રાજ્ય સ્વાગત કાર્યક્રમમાં મુખ્યમંત્રી ભૂપેન્દ્ર પટેલે નાગરિકોની રજૂઆતો સાંભળી ત્વરિત નિવારણ માટે તંત્રને કડક સૂચનાઓ આપી

‘નાગરિક દેવો ભવઃ’ અભિગમ સાથે રાજ્ય સ્વાગતમાં 100થી વધુ અરજીઓનો નિકાલ

મુખ્યમંત્રી ભૂપેન્દ્ર પટેલે માર્ચ-2026ના ‘રાજ્ય સ્વાગત’ ઓનલાઈન જન ફરિયાદ નિવારણ કાર્યક્રમ હેઠળ નાગરિકોની રજૂઆતો રૂબરૂ સાંભળી હતી. ‘નાગરિક દેવો ભવઃ’ના ઉમદા અભિગમ સાથે તેમણે રાજ્યભરમાંથી આવેલા 100થી વધુ અરજદારોના પ્રશ્નોના નિકાલ માટે વહીવટી તંત્રને સ્પષ્ટ આદેશો આપ્યા હતા. આ માસ દરમિયાન માત્ર રાજ્ય કક્ષાએ જ નહીં, પરંતુ જિલ્લા સ્વાગતની 1218 અને તાલુકા સ્વાગતની 2294 રજૂઆતો પર પણ સ્થાનિક તંત્ર દ્વારા ઉકેલની કાર્યવાહી હાથ ધરવામાં આવી છે, જે સરકારની પ્રજાલક્ષી કાર્યપ્રણાલી દર્શાવે છે.

વૃદ્ધા પ્રત્યે સંવેદના અને શિક્ષણના હિતમાં મહત્વના નિર્ણયો

આ વખતના સ્વાગત કાર્યક્રમમાં મુખ્યમંત્રીશ્રીએ એક વૃદ્ધ માતાની હૃદયસ્પર્શી ફરિયાદ પર ત્વરિત એક્શન લીધા હતા. પોતાના જ પુત્ર અને પુત્રવધૂ દ્વારા ઘરમાંથી કાઢી મૂકાયેલા અને માનસિક ત્રાસ ભોગવતા વૃદ્ધાના કિસ્સામાં તેમણે નાયબ કલેક્ટરના હુકમનો તાત્કાલિક અમલ કરવા પોલીસ અને કલેક્ટરને સૂચના આપી હતી. આ ઉપરાંત, દાંતીવાડા કૃષિ યુનિવર્સિટીમાં છેલ્લા 40 વર્ષથી કાર્યરત પ્રાથમિક શાળાના 300 બાળકોના ભવિષ્યને ધ્યાને રાખીને, યુનિવર્સિટી દ્વારા શાળાના નવા બાંધકામને તાત્કાલિક મંજૂરી આપવા માટે જરૂરી દિશાનિર્દેશો જારી કર્યા હતા.

ખેડૂતોના પડતર પ્રશ્નો અને નદીઓના અવરોધ દૂર કરવા આદેશ

ખેતી અને ખેડૂતોની સમસ્યાઓને મુખ્યમંત્રીશ્રીએ પ્રાથમિકતા આપી હતી. દહેગામની ખારી નદીમાં બાવળ અને ઝાડી-ઝાંખરાને કારણે પાણીનું વહન અટકતું હોવાથી ખેતરોનું ધોવાણ થતું હતું, જે પ્રશ્નનો સુજલામ સુફલામ યોજના અંતર્ગત કાયમી નિકાલ લાવવા સૂચના અપાઈ હતી. અન્ય કિસ્સાઓમાં ખેતરમાંથી પસાર થતી ગટર લાઈનના લીકેજને કારણે પાકને થતું નુકસાન અટકાવવા અને ખેતરમાં જવાના રસ્તા પરથી ગેરકાયદે દબાણો હટાવવા માટે સ્થાનિક તંત્રને તાકીદ કરવામાં આવી હતી, જેથી ખેડૂતોને આર્થિક નુકસાન ન વેઠવું પડે.

ગાંધીનગરના લોકભવન ખાતે ભવ્ય રાજ્યસ્તરીય ‘સંસ્કૃત સન્માન સમારોહ’નું આયોજન

ગાંધીનગર સિવિલ હોસ્પિટલ ખાતે એક માસ માટે ‘વર્લ્ડ ઓરલ હેલ્થ મંથ’ની ઉજવણી

પારદર્શક વહીવટ દ્વારા નાગરિકોનો વિશ્વાસ મજબૂત કરવાનો નિર્ધાર

રાજ્ય સરકાર પ્રત્યે નાગરિકોનો વિશ્વાસ વધુ મજબૂત થાય તે માટે મુખ્યમંત્રીશ્રીએ વહીવટી તંત્રને ન્યાયિક અને સમયમર્યાદામાં પ્રશ્નો ઉકેલવા જણાવ્યું હતું. માર્ચ-2026ના આ કાર્યક્રમમાં મુખ્યમંત્રીના અગ્ર સચિવ સંજીવ કુમાર સહિત વરિષ્ઠ અધિકારીઓ અને વિવિધ જિલ્લાઓના કલેક્ટર તેમજ એસ.પી. ઓનલાઈન માધ્યમથી જોડાયા હતા. રાજ્ય સ્વાગતના માધ્યમથી સામાન્ય માનવીને સીધો જ મુખ્યમંત્રી સુધી પહોંચવાનો માર્ગ મોકળો થયો છે, જેનાથી વહીવટમાં પારદર્શિતા અને સંવેદનશીલતા વધી છે.