ઇન્ડસ્ટ્રીયલ અને જન સુરક્ષાને પ્રાધાન્ય આપતા મોરબી જિલ્લામાં IOCLની વ્યાપક મોકડ્રીલ યોજાઈ
મોરબી જિલ્લામાં ઔદ્યોગિક સલામતી અને જન સુરક્ષાને પ્રાધાન્ય આપવાના ઉમદા હેતુથી હળવદ તાલુકાના રણમલપુર ગામ પાસે ઇન્ડિયન ઓઇલ કોર્પોરેશન લિમિટેડ (IOCL) દ્વારા એક વિશેષ ‘ઓફસાઈટ મોકડ્રીલ’ યોજવામાં આવી હતી. પશ્ચિમ ક્ષેત્ર પાઇપલાઇન્સ-વિરમગામ હેઠળ આવતી આ પાઇપલાઇનમાં જો ભવિષ્યમાં કોઈ આકસ્મિક આપત્તિ સર્જાય, તો તંત્ર અને કંપનીની સજ્જતા કેટલી છે તેની ચકાસણી કરવા માટે આ રિહર્સલ કરવામાં આવ્યું હતું. આ આયોજન દ્વારા કોઈપણ કટોકટીના સમયે જાન-માલનું નુકસાન ઘટાડવા માટેની વહીવટી ક્ષમતાનું પ્રદર્શન કરવામાં આવ્યું હતું.
પાઇપલાઇન લીકેજ અને આગની ઘટનાનું આબેહૂબ રિહર્સલ
મોકડ્રીલના આયોજન મુજબ, બપોરે ૧૨:૦૦ વાગ્યાની આસપાસ વિરમગામ-કંડલા પાઇપલાઇનમાં અજાણ્યા તત્વો દ્વારા તોડફોડ કે ચોરીના પ્રયાસને કારણે લીકેજ થયું હોવાનો સિનારીયો ઊભો કરાયો હતો. પેટ્રોલિયમ પેદાશના લીકેજની જાણ થતા જ કંટ્રોલરૂમ સક્રિય થયો હતો અને આપાતકાલીન ટીમો સ્થળ પર પહોંચી હતી. આ દરમિયાન અચાનક આગ ફાટી નીકળતા સ્થિતિ ગંભીર બની હતી. આઈ.ઓ.સી.એલ.ની ટીમે તત્કાલિક નિર્ણય લઈ પાઇપલાઇનના બંને બાજુના વાલ્વ બંધ કરી તેને આઈસોલેટ કરી દીધી હતી, જેથી વધુ નુકસાન અટકાવી શકાયું હતું.
વિવિધ વિભાગોના સંકલન દ્વારા સુરક્ષા કામગીરીનું પ્રદર્શન
આ રિહર્સલ દરમિયાન માત્ર આગ બુઝાવવાની જ નહીં, પરંતુ ઈજાગ્રસ્તોને બચાવવાની પ્રક્રિયા પણ હાથ ધરવામાં આવી હતી. એક કર્મચારી ઈજાગ્રસ્ત થયા હોવાનું માની તેમને ૧૦૮-એમ્બ્યુલન્સ મારફતે તાત્કાલિક હોસ્પિટલ ખસેડવામાં આવ્યા હતા. આ મોકડ્રીલમાં વિરમગામ અને કંડલાની IOCL ટીમ સાથે ફાયર સેફ્ટી, પોલીસ વિભાગ, આરોગ્ય વિભાગ અને ઇન્ડસ્ટ્રીયલ સેફ્ટી એન્ડ હેલ્થ વિભાગના અધિકારીઓએ પરસ્પર સંકલનથી કામગીરી કરી હતી. અંતે મેન્ટેનન્સ ટીમે પરિસ્થિતિ સંપૂર્ણ નિયંત્રણમાં હોવાની પુષ્ટિ કરતા આ પ્રક્રિયાને સફળ જાહેર કરવામાં આવી હતી.
આપત્તિ વ્યવસ્થાપન અને ગ્રામજનોમાં સુરક્ષા અંગે જાગૃતિ
આ કાર્યક્રમમાં ડિઝાસ્ટર મામલતદાર સલીમ ડોડીયા, IOCL ના જનરલ મેનેજર મનોજ ગુપ્તા અને અન્ય ઉચ્ચ અધિકારીઓ ઉપસ્થિત રહ્યા હતા. અધિકારીઓએ જણાવ્યું હતું કે પાઇપલાઇન સુરક્ષા એ રાષ્ટ્રીય સંપત્તિની સુરક્ષા છે. આ મોકડ્રીલ દ્વારા રણમલપુરના ગ્રામજનોને પણ પાઇપલાઇન નજીક થતી શંકાસ્પદ પ્રવૃત્તિઓ વિશે જાગૃત કરવામાં આવ્યા હતા. જિલ્લા આપત્તિ વ્યવસ્થાપન તંત્ર અને IOCL ના આ સંયુક્ત પ્રયાસથી સાબિત થયું કે મોરબી જિલ્લો કોઈપણ ઔદ્યોગિક અકસ્માતને પહોંચી વળવા માટે સંપૂર્ણ રીતે સજ્જ અને સતર્ક છે.
