ઉત્તર કોરિયામાં વસ્તી ઘટાડાનો ફફડાટ: કિમ જોંગ ઉને કર્મચારીઓની નિવૃત્તિ વય વધારી
ઉત્તર કોરિયાના સરમુખત્યાર કિમ જોંગ ઉને દેશમાં સતત ઘટી રહેલા જન્મદર અને ઝડપથી વધી રહેલી વૃદ્ધોની વસ્તીને ધ્યાનમાં રાખીને એક મોટો નિર્ણય લીધો છે. દેશમાં કામ કરતા લોકોની અછત ન સર્જાય તે માટે સરકારે ઓફિસના કર્મચારીઓની નિવૃત્તિની ઉંમરમાં 3 વર્ષનો વધારો કર્યો છે.
નવો નિયમ: કોણ ક્યારે નિવૃત્ત થશે?
સુધારેલા શ્રમ કાયદા મુજબ, હવે સરકારી કચેરીઓમાં કામ કરતા કર્મચારીઓ માટે નિવૃત્તિની વય મર્યાદા બદલાઈ ગઈ છે:
પુરુષ કર્મચારીઓ: હવે 60 વર્ષને બદલે 63 વર્ષે નિવૃત્ત થશે.
મહિલા કર્મચારીઓ: હવે 55 વર્ષને બદલે 58 વર્ષે નિવૃત્ત થશે.
ખાસ નોંધ: આ નિયમ માત્ર ઓફિસમાં કામ કરતા વહીવટી અને બૌદ્ધિક કર્મચારીઓ માટે જ છે. ખેતરોમાં કામ કરતા ખેડૂતો કે ફેક્ટરીના મજૂરો માટે નિવૃત્તિની વયમાં કોઈ ફેરફાર કરવામાં આવ્યો નથી.
કેમ લેવો પડ્યો આ નિર્ણય?
ઉત્તર કોરિયાના સત્તાવાર અહેવાલો મુજબ, દેશમાં લોકોનું સરેરાશ આયુષ્ય વધી રહ્યું છે અને અનુભવી કર્મચારીઓની સેવાની જરૂરિયાત પણ વધી રહી છે.
વૃદ્ધ થતો સમાજ: 2024 ના આંકડા મુજબ, ઉત્તર કોરિયાની 2.58 કરોડની વસ્તીમાં 65 વર્ષથી વધુ ઉંમરના લોકોનો હિસ્સો 11% થી વધુ થઈ ગયો છે. આ સ્થિતિ દેશને ‘એજિંગ સોસાયટી’ એટલે કે વૃદ્ધોના સમાજની શ્રેણીમાં મૂકે છે.
ઘટતો જન્મદર: ઉત્તર કોરિયામાં પ્રજનન દર ઘટીને 1.60 પર આવી ગયો છે. વસ્તીને સ્થિર રાખવા માટે આ દર ઓછામાં ઓછો 2.1 હોવો જરૂરી છે. બાળકો ઓછા પેદા થવાને કારણે ભવિષ્યમાં કામ કરનારા લોકોની અછત સર્જાવાનો ડર છે.
બંધારણમાં પણ કર્યા મોટા ફેરફાર
વસ્તી અને શ્રમ સંકટને પહોંચી વળવા માટે કિમ જોંગ ઉને માત્ર નિવૃત્તિ વય જ નહીં, પણ અન્ય નિયમો પણ કડક બનાવ્યા છે:
કામ કરવાની ઉંમર: હવે કામ શરૂ કરવાની લઘુત્તમ વય 16 થી વધારીને 17 વર્ષ કરવામાં આવી છે.
મતદાનનો અધિકાર: ચૂંટણી લડવા અને મતદાન કરવા માટે લઘુત્તમ વય 18 વર્ષ નક્કી કરવામાં આવી છે.
નિષ્ણાતો માને છે કે આ ફેરફારો દર્શાવે છે કે ઉત્તર કોરિયા અત્યારે ભયાનક વસ્તી સંકટનો સામનો કરી રહ્યું છે. જો યુવાનોની સંખ્યા નહીં વધે, તો દેશની અર્થવ્યવસ્થા અને સૈન્ય શક્તિ બંને જોખમમાં મુકાઈ શકે છે. આથી જ ‘સનકી કિંગ’ ગણાતા કિમ જોંગ ઉન હવે અનુભવી કર્મચારીઓને વધુ સમય સુધી કામ પર રાખવા માટે મજબૂર બન્યા છે.
