મોદી સરકારનો કૃષિ ખરડો અને ખટ્ટર સરકાર પર વધ્યો ખતરો, ચૌટાલા ખસ્યા તો સરકાર ગબડશે

મોદી સરકાર કૃષિને લગતા ત્રણ વટહુકમોને કાયદામાં ફેરવવા જીદ પર અડી છે ત્યારે આ મુદ્દે હરિયાણામાં ભાજપની સરકાર ઘરભેગી થઈ જાય એવો ખતરો ઉભો થયો છે. હરિયાણામાં ભાજપના મનોહરલાલ ખટ્ટર દુષ્યંત ચૌટાલાની જનનાયક જનતા પાર્ટી (જેપીપી)ના ટેકાથી સત્તામાં છે. કૃષિ વટહુકમોનો સૌથી વધુ ઉગ્ર વિરોધ પંજાબ અને હરિયાણામાં થઈ રહ્યો છે. તેના કારણે ચૌટાલા પર પણ ભારે દબાણ છે. ચૌટાલા જાટ મતબેંકના જોરે શક્તિશાળી બન્યા છે. જાટ સમુદાય ખેતી સાથે સંકળાયેલો હોવાથી પોતાની મતબેંકને સાચવવા ચૌટાલા ભાજપને બાજુ પર મૂકી દે તેવી પૂરી શકયતા છે. ભાજપના સૌથી જૂના સાથી અકાલી દળનાં હરસિમરત કૌરે ખેડૂતોને લગતા ખરડાને મુદ્દે  મોદી સરકારમાંથી રાજીનામું ધરી દીધું પછી ખટ્ટરે ચૌટાલા સાથે બેઠક કરી હતી. ખટ્ટર અને ચૌટાલાએ એ પછી અમિત શાહ સાથે અલગ અલગ વાત કરી હોવાનું ભાજપનાં સૂત્રોનું કહેવું છે. ચૌટાલાએ ખેડૂતોને સાચવી લેવા શાહને કહ્યું છે ને સાથે સાથે ચીમકી પણ આપી છે કે, ખેડૂતોના મામલે તેમનો પક્ષ કોઈ સમાધાન નહીં કરે.