ઓપરેશન સિંદૂર પછી લશ્કરનું નવું કાવતરું: જાણો ક્યાં અને કોના નામ પર બની રહ્યું છે આતંકનું નવું કેન્દ્ર
પાકિસ્તાન પોતાની ધરતી પરથી આતંકવાદી ગતિવિધિઓ બંધ કરવાનું નામ નથી લઈ રહ્યું. ભારતીય સેનાની આકરા પ્રહારો છતાં આતંકી સંગઠન લશ્કર-એ-તૈયબા (LeT) એ ફરી એકવાર ભારત વિરુદ્ધ મોટું કાવતરું ઘડવાનું શરૂ કર્યું છે. ગુપ્તચર એજન્સીઓ (Intelligence Agencies) ના તાજેતરના અહેવાલો અનુસાર, લશ્કર-એ-તૈયબા પાકિસ્તાનના ખૈબર પખ્તુનખ્વા (KPK) પ્રાંતના એબટાબાદમાં એક નવો ‘મરકઝ’ એટલે કે આતંકવાદી તાલીમ કેન્દ્ર તૈયાર કરી રહ્યું છે.
આ એ જ એબટાબાદ શહેર છે જ્યાં વર્ષ ૨૦૧૧માં અમેરિકી સેનાએ ઘૂસીને અલ-કાયદાના વડા ઓસામા બિન લાદેનને ઠાર કર્યો હતો. અહેવાલો મુજબ, ભારતીય સેનાના ‘ઓપરેશન સિંદૂર’ બાદ લશ્કર દ્વારા સ્થાપિત અથવા પુનઃનિર્મિત કરવામાં આવેલું આ પાંચમું મોટું આતંકવાદી માળખું છે, જેનો ખુલાસો ગુપ્તચર રિપોર્ટની તપાસમાં થયો છે.
આતંકી હાફિઝ સઈદના સાળા ‘અબ્દુલ રહમાન મક્કી’ ના નામ પર નવો મરકઝ
સુરક્ષા સૂત્રોના જણાવ્યા અનુસાર, એબટાબાદમાં બની રહેલું આ નવું આતંકવાદી કેન્દ્ર લશ્કરના મુખ્ય સરગના હાફિઝ સઈદના સાળા અને પ્રતિબંધિત આતંકી સંગઠનના વરિષ્ઠ નેતા અબ્દુલ રહમાન મક્કીના નામ પર બનાવવામાં આવી રહ્યું છે. પાકિસ્તાનના પંજાબ પ્રાંતના બહાવલપુરમાં જન્મેલા મક્કીને અમેરિકા અને ભારત સરકારે ઘણા સમય પહેલા જ આંતરરાષ્ટ્રીય આતંકવાદી જાહેર કરેલો છે.
મક્કી લશ્કર-એ-તૈયબા ઉર્ફે જમાત-ઉદ-દાવો (JuD) નો ડેપ્યુટી ચીફ (નાયબ વડો) છે અને તે આ સંગઠનની રાજકીય તેમજ વિદેશી બાબતોની શાખાનો પ્રમુખ રહી ચૂક્યો છે. તે લશ્કરની સર્વોચ્ચ સંચાલક સમિતિ ‘શૂરા’ નો સક્રિય સભ્ય છે. મક્કીને લશ્કરનો મુખ્ય વ્યૂહરચનાકાર અને યુવાનોને જેહાદના નામે ભટકાવીને કટ્ટરપંથી નેટવર્કનો વિસ્તાર કરનારો મુખ્ય મગજ માનવામાં આવે છે.
‘ઓપરેશન સિંદૂર’ ના ડરથી લશ્કરે બદલ્યા પોતાના ઠેકાણા
ગુપ્તચર અહેવાલો અનુસાર, મે ૨૦૨૫ માં ભારતીય સેનાએ પાકિસ્તાન પર કરેલી મોટી સૈન્ય કાર્યવાહી (ઓપરેશન સિંદૂર) દરમિયાન પાકિસ્તાનના પંજાબ પ્રાંતના મુરિદકેમાં આવેલું લશ્કર-એ-તૈયબાનું મુખ્ય મથક (Headquarters) સંપૂર્ણપણે તબાહ થઈ ગયું હતું. આ મોટા ઝટકા બાદ લશ્કરે પંજાબ પ્રાંતમાંથી પોતાની પ્રવૃત્તિઓ સમેટીને ખૈબર પખ્તુનખ્વા (KPK) અને અફઘાનિસ્તાનની સરહદને અડીને આવેલા પહાડી વિસ્તારો તરફ શિફ્ટ કરવાનું શરૂ કર્યું છે, જેથી તેઓ ભારતીય મિસાઈલ હુમલાઓથી બચી શકે.
છેલ્લા કેટલાક મહિનાઓમાં ઓપરેશન સિંદૂર બાદ આતંકી સંગઠનો દ્વારા નવા ઠેકાણા બનાવવાની ગતિવિધિઓ નીચે મુજબ સામે આવી છે:
૨૬ સપ્ટેમ્બર ૨૦૨૫: ખૈબર પખ્તુનખ્વા (KPK) માં આતંકી માળખાનો નવો વિસ્તાર કરાયો.
૧૬ ફેબ્રુઆરી ૨૦૨૬: પાક અધિકૃત કાશ્મીર (PoK) ના કોટલી વિસ્તારમાં આતંકી ગતિવિધિઓ વધી.
૧૨ માર્ચ ૨૦૨૬: મીરપુરમાં લશ્કરના નવા કેન્દ્રની માહિતી મળી.
૧૩ માર્ચ ૨૦૨૬: રાવલાકોટમાં પણ આતંકી કેન્દ્રનો વિસ્તાર કરવામાં આવ્યો.
વર્તમાન સ્થિતિ: હવે એબટાબાદમાં અબ્દુલ રહમાન મક્કીના નામે નવો મરકઝ તૈયાર થઈ રહ્યો છે.
અનાથ બાળકો અને ગરીબ યુવાનોને નિશાન બનાવવાનું ઘાતક ષડયંત્ર
ગુપ્તચર એજન્સીઓએ આ નવા મરકઝને લઈને એક અત્યંત ચિંતાજનક ખુલાસો કર્યો છે. એબટાબાદના આ નવા કેમ્પસમાં ખાસ કરીને અનાથ બાળકો અને ગરીબ યુવાઓની મોટા પાયે ભરતી કરવામાં આવી રહી છે અને તેમનું બ્રેઈનવોશ કરીને કટ્ટરપંથી બનાવવામાં આવી રહ્યા છે.
રિપોર્ટમાં દાવો કરવામાં આવ્યો છે કે આતંકવાદી સંગઠનો જાણીજોઈને એવા યુવાનોને નિશાન બનાવે છે જેઓ સામાજિક અને કૌટુંબિક રીતે એકલા અથવા નબળા હોય. આવા અનાથ બાળકો પાછળ કોઈ પૂછવા વાળું હોતું નથી, જેથી ભવિષ્યમાં જ્યારે તેઓ ભારતમાં આત્મઘાતી હુમલા દરમિયાન માર્યા જાય, ત્યારે પાકિસ્તાની પ્રશાસન કે આતંકી સંગઠનો પર કોઈ કાનૂની કે પારિવારિક જવાબદારી નક્કી ન થઈ શકે. આ લશ્કરની અત્યંત ક્રૂર અને અમાનવીય રણનીતિ છે.
શું હતું ‘ઓપરેશન સિંદૂર’, જેનાથી આતંકીઓ ધ્રૂજી ઉઠ્યા?
ગયા વર્ષે ૨૨ એપ્રિલ ૨૦૨૫ ના રોજ જમ્મુ-કાશ્મીરના પ્રખ્યાત પ્રવાસન સ્થળ પહેલગામમાં આતંકીઓએ કાયરતાપૂર્ણ હુમલો કર્યો હતો, જેમાં ૨૬ નિર્દોષ ભારતીય નાગરિકોના મોત થયા હતા. આ હુમલાનો બદલો લેવા માટે ભારત સરકારે ૭ મે ૨૦૨૫ ના રોજ ‘ઓપરેશન સિંદૂર’ શરૂ કર્યું હતું.
આ ઓપરેશન અંતર્ગત ભારતીય સશસ્ત્ર દળોએ પાકિસ્તાન અને પાક અધિકૃત કાશ્મીર (PoK) ની અંદર ઘૂસીને આતંકી અડ્ડાઓ પર સચોટ મિસાઈલ હુમલા (Precision Missile Strikes) કર્યા હતા. આ ઓપરેશનમાં લશ્કર-એ-તૈયબા અને જૈશ-એ-મોહમ્મદના ૯ મુખ્ય આતંકી ઠેકાણાઓ અને ટ્રેનિંગ કેમ્પોને ધૂળધાણી કરી દેવામાં આવ્યા હતા, જેમાં સેંકડો આતંકીઓ માર્યા ગયા હતા. આ હુમલામાં મુરિદકે સ્થિત લશ્કરના મુખ્યાલયને પણ ભારે નુકસાન થયું હતું, જેની પુષ્ટિ પાછળથી લશ્કરના કમાન્ડરોએ પોતે કરી હતી.
ભારતીય સુરક્ષા એજન્સીઓ એલર્ટ પર
પાકિસ્તાનમાં આતંકી સંગઠનો દ્વારા બદલાઈ રહેલા આ લોકેશન અને નવા આતંકી કેન્દ્રો પર ભારતીય સુરક્ષા એજન્સીઓ અને સેટેલાઇટ દ્વારા ચોવીસે કલાક કડક નજર રાખવામાં આવી રહી છે. રક્ષણ મંત્રાલયના વરિષ્ઠ અધિકારીઓના મતે, આતંકીઓ ભલે ગમે તેટલા નવા ઠેકાણા બદલે કે એબટાબાદ જેવા વિસ્તારોમાં છુપાય, ભારત તેમની દરેક નાપાક હરકતોનો જડબાતોડ જવાબ આપવા માટે સંપૂર્ણ સજ્જ છે. ઓપરેશન સિંદૂર બાદ ભારતીય સેનાની આક્રમક નીતિથી આતંકી આકાઓ ભયના ઓથાર હેઠળ જીવી રહ્યા છે.
