ન્યુઝીલેન્ડ ક્રિકેટ બોર્ડનો મોટો નિર્ણય: IPLની તર્જ પર હવે ન્યુઝીલેન્ડમાં પણ રમાશે નવી T20 લીગ
ન્યુઝીલેન્ડ ક્રિકેટ બોર્ડ (NZC) એ વિશ્વ ક્રિકેટના બદલાતા પ્રવાહ સાથે તાલ મિલાવવા અને ટી20 ફોર્મેટમાં પોતાનું વર્ચસ્વ વધારવા માટે એક ક્રાંતિકારી નિર્ણય લીધો છે. બોર્ડે સત્તાવાર રીતે પોતાની નવી ફ્રેન્ચાઇઝી આધારિત ટી20 લીગ ‘NZ20’ શરૂ કરવાની તૈયારીઓ પૂર્ણ કરી લીધી છે.
ન્યુઝીલેન્ડ ક્રિકેટમાં નવા યુગની શરૂઆત
દુનિયાના અન્ય મોટા ક્રિકેટ બોર્ડ્સની જેમ હવે ન્યુઝીલેન્ડ પણ પોતાની પ્રોફેશનલ લીગ દ્વારા ક્રિકેટ જગતમાં નવી ઓળખ ઊભી કરવા જઈ રહ્યું છે. બોર્ડના જણાવ્યા અનુસાર, ‘NZ20’ લીગને સ્થાનિક ક્રિકેટ કેલેન્ડરમાં પ્રાથમિકતા આપવામાં આવશે. આ પગલું ન્યુઝીલેન્ડના ક્રિકેટના ભવિષ્યને સુરક્ષિત કરવા અને સ્થાનિક યુવા ખેલાડીઓને આંતરરાષ્ટ્રીય કક્ષાનું એક્સપોઝર પૂરું પાડવાના ઉદ્દેશ્યથી લેવામાં આવ્યું છે. આ નવી લીગ દ્વારા ન્યુઝીલેન્ડના ઉભરતા ખેલાડીઓને સ્ટાર ક્રિકેટરો સાથે રમવાની તક મળશે, જે લાંબા ગાળે રાષ્ટ્રીય ટીમને મજબૂત બનાવશે.
સુપર સ્મેશનું સ્થાન લેશે NZ20
ન્યુઝીલેન્ડમાં છેલ્લા 21 વર્ષથી ‘સુપર સ્મેશ’ ટૂર્નામેન્ટ રમાઈ રહી છે. જોકે, આઈપીએલ (IPL) અને બીગ બેશ (BBL) જેવી ગ્લોબલ લીગની સફળતા સામે સુપર સ્મેશનું કદ નાનું સાબિત થઈ રહ્યું હતું. NZC બોર્ડના ચેરપર્સન ડાયના પુકેતાપુ-લિન્ડને જણાવ્યું હતું કે, બોર્ડે ઓસ્ટ્રેલિયાની બિગ બેશ લીગમાં જોડાવા અથવા પોતાની અલગ લીગ શરૂ કરવા બાબતે લાંબી ચર્ચા કરી હતી. અંતે, પોતાની આગવી ઓળખ જાળવી રાખવા અને રમતને નવું સ્વરૂપ આપવા માટે ‘NZ20’ શરૂ કરવાનો નિર્ણય લેવામાં આવ્યો છે.
આર્થિક સદ્ધરતા અને ગ્લોબલ બ્રાન્ડ વેલ્યુ
ડાયના પુકેતાપુ-લિન્ડને વધુમાં ઉમેર્યું કે, “આ ન્યુઝીલેન્ડ ક્રિકેટ માટે અત્યંત રોમાંચક સમય છે. અમે એવું પરિણામ ઈચ્છીએ છીએ જે અહીંની રમતના હિતમાં હોય.” બોર્ડનું માનવું છે કે આ લીગ માત્ર આર્થિક રીતે જ બોર્ડને આત્મનિર્ભર નહીં બનાવે, પરંતુ વિશ્વભરના રોકાણકારોને પણ આકર્ષશે.
તાજેતરના વર્ષોમાં ન્યુઝીલેન્ડ ક્રિકેટની બ્રાન્ડ વેલ્યુમાં મોટો ઉછાળો જોવા મળ્યો છે. ખાસ કરીને ન્યુઝીલેન્ડની મહિલા ટીમે ટી20 વર્લ્ડ કપ જીત્યો અને મેન્સ ટીમે તમામ ફોર્મેટમાં સાતત્યપૂર્ણ પ્રદર્શન કર્યું, તેનાથી વૈશ્વિક સ્તરે તેમનું સન્માન વધ્યું છે. ડેલૉઇટ (Deloitte) ના રિપોર્ટ અને વિવિધ હિતધારકો સાથેની ચર્ચા બાદ એ સ્પષ્ટ થયું છે કે ન્યુઝીલેન્ડ પાસે પોતાની એક મજબૂત ગ્લોબલ બ્રાન્ડ વેલ્યુ છે, જેનો ઉપયોગ આ નવી લીગને સફળ બનાવવા માટે કરવામાં આવશે.
