બંગાળમાં ચૂંટણી પ્રચારનો અંતિમ દિવસ: CM યોગીની 4 તોફાની જનસભાઓ, શું ભાજપનું આક્રમણ મમતાના ગઢમાં ગાબડું પાડશે?
પશ્ચિમ બંગાળમાં આજે બીજા તબક્કાના મતદાન માટે પ્રચારનો છેલ્લો દિવસ છે. બાકી રહેલી ૧૪૨ બેઠકો પર આજે સાંજ પછી પ્રચારના પડઘમ શાંત થઈ જશે. આ અંતિમ ઘડીઓમાં ભાજપે પોતાની પૂરી તાકાત મેદાનમાં ઉતારી દીધી છે. ભાજપના તમામ સ્ટાર પ્રચારકો અત્યારે ગ્રાઉન્ડ ઝીરો પર છે અને તેમના નિશાન પર માત્ર મમતા બેનર્જીની સરકાર છે.
CM યોગી આદિત્યનાથનો બંગાળમાં ઝંઝાવાતી પ્રવાસ
ઉત્તર પ્રદેશના મુખ્યમંત્રી યોગી આદિત્યનાથ આજે બંગાળમાં ચાર મોટા ચૂંટણી કાર્યક્રમોમાં ભાગ લેવાના છે. સવારથી સાંજ સુધી તેઓ વિવિધ વિધાનસભા મતવિસ્તારોમાં રોડ-શો અને જનસભાઓ દ્વારા ભાજપના પક્ષમાં માહોલ બનાવશે.
CM યોગીનું આજનું શિડ્યુલ:
સવારે ૧૧:૫૦ કલાકે: ઉત્તર ૨૪ પરગણાના કલ્યાણી વિધાનસભા ક્ષેત્રમાં ભવ્ય રોડ-શો.
બપોરે ૨:૦૫ કલાકે: હુગલીના ધાનેખાલીમાં વિશાળ જનસભાને સંબોધન.
બપોરે ૩:૨૫ કલાકે: કોલકાતાના દમદમ વિધાનસભા ક્ષેત્રમાં રોડ-શો.
સાંજે ૪:૧૦ કલાકે: રાજારહાટ ગોપાલપુરમાં અંતિમ જનસભા.
ગઈકાલે વડાપ્રધાન નરેન્દ્ર મોદીએ પણ કોલકાતામાં મેગા રોડ-શો કરીને પોતાની શક્તિ બતાવી હતી. પીએમ મોદીએ ઐતિહાસિક ઠનઠનિયા કાલી મંદિરમાં પૂજા કરી હતી, તો બીજી તરફ મમતા બેનર્જી પોતાના મતવિસ્તાર ભવાનીપુરના શાકભાજી માર્કેટમાં સામાન્ય લોકોની વચ્ચે જોવા મળ્યા હતા.
ભાજપના આકરા પ્રહાર: “૪ મે પછી ટીએમસીના ગુંડાઓ જેલમાં જશે”
બીજા તબક્કાના પ્રચારમાં ભાજપના નેતાઓ અત્યંત આક્રમક મૂડમાં જોવા મળી રહ્યા છે. ઉત્તર ૨૪ પરગણામાં રોડ-શો દરમિયાન ભાજપના નેતા નીતિન નવીને મમતા સરકાર પર આકરા પ્રહાર કરતા કહ્યું કે, “૪ મે ના રોજ પરિણામો આવ્યા બાદ ટીએમસીના ગુંડાઓ જેલના સળિયા પાછળ હશે અને બંગાળમાં પ્રચંડ બહુમતી સાથે ભાજપની સરકાર બનશે.”
પૂર્વ બર્ધમાનમાં જેપી નડ્ડાએ પણ મમતા બેનર્જી પર નિશાન સાધતા દાવો કર્યો હતો કે બીજા તબક્કામાં પણ બંગાળની જનતા મમતાના શાસન વિરુદ્ધ જ મતદાન કરશે. ભાજપ સતત ‘સિન્ડિકેટ રાજ’ અને ભ્રષ્ટાચારના મુદ્દાઓ ઉઠાવી રહી છે.
અભિષેક બેનર્જીનો વળતો પ્રહાર: ‘સીક્રેટ મીટિંગ’ નો પર્દાફાશ
ભાજપના દિગ્ગજો જ્યારે મમતા સરકારને ઘેરી રહ્યા છે, ત્યારે મમતાના ભત્રીજા અને ટીએમસીના નેતા અભિષેક બેનર્જીએ ભાજપ અને ચૂંટણી પંચ વચ્ચે સાંઠગાંઠ હોવાનો ગંભીર આરોપ લગાવ્યો છે.
અભિષેક બેનર્જીએ દાવો કર્યો છે કે, “ડાયમંડ હાર્બરમાં એક હોટલના રૂમમાં ચૂંટણી અધિકારી અને ભાજપના ઉમેદવાર વચ્ચે ગુપ્ત બેઠક ચાલી રહી હતી, જેનો પોલીસે પર્દાફાશ કર્યો છે.” તેમણે આક્ષેપ કર્યો કે ભાજપ સત્તાના જોરે ચૂંટણી જીતવાના હવાતિયાં મારી રહી છે.
