીવટી તંત્ર દ્વારા રાંધણ ગેસનો પુરવઠો સરળતાથી મળી રહે તે માટે પૂરતી વ્યવસ્થા કરવામાં આવી છે, જે અફવાઓને તદ્દન ખોટી સાબિત કરે છે.