જીએસટી અને નોટબંધીએ લોકોની કમર તોડી, દશેરાએ વાહનોની ખરીદીમાં ભારે ઘટાડો

સામાન્ય રીતે જોઈએ તો તહેવારોમાં લોકો વાહનોની ખરીદી કરતાં હોય છે. દશેરા હોય કે રક્ષા બંધન હોય કોઈ પણ અવસર પ્રસંગ હોય લોકો નાના મોટા વાહનો ખરીદતાં હોય છે. પરંતું આ વખતે દશેરાના દિવસે વાહનોની ખરીદીમાં ભારે નરમાશ જોવા મળી છે. આ વખતે વાહનોના વેચાણમાં જોઈએ તેવો ઉત્સાહ લોકોમાં જોવા મળ્યો નથી. ગયા વર્ષની સરખામણીએ દશેરાના રોજ વેચાતી કારના વેચાણમાં 15 ટકા સુધીનો ઘટાડો થયો હોવાનું ઈન્ડસ્ટ્રીના આંકડા સૂચવે છે. ઓટોમોબાઈલ કંપનીઝ અને ડીલર્સનું કહેવું છે કે વેચાણ ધીમુ છે, નવા મોડેલ્સ લોન્ચ થતા નથી અને નોટબંધી તથા GSTને કારણે ગ્રાહકો હાલ નવી ખરીદીના મૂડમાં નથી. અમદાવાદના હોન્ડા ડીલરશીપના વાઈસ પ્રેસિડન્ટ રજનીશ અરોરા જણાવે છે, “ગયા વર્ષના દશેરાની સરખામણીએ આ વર્ષે વેચાણ ધીમુ પડ્યું છે. વાહનોના વેચાણમાં ઘટાડો જોવા મળ્યો છે. GST આવ્યા પછી બિઝનેસ વધારે ડલ પડી ગયો છે.” નિષ્ણાંતોએ જણાવ્યું કે મોટા ભાગના ઓટોમોબાઈલ ઉત્પાદકોએ નવા મોડેલ્સ લોન્ચ નથી કર્યા. માત્ર હાલમાં જે કાર ચાલી રહી છે તેના ફેસલિફ્ટ વર્ઝન જ લોન્ચ થયા કરે છે. નવા મોડેલ્સ લોન્ચ થાય ત્યારે કારનું વેચાણ વધે છે. આ કારણે પણ વેચાણમાં ઘટાડો થયો હોવાનું મનાઈ છે. દર વર્ષે અષ્ટમીથી દશેરા વચ્ચે 3500 કારની ડિલીવરી થતી હતી. અમદાવાદના હ્યુન્ડાઈ મોટર્સ ઈન્ડિયા લિમિટેડના સૂત્રોના જણાવ્યા મુજબ, “ડીલીવરી વધુ સારી થઈ શકી હોત. આ વખતે કેટલીક પ્રોડક્ટ્સ માટે સારો એવો વેઈટિંગ પિરિયડ છે. અને અમે ડિમાન્ડ પૂરી કરવા સક્ષમ નથી.”આ વર્ષે વાહનની ખરીદીમાં સુસ્તી જોવા મળે છે પરંતુ ઘણા લોકોએ આઠમ અને નોમના રોજ પણ ડીલીવરી લીધી હતી. મહિન્દ્રા કાર્સના ડીલરે જણાવ્યું, “સામાન્ય માન્યતા એવી છે કે ઘણા લોકો શનિવારે ધાતુની વસ્તુ ખરીદતા નથી. દશેરા શનિવારે આવતી હોવાથી અમારા ઘણા ગ્રાહકોએ આઠમ અને નોમના ડીલીવરી લઈ લીધી હતી. આ દિવસો પણ શુભ જ ગણાય છે.