Surat News સુરતના ડિજિટલ અરેસ્ટમાં હવાલા રેકેટની આશંકા, કમ્બોડીયાથી વાયા ચીન સુધીની માયાજાળ, આર્થિક માફિયા જનરલ ફેમિલીના કૌભાંડીઓ ભૂગર્ભમાં
સુરતના ઘોડદોડ સ્થિતિ રિટાયર બેંક કર્મચારીની ડિજિટલ અરેસ્ટ કરીને એક કરોડ રુપિયા કરતાં વધુની રકમ પડાવી લેવાના સાયબર ક્રાઈમના કેસમાં પોલીસે ચોકબજાર, ભાગતળાવ ખાતે રહેતા આમીર પીરભાઈને હાજર થવાનું સમન્સ મોકલ્યા બાદ અ પ્રકરણમાં હવે નવો વળાંક આવી રહ્યો છે.
આધારભૂત સૂત્રો પાસેથી મળી રહેલી માહિતી મુજબ જનરલ ફેમિલી સાથે ધરોબો ધરાવતા અશફાક,ઉંમર અને યુસુફ દ્વારા કેટલાક યુવાનોને રુપિયાની લાલચ આપી બેંક એકાઉન્ટ ભાડે લઈને લોકોને ડરાવી, ધમકાવીને રુપિયા ઉસેટી લેવાનો કૌભાંડ વર્ષોથી ચાલી આવી રહ્યું છે. દરેક વખતે આ જનરલ ફેમિલીવાળા આર્થિક માફિયાઓ યેનકેન રીતે પોલીસ તપાસમાથી છટકી જતા હોવાની ચર્ચા ચાલી રહી છે. અત્યાર સુધીનાં આ આર્થિક માફિયાઓએ ઓછામાં ઓછા 500 જેટલા બેંક એકાઉન્ટમાં કરોડો રુપિયાની હેરફેર કરી હવાલાનું મસમોટું કૌભાંડ આચર્યું હોવાનું ચર્ચાઈ રહ્યું છે. આ અંગે પોલીસ તપાસ કરશે તો આંતરરાષ્ટ્રીય સ્તરે મોટા હવાલા કૌભાંડ અને મની લોન્ડરીંગનો પર્દાફાશ થવાની શક્યતા નકારી શકાતી નથી.
સૂત્રોના જણાવ્યા મુજબ આ આર્થિક માફિયાઓ દ્વારા ડિજિટલ અરેસ્ટનું રેકેટ કમ્બોડીયાથી લઈ ચીન અને ભારત દેશમાં ચલાવવામાં આવી રહ્યું હોવાની આશંકા છે. સુરત સાયબર ક્રાઈમ સેલ દ્વારા પાશેરમાં પહેલી પૂણીની જેમ આ આર્થિક માફિયાઓ કેસ કર્યો છે. જોકે, આ પહેલાં મુંબઈના ડોંગરી પોલીસ સ્ટેશનમાં ઉંમરની સામે તપાસ કરવામાં આવી હતી. 19-04-2024માં જનરલ ફેમિલીના ઉંમરની ધરપકડ સુદ્વાં કરવામાં આવી હતી જ્યારે અન્ય એકને યેનકેન રીતે સમગ્ર કેસમાંથી છટકાવી દેવામાં આવ્યો હતો.
વિગતો મુજબ પોલીસ તપાસનો રેલો જનરલ ફેમિલી સુધી પહોંચે તે પહેલાં આમીર પીરભાઈ ભાગી છૂટ્યો છે જ્યારે જનરલ પિતા-પુત્રો પણ ભૂગર્ભમાં ઉતરી ગયા હોવાનું જાણવા મળી રહ્યું છે. એવી ચર્ચા છે કે ભાગાતળાવ વિસ્તારમા મોટાપાયા ચાલી રહેલા વ્યાજખોરીના ગોરખધંધામાં પણ જનરલોની ભૂંડી ભૂમિકા હોવાનું બહાર આવી રહ્યું છે. પોલીસ તપાસમાં એક પછી એક મોટા ઘટસ્ફોટ થવાની શક્યતા રહેલી છે. હાલમાં પોલીસે 8 જેયલા લોકોની ડિજિટલ અરેસ્ટ સ્કેમમાં ધરપકડ કરી છે.
મહત્વની વાત એ છે ડિજિટલ અરેસ્ટ અને હવાલા રેકેટમાં જમાઈ અહેમદની પણ સંડોવણી હોવાની શંકાના આધારે તપાસ કરવામાં આવી રહી છે.
