ડાયમંડ સિટી સુરત બન્યું ‘ખાડા નગરી’: ડીંડોલીમાં ચાલુ રસ્તે પાણીનું આખું ટેન્કર ધસી પડ્યું, ચાલકનો જીવ અધ્ધર
સ્માર્ટ સિટી અને ડાયમંડ સિટી તરીકે ઓળખાતું સુરત શહેર હવે ધીમે-ધીમે ‘ખાડા નગરી’ ના સામ્રાજ્યમાં ફેરવાઈ રહ્યું છે. ચોમાસાના સામાન્યથી ભારે વરસાદમાં જ શહેરના લિસ્સા અને ચકચકિત રસ્તાઓની પોલ ખુલી ગઈ છે. શહેરમાં ઠેર-ઠેર ભૂવા પડવા, રસ્તાઓ બેસી જવા અને જીવલેણ ખાડાઓનું સામ્રાજ્ય જોવા મળી રહ્યું છે. આવી જ એક મોટી અને ભયાનક ઘટના સુરતના ડીંડોલી વિસ્તારમાં સામે આવી છે, જ્યાં ચાલુ રસ્તા પર અચાનક રોડ બેસી જતાં પાણીનું એક મોટું ટેન્કર તેમાં ધસી પડ્યું હતું. આ અકસ્માતને પગલે ટેન્કર ચાલકનો જીવ અધ્ધર થઈ ગયો હતો.
ડીંડોલીમાં રસ્તો ધસી પડ્યો: ટેન્કરનું ટાયર ગરકાવ
મળતી માહિતી મુજબ, સુરતના ડીંડોલી વિસ્તારના મુખ્ય માર્ગ પરથી જ્યારે એક પાણીનું ભારે ભરખમ ટેન્કર પસાર થઈ રહ્યું હતું, ત્યારે અચાનક રસ્તાનો એક મોટો હિસ્સો કડડભૂસ થઈને બેસી ગયો હતો. રસ્તો એટલી હદે બેસી ગયો કે ટેન્કરનું પાછળનું આખું ટાયર જમીનમાં ગરકાવ થઈ ગયું હતું અને ટેન્કર એકતરફ નમી પડ્યું હતું.
અચાનક બનેલી આ ઘટનાથી આસપાસના લોકોમાં અફરાતફરી મચી ગઈ હતી. ટેન્કર ચાલક કંઈ સમજે તે પહેલાં જ ગાડી હવામાં ફસાઈ ગઈ હતી, જેના કારણે તેનો જીવ તાળવે ચોંટ્યો હતો. સદનસીબે, ટેન્કર પલટી ન ખાતાં ચાલકનો આબાદ બચાવ થયો હતો અને કોઈ મોટી જાનહાનિ નોંધાઈ નથી. પરંતુ આ ઘટનાએ સુરત મહાનગરપાલિકા (SMC) ના પ્રી-મોન્સૂન પ્લાનિંગ અને રોડ બાંધકામની ગુણવત્તાના લીરેલીરા ઉડાડી દીધા છે.
સ્માર્ટ સિટીના રસ્તાઓ પત્તાના મહેલની જેમ બેસી રહ્યા છે
સુરત શહેરમાં ભારે વરસાદ બાદ રોડ બેસી જવાની આ કોઈ પહેલી ઘટના નથી. છેલ્લા થોડા દિવસોમાં જ શહેરના અલગ-અલગ વિસ્તારોમાંથી રસ્તાઓ ધસી પડવાની અને કમરતોડ ખાડાઓની અસંખ્ય ફરિયાદો ઉઠી છે. કરોડો રૂપિયાના ખર્ચે બનેલા રોડ-રસ્તાઓ વરસાદના સામાન્ય પાણીમાં ધોવાઈ રહ્યા છે અથવા તો જમીનમાં ધસી રહ્યા છે. કોન્ટ્રાક્ટરો અને પાલિકાના ભ્રષ્ટ અધિકારીઓની મિલીભગતને કારણે વપરવામાં આવેલી હલકી ગુણવત્તાની સામગ્રી હવે જનતા માટે જીવનું જોખમ બની ગઈ છે.
તંત્રના આંખ આડા કાન: જનતા પૂછી રહી છે સવાલ
શહેરમાં ઠેર-ઠેર સર્જાયેલી આ નરકાગાર જેવી સ્થિતિ છતાં પાલિકા તંત્રના જવાબદાર અધિકારીઓ હજુ પણ આંખ આડા કાન કરીને બેઠા છે. સ્થાનિક રહીશોમાં તંત્ર સામે ભારે રોષ જોવા મળી રહ્યો છે. ડીંડોલીના એક સ્થાનિક નાગરિકે રોષે ભરાતા જણાવ્યું કે, “અમે નિયમિત ટેક્સ ભરીએ છીએ, તો શું અમને આવા ખાડાવાળા અને જોખમી રસ્તાઓ મળવા જોઈએ? પાલિકાના અધિકારીઓ એરકન્ડિશન્ડ ઓફિસોમાંથી બહાર નીકળીને જુએ કે સામાન્ય જનતા કઈ રીતે જીવના જોખમે રસ્તા પરથી પસાર થઈ રહી છે. શું તંત્ર કોઈ વાહનચાલકનો જીવ જાય તેની રાહ જોઈ રહ્યું છે?”
