“પેન્ટાગન જૂઠું બોલી રહ્યું છે”: ઈરાને અમેરિકાના યુદ્ધ ખર્ચ પર કર્યા આકરા પ્રહાર, કહ્યું- “ઈઝરાયેલ ફર્સ્ટ એટલે અમેરિકા લાસ્ટ”
ઈરાનના વિદેશ મંત્રી અબ્બાસ અરગચીએ શુક્રવારે સોશિયલ મીડિયા પ્લેટફોર્મ ‘X’ પર એક પોસ્ટ દ્વારા અમેરિકાના સંરક્ષણ વિભાગ પેન્ટાગન પર નિશાન સાધ્યું છે. અરગચીનો દાવો છે કે ઈરાન સાથેના સંઘર્ષમાં અમેરિકાને જે નુકસાન થઈ રહ્યું છે, તેના સાચા આંકડા પેન્ટાગન છુપાવી રહ્યું છે.
“100 અબજ ડોલરનું નુકસાન અને જનતા પર બોજ”
અબ્બાસ અરગચીએ પોતાની પોસ્ટમાં લખ્યું કે, “પેન્ટાગન જૂઠું બોલી રહ્યું છે. બેન્જામિન નેતન્યાહુનો આ ‘જુગાર’ અત્યાર સુધીમાં અમેરિકાને 100 અબજ ડોલરનું નુકસાન કરાવી ચૂક્યો છે. આ આંકડો પેન્ટાગન દ્વારા બતાવવામાં આવેલા આંકડા કરતા 4 ગણો વધારે છે.”
તેમણે વધુમાં ઉમેર્યું કે, આ તો માત્ર સીધો ખર્ચ છે, પરંતુ અમેરિકન ટેક્સપેયર્સ (કરદાતાઓ) પર તેનો પરોક્ષ બોજ તો કલ્પના બહારનો છે. અરગચીના મતે, આ યુદ્ધને કારણે દરેક અમેરિકન પરિવાર પર દર મહિને આશરે 500 ડોલરનો વધારાનો આર્થિક બોજ આવી રહ્યો છે. તેમણે કટાક્ષ કરતા કહ્યું કે, “જ્યારે તમે ‘ઈઝરાયેલ ફર્સ્ટ’ની નીતિ અપનાવો છો, ત્યારે તેનો અર્થ હંમેશા ‘અમેરિકા લાસ્ટ’ જ થાય છે.”
ઈરાનની સરહદો અને અમેરિકાની મજબૂરી
માત્ર વિદેશ મંત્રી જ નહીં, ઈરાની સંસદના સ્પીકર એમ.બી. ગાલિબાફે પણ અમેરિકાની મજાક ઉડાવવાની તક ઝડપી લીધી. તેમણે અમેરિકાને પડકાર ફેંકતા કહ્યું કે, ઈરાનની ભૌગોલિક સીમાઓ એટલી લાંબી છે કે તેને ઘેરવી અમેરિકા માટે અશક્ય છે.
ગાલિબાફે એક રસપ્રદ સરખામણી કરતા જણાવ્યું કે, “જો તમે ન્યૂયોર્કથી વેસ્ટ કોસ્ટ સુધી અને લોસ એન્જલસથી ઈસ્ટ કોસ્ટ સુધી બે મોટી દીવાલો બનાવી દો, તો તેની કુલ લંબાઈ 7,755 કિલોમીટર થશે. ઈરાનની સરહદો આના કરતા પણ 1,000 કિલોમીટર વધુ લાંબી છે. આવા વિશાળ દેશને ઘેરવાની યોજના બનાવનારાઓને મારી શુભેચ્છાઓ!” તેમણે અમેરિકાના સંરક્ષણ મંત્રી પીટ હેગસેથને ટોણો મારતા અંતમાં ગણિત પણ શીખવ્યું કે, “1 કિલોમીટર = 0.62 માઈલ.”
પેન્ટાગનનો શું છે દાવો?
આ વિવાદ ત્યારે શરૂ થયો જ્યારે અમેરિકાના રક્ષામંત્રી પીટ હેગસેથે સંસદની કમિટી સામે જુબાની આપી હતી. હેગસેથે દાવો કર્યો હતો કે ઈરાન સામેના યુદ્ધમાં અમેરિકાએ અત્યાર સુધીમાં લગભગ 25 અબજ ડોલર ખર્ચ્યા છે. આ ખર્ચમાં મુખ્યત્વે હથિયારો અને સાધનોની જાળવણીનો સમાવેશ થાય છે. તેમણે વિપક્ષી નેતાઓ પર પ્રહાર કરતા કહ્યું હતું કે, અત્યારે અમારી સામે મોટો દુશ્મન ઈરાન નથી, પણ અમેરિકાના કેટલાક જવાબદાર નેતાઓના ‘હાર માની લેનારા’ નિવેદનો છે.
શું છે યુદ્ધનો અસલી ખર્ચ?
પેન્ટાગન ભલે 25 અબજ ડોલરની વાત કરતું હોય, પરંતુ અમેરિકાના પોતાના અર્થશાસ્ત્રીઓ અને ડેમોક્રેટિક નેતાઓ આ વાત માનવા તૈયાર નથી. નિષ્ણાતોનું માનવું છે કે ઈરાન સાથેના લાંબા સંઘર્ષની અસલી કિંમત 630 અબજ ડોલરથી લઈને 1 ટ્રિલિયન ડોલર (1 લાખ કરોડ ડોલર) સુધી પહોંચી શકે છે.
નોંધનીય છે કે, માર્ચ મહિનામાં પેન્ટાગનના અધિકારીઓએ જ કબૂલાત કરી હતી કે યુદ્ધના શરૂઆતના માત્ર 6 દિવસમાં જ 11.3 અબજ ડોલરનો ધુમાડો થઈ ગયો હતો. ટ્રમ્પ વહીવટીતંત્રે શરૂઆતમાં 200 અબજ ડોલરના બજેટની માંગ કરી હતી. આ વિરોધાભાસી આંકડાઓ જ દર્શાવે છે કે અમેરિકન વહીવટીતંત્ર પોતે પણ યુદ્ધના ખર્ચના ચોક્કસ આંકડા જાહેર કરવા તૈયાર નથી.
જનતામાં વધતો આક્રોશ
ઈરાનનો આ દાવો અમેરિકન જનતામાં ઉકળતા ચરુ જેવી સ્થિતિ પેદા કરી શકે છે. અમેરિકામાં મોંઘવારી અને બેરોજગારી જેવા આંતરિક મુદ્દાઓ વચ્ચે વિદેશી યુદ્ધોમાં અબજો ડોલર ખર્ચવા સામે પહેલાથી જ વિરોધ થઈ રહ્યો છે. ઈરાન બરાબર આ જ નબળી નસ પર પ્રહાર કરી રહ્યું છે.
