ભાવનગરમાં મિલેટ મહોત્સવ અને પ્રાકૃતિક ફાર્મર માર્કેટનો ભવ્ય પ્રારંભ, ‘શ્રી અન્ન’ પ્રત્યે જનજાગૃતિનો સંદેશ

જવાહર મેદાન ખાતે બે દિવસીય મિલેટ મહોત્સવ શરૂ

ભાવનગર શહેરના જવાહર મેદાન ખાતે કમિશનર ડૉ. નરેન્દ્રકુમાર મીનાના અધ્યક્ષસ્થાને અને પૂર્વ મેયર ભરતભાઈ બારડની પ્રેરક ઉપસ્થિતિમાં બે દિવસીય ‘મિલેટ મહોત્સવ અને પ્રાકૃતિક ફાર્મર માર્કેટ-૨૦૨૬’ ખુલ્લો મૂકવામાં આવ્યો છે. આ મહોત્સવનો મુખ્ય ઉદ્દેશ્ય જનસમુદાયમાં પોષક અનાજ એટલે કે ‘શ્રી અન્ન’ પ્રત્યે જાગૃતિ ફેલાવવાનો અને રાસાયણિક ખેતી છોડીને પ્રાકૃતિક ખેતી અપનાવતા ખેડૂતોને પ્રોત્સાહન આપવાનો છે. આ કાર્યક્રમમાં રાજ્યકક્ષાના મિલેટ ઉત્સવનું જીવંત પ્રસારણ પણ કરવામાં આવ્યું હતું, જેનો મોટી સંખ્યામાં ઉપસ્થિત મહાનુભાવો અને નાગરિકોએ લાભ લીધો હતો.

શ્રી અન્ન અને સ્વાસ્થ્યવર્ધક વાનગીઓનું પ્રદર્શન

મહોત્સવમાં નાગરિકો માટે ૩૬ જેટલા પ્રદર્શન-કમ-વેચાણ સ્ટોલ અને ૧૫ લાઈવ ફૂડ કોર્ટ ઊભા કરવામાં આવ્યા છે. અહીં બાજરી, જુવાર, રાગી અને મોરૈયા જેવા મિલેટ્સમાંથી તૈયાર કરવામાં આવેલી વિવિધ પૌષ્ટિક વાનગીઓ પીરસવામાં આવી રહી છે. પૂર્વ મેયર ભરતભાઈ બારડે પોતાના ઉદ્બોધનમાં જણાવ્યું હતું કે, આજના જંક ફૂડના યુગમાં યુવા પેઢી જો મિલેટ આધારિત આહારશૈલી અપનાવે તો નાની ઉંમરે થતા અનેક ગંભીર રોગોથી બચી શકાય છે. મિલેટ્સ પોષક તત્વોનો ખજાનો હોવાથી તે શરીરની રોગપ્રતિકારક શક્તિ વધારવામાં પણ અત્યંત મદદરૂપ સાબિત થાય છે.

લોકઆંદોલન દ્વારા ખેતી અને ખેડૂતોનો વિકાસ

પૂર્વ સ્ટેન્ડિંગ કમિટીના ચેરમેન રાજુભાઈ રાબડીયાએ મુખ્યમંત્રી ભૂપેન્દ્રભાઈ પટેલના નેતૃત્વમાં કૃષિ ક્ષેત્રે થઈ રહેલા વિકાસનો ઉલ્લેખ કર્યો હતો. તેમણે જણાવ્યું કે, મિલેટના વપરાશને લોકઆંદોલનનું સ્વરૂપ આપવા માટે આવા મહોત્સવો એક અસરકારક માધ્યમ છે. આ આયોજન દ્વારા ખેડૂતોને પોતાના પ્રાકૃતિક ઉત્પાદનો સીધા ગ્રાહકોને વેચવા માટેનું બજાર મળ્યું છે, જેનાથી તેમની આવકમાં વધારો થશે. મહોત્સવમાં ખેડૂતોને નવી ટેકનિક અને પ્રાકૃતિક ખેતીની પદ્ધતિઓ વિશે પણ નિષ્ણાતો દ્વારા વિસ્તૃત માર્ગદર્શન આપવામાં આવી રહ્યું છે.

રાજ્યપાલ શ્રી આચાર્ય દેવવ્રતજીનું પ્રાકૃતિક ખેતી અંગે રાજ્યવ્યાપી પ્રેરક સંબોધન

ભાવનગર એરપોર્ટ પર નવી મુંબઈની હવાઈ સેવા સાથે સુવિધાઓમાં વધારો

વહીવટી તંત્ર અને જનપ્રતિનિધિઓનો સહયોગ

ભાવનગર મહાનગરપાલિકા અને જિલ્લા ખેતીવાડી વિભાગના સંયુક્ત ઉપક્રમે આયોજિત આ કાર્યક્રમમાં જિલ્લા વિકાસ અધિકારી હનુલ ચૌધરી અને ડેપ્યુટી કમિશનર જયકુમાર રાવળ સહિતના ઉચ્ચ અધિકારીઓ હાજર રહ્યા હતા. નાયબ ખેતી નિયામક એસ.બી. વાઘમશીએ મિલેટના વધતા વૈશ્વિક મહત્વ પર પ્રકાશ પાડ્યો હતો. કાર્યક્રમમાં પૂર્વ મેયર કિર્તીબેન દાણીધારીયા અને અન્ય અગ્રણીઓની સાથે મોટી સંખ્યામાં ખેડૂત ભાઈ-બહેનો જોડાયા હતા. આ મહોત્સવ શહેરના નાગરિકોને સ્વસ્થ જીવનશૈલી તરફ વળવા અને ખેડૂતોને આત્મનિર્ભર બનવા માટે પ્રેરણા પૂરી પાડશે.