ગાંધીધામમાં ધોળા દિવસે સશસ્ત્ર ધાડ પાડનારી ગેંગના સાત સાગરીતો ઝડપાયા: પોલીસે ઘટનાસ્થળે લઈ જઈ મુખ્ય ચાર આરોપીઓનું કરાવ્યું કરપ્શન રીકન્ટ્રકશન
કચ્છના આર્થિક પાટનગર ગણાતા ગાંધીધામ શહેરમાં કાયદો અને વ્યવસ્થાની સ્થિતિ સામે સવાલ ખડા કરતી એક ચોંકાવનારી ઘટના સામે આવી છે. ગાંધીધામના હાર્દ સમાન ગણેશ નગર વિસ્તારમાં આવેલા એક રહેણાંક મકાનમાં થોડા દિવસો પહેલાં ધોળા દિવસે ત્રાટકેલી હથિયારધારી ટોળકીએ પરિવારને બંધક બનાવી લૂંટ ચલાવી હતી. ધોળા દિવસે થયેલી આ ધાડ અને લૂંટની ઘટનાથી સમગ્ર પંથકના રહિશોમાં ભારે ફય અને ફફડાટ વ્યાપી ગયો હતો. જો કે, ઘટનાની ગંભીરતાને ધ્યાને લઈ તુરંત એક્શનમાં આવેલી સ્થાનિક પોલીસ અને એલ.સી.બી.ની ટીમે ગણતરીના દિવસોમાં જ આ ગુનાનો પર્દાફાશ કરીને ધાડ અને લૂંટના ગુનામાં સામેલ સાત જેટલા રીઢા આરોપીઓને દબોચી લીધા છે.
તપાસને વધુ સચોટ બનાવવા માટે પોલીસે પકડાયેલા તસ્કરો પૈકીના મુખ્ય ચાર આરોપીઓને ચુસ્ત પોલીસ બંદોબસ્ત વચ્ચે ગણેશ નગર સ્થિત ઘટનાસ્થળે લઈ જઈ ગુનાનું રીકન્ટ્રકશન (પુનઃ દ્રશ્ય નિર્માણ) કરાવ્યું હતું.
ધોળા દિવસે ઘરમાં ઘૂસી પરિવારને બંધક બનાવ્યો
પોલીસ સૂત્રો પાસેથી મળતી સત્તાવાર વિગતો અનુસાર, ગણેશ નગર વિસ્તારમાં બનેલી આ ઘટના પૂર્વ આયોજિત કાવતરાનો ભાગ હતી. આરોપીઓ તીક્ષ્ણ હથિયારો સાથે રહેણાંક મકાનમાં ત્રાટક્યા હતા. તે સમયે ઘરમાં હાજર સભ્યો કંઈ સમજે તે પહેલાં જ ધાડપાડુઓએ હથિયાર બતાવી તમામને એક ખૂણામાં બંધક બનાવી દીધા હતા. ધોળા દિવસે ઘરમાં ઘૂસેલા અજાણ્યા સશસ્ત્ર શખ્સોને જોઈ પરિવારના સભ્યો ડરી ગયા હતા અને જીવ બચાવવા કાલાવાલા કરવા લાગ્યા હતા.
આરોપીઓએ ઘરમાં રાખેલી તિજોરી તેમજ અન્ય કબાટો ફંફોસીને લૂંટ ચલાવી હતી. લૂંટારુઓ ઘરમાંથી દશ હજાર રૂપિયાની રોકડ રકમ તેમજ આંગણામાં પાર્ક કરેલું જ્યુપિટર સ્કૂટર લઈને ધોળા દિવસે જાહેર માર્ગો પરથી રફુચક્કર થઈ ગયા હતા.
લોકોમાં વ્યાપેલો ભય અને પોલીસની એક્શન મોડ
ભરચક અને સામાન્ય રીતે વ્યસ્ત રહેતા ગણેશ નગર વિસ્તારમાં ધોળા દિવસે થયેલી આ સશસ્ત્ર ધાડની ખબર વાયુવેગે પ્રસરતા જ સમગ્ર ગાંધીધામના વેપારીઓ અને સ્થાનિક લોકોમાં ભારે ભયનો માહોલ જોવા મળ્યો હતો. ઘટના અંગે પોલીસને જાણ કરાતા જ ઉચ્ચ અધિકારીઓ સહિતનો કાફલો ઘટનાસ્થળે દોડી ગયો હતો.
પોલીસે તુરંત જ ભોગ બનનાર પરિવારની ફરિયાદના આધારે ગુનો નોંધી અલગ-અલગ ટીમો બનાવી તપાસના ચક્રો ગતિમાન કર્યા હતા. આસપાસના સીસીટીવી ફૂટેજ, હ્યુમન ઇન્ટેલિજન્સ અને ટેકનિકલ સર્વેલન્સની મદદથી પોલીસે બાતમીદારો સક્રિય કર્યા હતા. પોલીસની રાત-દિવસની મહેનત બાદ આખરે આ લૂંટને અંજામ આપનાર ટોળકીના સગડ મળ્યા હતા અને પોલીસે વિવિધ સ્થળોએ દરોડા પાડીને ધાડમાં સામેલ સાતેય આરોપીઓને દબોચી લીધા હતા.
મુખ્ય ચાર આરોપીઓ સાથે ક્રાઈમ સીનનું રીકન્ટ્રકશન
સાતેય આરોપીઓની ધરપકડ કર્યા બાદ પોલીસે તેમની આકરી પૂછપરછ હાથ ધરી હતી. પૂછપરછ દરમિયાન આ લૂંટમાં કોની શું ભૂમિકા હતી તેની વિગતો સામે આવી હતી. આ કેસમાં કાયદાકીય પુરાવાઓ વધુ મજબૂત કરવાના હેતુથી તપાસ કરનાર અધિકારીઓ દ્વારા લૂંટના મુખ્ય ચાર આરોપીઓને કડક સુરક્ષા વચ્ચે ફરીથી ગણેશ નગરના એ જ મકાને લઈ જવામાં આવ્યા હતા.
રીકન્ટ્રકશનની કાર્યવાહી: પોલીસે ગુનાવાળી જગ્યાએ આરોપીઓ કઈ રીતે ઘરમાં ઘૂસ્યા, તેમણે પરિવારના સભ્યોને કઈ જગ્યાએ અને કઈ રીતે હથિયાર બતાવીને બંધક બનાવ્યા, રોકડા રૂપિયા ક્યાંથી લીધા અને કયા રસ્તેથી તેઓ જ્યુપિટર લઈને ભાગ્યા હતા – તે તમામ બાબતોનું લાઈવ રીકન્ટ્રકશન કરાવ્યું હતું. આ કાર્યવાહી જોવા માટે આસપાસના લોકોના ટોળેટોળાં ઉમટી પડ્યા હતા.
