‘મારો ઈરાદો ક્યારેય નહોતો…’: E20 પેટ્રોલ પર વિવાદ વધતાં પ્રખ્યાત વ્લોગર સૌરવ જોશીનો મોટો યુ-ટર્ન, મર્સિડીઝે આપવી પડી સ્પષ્ટતા
ભારતના સૌથી લોકપ્રિય અને કરોડો સબસ્ક્રાઇબર્સ ધરાવતા દૈનિક વ્લોગર સૌરવ જોશી (Sourav Joshi) ફરી એકવાર ચર્ચાના કેન્દ્રમાં આવ્યા છે. જોકે આ વખતે ચર્ચા તેમના કોઈ સાહસિક વ્લોગને કારણે નહીં, પરંતુ તેમની લક્ઝરી મર્સિડીઝ-બેન્ઝ (Mercedes-Benz) કાર અને દેશમાં ઝડપથી ફેલાઈ રહેલા E20 પેટ્રોલને લઈને ઊભા થયેલા વિવાદના કારણે છે. પોતાની લક્ઝરી SUV કારમાં માઈલેજના મોટો ઘટાડા માટે E20 ઇંધણને જવાબદાર ઠેરવ્યા બાદ, ઓટોમોબાઈલ કંપનીની સ્પષ્ટતા આવતા જ સૌરવ જોશીએ હવે યુ-ટર્ન લીધો છે અને સાર્વજનિક રૂપે માફી માંગી છે.
શું હતો સમગ્ર વિવાદ? સૌરવ જોશીનો દાવો
તાજેતરમાં જ સૌરવ જોશીએ પોતાના યુટ્યુબ વ્લોગમાં એક ચોંકાવનારો દાવો કર્યો હતો. તેમણે પોતાના વીડિયોમાં દર્શકોને જણાવ્યું કે તેમની કરોડોની કિંમતની જર્મન લક્ઝરી SUV કારનું માઈલેજ માત્ર 48 કલાકની અંદર જ ધડામ દઈને નીચે આવી ગયું છે.
જોશીએ વીડિયોમાં કારનું ડિજિટલ મીટર બતાવતા કહ્યું હતું કે:
“ગઈકાલે મેં તમને બતાવ્યું હતું કે આપણી કારનું માઇલેજ 17 કિલોમીટર પ્રતિ લીટરથી ઘટીને સીધું 9 થઈ ગયું છે. અને શું તમે જાણો છો કે આજે તેની શું સ્થિતિ છે? આજે આ માઈલેજ ઘટીને માત્ર 5 પર પહોંચી ગયું છે… આ જુઓ, તે સ્ક્રીન પર માત્ર 5 નું માઇલેજ બતાવી રહ્યું છે.”
આ તીવ્ર ઘટાડા માટે જોશીએ સીધો દોષ સ્થાનિક પેટ્રોલ પંપો પર મળતા E20 (20% ઇથેનોલ મિશ્રિત) પેટ્રોલ પર ઢોળ્યો હતો. તેમણે ચિંતા વ્યક્ત કરી હતી કે પેટ્રોલની આખી ટાંકી જે પહેલાં લગભગ 800 કિલોમીટરની ડ્રાઇવિંગ રેન્જ આપતી હતી, તે હવે રિફ્યુઅલિંગ પછી માત્ર 480 કિલોમીટરની રેન્જ બતાવે છે. જોશીએ ડર વ્યક્ત કર્યો હતો કે આ ઇંધણને કારણે તેમની કારનું એન્જિન ગમે ત્યારે બગડી શકે છે અને હવે તેમને પેટ્રોલ ભરાવવામાં પણ ડર લાગી રહ્યો છે.
મર્સિડીઝ-બેન્ઝ ઈન્ડિયાએ જારી કરવી પડી ગ્રાહક એડવાઈઝરી
ભારતના સૌથી મોટા વ્લોગર દ્વારા કરાયેલા આ દાવા બાદ સોશિયલ મીડિયા પર E20 પેટ્રોલને લઈને ભારે હોબાળો મચી ગયો હતો. અફવાઓ અને ગભરાટનું વાતાવરણ ન સર્જાય તે માટે લક્ઝરી કાર નિર્માતા કંપની મર્સિડીઝ-બેન્ઝ ઈન્ડિયાએ તાત્કાલિક એક સત્તાવાર ગ્રાહક એડવાઈઝરી (Customer Advisory) જારી કરવી પડી હતી.
કંપનીએ પોતાના નિવેદનમાં સૌરવ જોશીનું નામ લીધા વિના E20 પેટ્રોલ અંગેની તમામ આશંકાઓને ફગાવી દીધી હતી. કંપનીએ જણાવ્યું:
“મર્સિડીઝ-બેન્ઝ માટે ગ્રાહકોની સલામતી, વાહનની વિશ્વસનીયતા અને શ્રેષ્ઠ પ્રદર્શન હંમેશા સર્વોપરી છે. મર્સિડીઝ-બેન્ઝના તમામ પેટ્રોલ BS VI (Bharat Stage 6) વાહનો E20 ઇંધણ સાથે ભૌતિક રીતે સંપૂર્ણ સુસંગત છે અને સંબંધિત સરકારી સત્તાવાળાઓ દ્વારા તે મુજબ પ્રમાણિત કરવામાં આવ્યા છે. અમે કોઈપણ તકનીકી પ્રશ્નો માટે ગ્રાહકોને સહકાર આપવા તત્પર છીએ.”
સૌરવ જોશીની માફી અને યુ-ટર્ન
મર્સિડીઝ કંપની દ્વારા સત્તાવાર સ્પષ્ટતા આવ્યા બાદ અને સર્વિસ સેન્ટરની તપાસ પછી સૌરવ જોશીએ સોશિયલ મીડિયા પર પોતાની ભૂલ સ્વીકારી લીધી છે. તેમણે સ્પષ્ટ કર્યું કે વાહનમાં માઈલેજનો ઘટાડો ઇંધણને કારણે નહીં પરંતુ એન્જિનની આંતરિક ખામીને કારણે હતો.
તેમણે એક પોસ્ટ શેર કરીને જણાવ્યું:
“અમે મર્સિડીઝ સર્વિસ સેન્ટરની મુલાકાત લીધી હતી, જ્યાં ટેકનિશિયનોને જાણવા મળ્યું કે કારના એન્જિનમાં જ કંઈક સમસ્યા હતી, જેના કારણે માઇલેજ ઓછું થઈ રહ્યું હતું. મારો ઈરાદો ક્યારેય કોઈ ખોટી માહિતી ફેલાવવાનો નહોતો. E20 પેટ્રોલ અંગે થયેલી ગેરસમજ બદલ હું દિલગીર છું અને માફી માંગુ છું.”
જોશીએ વધુમાં ઉમેર્યું કે તેમણે પોતાના વ્લોગમાંથી એ વિવાદાસ્પદ ભાગને કાપી (ટ્રીમ કરી) નાખ્યો છે. જોકે, ત્યાં સુધીમાં આ વીડિયો ક્લિપ અન્ય સોશિયલ મીડિયા પ્લેટફોર્મ્સ જેમ કે ટ્વિટર (X) અને ઇન્સ્ટાગ્રામ પર જોરદાર વાયરલ થઈ ચૂકી હતી.
શું છે E20 ઇંધણ અને કેમ મચ્યો છે વિવાદ?
E20 ઇંધણ એટલે શું?
E20 પેટ્રોલ એ 80 ટકા પરંપરાગત પેટ્રોલ અને 20 ટકા ઇથેનોલ (જે મોટે ભાગે શેરડી અથવા અનાજમાંથી બને છે) નું મિશ્રણ છે. ભારત સરકાર પ્રદૂષણ ઘટાડવા અને કાચા તેલની આયાત પર નિર્ભરતા ઓછી કરવા માટે દેશભરમાં ઝડપથી E20 પેટ્રોલનો વ્યાપ વધારી રહી છે.
ચિંતાનું કારણ:
વાહન ચાલકોમાં એવી ચિંતા છે કે E20 ઇંધણ જૂના વાહનોના એન્જિનના પાર્ટ્સ (જેવા કે રબર ટ્યુબ અને પિસ્ટન) ને નુકસાન પહોંચાડી શકે છે અને તેનાથી વાહનની એવરેજ (માઇલેજ) માં થોડો ઘટાડો થાય છે.
સરકારનો પક્ષ: દેશને થયો ₹1.90 લાખ કરોડનો ફાયદો
આ વિવાદો વચ્ચે સરકારે પણ શુક્રવારે ઇથેનોલ-મિશ્રિત પેટ્રોલ પ્રોગ્રામનો જોરદાર બચાવ કર્યો હતો. સરકારે સ્પષ્ટ કર્યું છે કે આ નીતિથી દેશના અર્થતંત્રને મોટો વેગ મળ્યો છે.
