મુખ્યમંત્રીના હસ્તે રિંગ રોડથી લઈને રિવરફ્રન્ટ સુધી અનેક પ્રકલ્પોની શરૂઆત
મુખ્યમંત્રી ભૂપેન્દ્રભાઈ પટેલે રવિવારે અમરેલી જિલ્લાની મુલાકાત દરમિયાન જન સુખાકારી અને આંતરમાળખાકીય સુવિધાઓને મજબૂત કરતા ૨૪ જેટલા વિવિધ વિકાસ પ્રકલ્પોનું લોકાર્પણ અને ખાતમુહૂર્ત કર્યું હતું. અંદાજે ૭૦૦ કરોડથી વધુના ખર્ચે સાકાર થનારા આ પ્રોજેક્ટ્સ અમરેલીની પ્રગતિમાં નવા સીમાચિહ્નરૂપ સાબિત થશે. મુખ્યમંત્રીશ્રીએ અમરેલી એ.પી.એમ.સી. ખાતે વિશાળ જનમેદનીને સંબોધતા ખેડૂતોના હિતમાં ૧૨ કરોડના ખર્ચે નિર્મિત “વિરાટ” શેડનું પણ લોકાર્પણ કર્યું હતું. તેમણે સ્પષ્ટપણે જણાવ્યું હતું કે રાજ્ય સરકાર અમરેલીના વિકાસ માટે નાણાંની કોઈ કમી આવવા દેશે નહીં અને ગુણવત્તાયુક્ત કામગીરી પર વિશેષ ભાર મૂકશે.
ઔદ્યોગિક વિકાસ અને પાણીના સંકટ સામે આગોતરૂ આયોજન
અમરેલી જિલ્લામાં ઔદ્યોગિક ક્રાંતિ લાવવા માટે સરકાર કટિબદ્ધ છે, જેના ભાગરૂપે તાજેતરમાં ૩૬,૦૦૦ કરોડના એમ.ઓ.યુ. (MoU) કરવામાં આવ્યા છે અને નવી જી.આઈ.ડી.સી. પણ મંજૂર કરવામાં આવી છે. મુખ્યમંત્રીશ્રીએ પાણીની અછતની ગંભીરતાને સમજતા જણાવ્યું હતું કે ભવિષ્યમાં પાણીનું સંકટ ન સર્જાય તે માટે અત્યારથી જ “કેચ ધ રેઇન” જેવા અભિયાનો ચલાવવામાં આવી રહ્યા છે. વરસાદી પાણીના સંગ્રહ માટે દરેક ધારાસભ્યને વાર્ષિક ૫૦ લાખ રૂપિયાની વિશેષ ગ્રાન્ટ ફાળવવામાં આવી રહી છે, જેથી છેવાડાના ગામડાઓ સુધી સિંચાઈ અને પીવાના પાણીની વ્યવસ્થા સુદ્રઢ બનાવી શકાય.
શિક્ષણ, રમતગમત અને માળખાગત સુવિધાઓમાં નોંધપાત્ર વધારો
રાજ્યમંત્રી કૌશિકભાઈ વેકરીયાએ જિલ્લામાં ચાલી રહેલા અન્ય મહત્વના પ્રોજેક્ટ્સની માહિતી આપતા જણાવ્યું કે અમરેલીમાં ૨૭૦ કરોડના ખર્ચે રિંગ રોડ અને લાઠી રોડ પર ૯૫ કરોડના ખર્ચે રેલવે ઓવરબ્રિજનું નિર્માણ કરવામાં આવશે. આ ઉપરાંત, બાબાપુર ખાતે ૩૫ કરોડના ખર્ચે નેચરલ ફાર્મિંગ કોલેજ અને વડિયામાં વિજ્ઞાન કોલેજ શરૂ કરવામાં આવી છે. યુવાનોના કૌશલ્ય વિકાસ માટે ૨૫ કરોડના ખર્ચે વિજ્ઞાન કેન્દ્ર અને ૧૬ કરોડના ખર્ચે સ્પોર્ટ્સ કોમ્પ્લેક્સ જેવી સુવિધાઓ તૈયાર થઈ રહી છે. અમરેલી રિવરફ્રન્ટ માટે પણ સરકારે ઉદાર હાથે ૭૦ કરોડની રકમ મંજૂર કરી છે, જે શહેરની સુંદરતામાં વધારો કરશે.
ગરીબ કલ્યાણ અને ખેડૂતલક્ષી યોજનાઓના લાભોનું વિતરણ
કાર્યક્રમ દરમિયાન મુખ્યમંત્રીશ્રીના હસ્તે વિવિધ યોજનાના લાભાર્થીઓને સહાયનું વિતરણ કરવામાં આવ્યું હતું. પ્રધાનમંત્રી આવાસ યોજના હેઠળ તૈયાર થયેલા ઘરોની ચાવીઓ અર્પણ કરવામાં આવી હતી અને મહિલા સ્વસહાય જૂથોને આર્થિક મદદના ચેક એનાયત કરાયા હતા. આ પ્રસંગે નિકોલના ધારાસભ્ય જગદીશભાઈ વિશ્વકર્માનું ૧,૧૧,૧૧૧ નોટબુકથી સ્વાગત કરવામાં આવ્યું હતું, જે જરૂરિયાતમંદ વિદ્યાર્થીઓને વિતરિત કરવામાં આવશે. વહીવટી તંત્ર અને જનપ્રતિનિધિઓના સંકલનથી અમરેલી જિલ્લો હવે વિકસિત ગુજરાતના સંકલ્પને સાકાર કરવા તરફ ઝડપથી આગળ વધી રહ્યો છે.
