અદાણી ગ્રુપની ‘વંદે ભારતમ’ પહેલને દેશભરમાંથી બમ્પર પ્રતિસાદ: ૨૬,૦૦૦થી વધુ અરજીઓમાંથી પ્રથમ બેચ પસંદ
અદાણી ગ્રુપના ચેરમેન ગૌતમ અદાણીના નેતૃત્વ હેઠળ જડમૂળના સ્તરેથી નવીનતા અને ઉદ્યોગ સાહસિકતાને પ્રોત્સાહન આપવા માટે શરૂ કરવામાં આવેલી ‘વંદે ભારતમ’ પહેલને દેશભરમાંથી અભૂતપૂર્વ પ્રતિસાદ મળ્યો છે. સમગ્ર ભારતના તમામ રાજ્યો અને કેન્દ્રશાસિત પ્રદેશોમાંથી મળેલી ૨૬,૦૦૦થી વધુ અરજીઓનું ઊંડાણપૂર્વક મૂલ્યાંકન કર્યા બાદ નવોદિત સંશોધકોના પ્રથમ જૂથની (First Cohort) સત્તાવાર પસંદગી કરવામાં આવી છે.
આ પહેલ અંતર્ગત ગતિશીલતા (Mobility), ટકાઉપણું (Sustainability), આર્ટિફિશિયલ ઇન્ટેલિજન્સ તથા ટેકનોલોજી, કૃષિ, સંરક્ષણ, આરોગ્ય સંભાળ, ઉત્પાદન અને શિક્ષણ જેવા વિવિધ મહત્વપૂર્ણ ક્ષેત્રોમાં દેશની જટિલ સમસ્યાઓ ઉકેલતા અને રુચિકર વિચારો રજૂ કરવામાં આવ્યા હતા. વિવિધ પ્રદેશો અને ભિન્ન પૃષ્ઠભૂમિ ધરાવતા આ સંશોધકો રાષ્ટ્ર-નિર્માણના સંકલ્પ સાથે એક વિશાળ મંચ પર ભેગા થયા છે.
“પ્રતિભા દરેક જગ્યાએ વસે છે”: ગૌતમ અદાણી
‘વંદે ભારતમ’નો મુખ્ય ઉદ્દેશ્ય એ વિચારધારા પર આધારિત છે કે તકો ભલે દરેક જગ્યાએ સરળતાથી ઉપલબ્ધ ન હોય, પરંતુ પ્રતિભા દેશના દરેક ખૂણે વસે છે. આ પહેલ આશાસ્પદ નવીન વિચારકોને દેશના શ્રેષ્ઠ માર્ગદર્શકો, ઉદ્યોગ જગતના માંધાતાઓ અને આધુનિક સંસાધનો સાથે જોડીને તેમના વિચારોને સફળ વ્યાવસાયિક સાહસોમાં પરિવર્તિત કરશે. આ વિચાર અદાણી ગ્રુપના ચેરમેન ગૌતમ અદાણીની એ દ્રઢ માન્યતા પર આધારિત છે કે જે દેશે આપણને સપનાં જોવાની, નિર્માણ કરવાની અને આગળ વધવાની તક આપી છે, તેને સમાજ અને રાષ્ટ્રહિતમાં કંઈક પાછું આપવું જોઈએ.
પ્રથમ સમૂહની પસંદગી પ્રસંગે ગૌતમ અદાણીએ જણાવ્યું હતું કે, “જ્યારે હું આ નવોદિત સંશોધકોને જોઉં છું, ત્યારે મને તેમનામાં આવતીકાલના સમૃદ્ધ ભારતની અફાટ સંભાવનાઓ દેખાય છે. જે રીતે પ્રતિભાને કોઈ ભૌગોલિક સીમાઓ બાંધી શકતી નથી, તેવી જ રીતે ઉત્કૃષ્ટ તકો માટે પણ કોઈ મર્યાદાઓ હોવી જોઈએ નહીં. વર્ષો પછી જ્યારે આપણે આ ક્ષણ તરફ પાછળ ફરીને જોઈશું, ત્યારે આ પ્રથમ જૂથમાં એવા સ્થાપકો જોવા મળશે જેણે ભારતના આર્થિક અને સામાજિક પરિવર્તનમાં મોટું યોગદાન આપ્યું હશે.”
૧૪ ઓગસ્ટે યોજાશે ગ્રાન્ડ ફિનાલે
બહુવિધ તબક્કાની કડક મૂલ્યાંકન પ્રક્રિયામાંથી પસાર થઈને પસંદ થયેલું આ પ્રથમ સમૂહ ‘વંદે ભારતમ એકાગ્ર સપ્તાહ’ (Intensive Week) માં ભાગ લેશે. આ ગહન કાર્યક્રમ દરમિયાન ઉદ્યોગસાહસિકો, વ્યાવસાયિક અગ્રણીઓ અને વિવિધ ક્ષેત્રોના નિષ્ણાતો દ્વારા ખાસ માર્ગદર્શન સત્રો યોજાશે. આ કાર્યક્રમનું ભવ્ય સમાપન ૧૪ ઓગસ્ટના રોજ ‘વંદે ભારતમ ગ્રાન્ડ ફિનાલે’ સાથે થશે, જેમાં ઉત્કૃષ્ટ નવીન વિચારકોને પ્રતિષ્ઠિત ‘વંદે ભારતમ ટ્રોફી’ આપીને સન્માનિત કરવામાં આવશે.
‘વંદે ભારતમ’ માત્ર એક સામાન્ય સ્પર્ધા નથી, પરંતુ ભારતના પરંપરાગત ઉદ્યોગસાહસિક કેન્દ્રોથી આગળ વધીને છેવાડાના વિસ્તારો સુધી પહોંચવાનો એક રાષ્ટ્રીય સંકલ્પ છે, જે નવી પેઢીના વિચારકોને તેમની પ્રગતિની સફરમાં નવી ઉડાન આપશે.
