ચીનમાં ‘ટાઈફૂન ડોલ્ફિન’નો ભયાનક આતંક: શંઘાઈમાં 1,300થી વધુ ફ્લાઈટ્સ રદ, લાખો લોકોનું સ્થળાંતર
કુદરતી આફતો સામે ઝઝૂમી રહેલા પૂર્વ એશિયામાં હવે એક નવું સંકટ આવી પડ્યું છે. ચીન અને તેના આસપાસના વિસ્તારોમાં ‘ટાઈફૂન ડોલ્ફિન’ (Typhoon Dolphin) વાવાઝોડાએ ભારે તબાહી મચાવવાનું શરૂ કરી દીધું છે. વાવાઝોડાના સક્રિય થવાથી ચીનના સૌથી મોટા આર્થિક કેન્દ્ર ગણાતા શંઘાઈ શહેર સહિત આસપાસના તટીય વિસ્તારોમાં ભારે અફરાતફરીનો માહોલ સર્જાયો છે. આ કુદરતી આપત્તિના કારણે હવાઈ, દરિયાઈ અને માર્ગ વાહનવ્યવહાર સંપૂર્ણપણે અસ્તવ્યસ્ત થઈ ગયો છે.
સ્થિતિની ગંભીરતાને ધ્યાનમાં રાખીને ચીની સરકારે હાઈએલર્ટ જાહેર કર્યું છે. શંઘાઈના બે મુખ્ય એરપોર્ટ પરથી 1,300થી વધુ ઉડાન રદ કરવી પડી છે, જ્યારે ઝેજિયાંગ અને ફુજિયાન જેવા તટીય પ્રાંતોમાંથી લાખો લોકોને સુરક્ષિત સ્થળોએ ખસેડવામાં આવ્યા છે. વાવાઝોડાને કારણે આગામી દિવસોમાં ભયાનક પૂર અને ભૂસ્ખલનની આશંકા વ્યક્ત કરવામાં આવી રહી છે.
તાઇવાનમાં વાવાઝોડાનો પ્રારંભિક પ્રહાર
ચીનના મુખ્ય ભૂમિભાગ પર ત્રાટકે તે પહેલા ‘ટાઈફૂન ડોલ્ફિન’ના બાહ્ય ભાગોએ ઉત્તરી તાઈવાનમાં ભારે વિનાશ નોતર્યો છે. શનિવારથી જ ઉત્તરી તાઈવાન અને તેની રાજધાની તાઈપેઈમાં મુસળધાર વરસાદ અને ગતિશીલ પવનો શરૂ થઈ ગયા હતા. પવનની તીવ્ર ગતિ અને વિઝિબિલિટી ઘટી જવાના કારણે તાઈવાનની અનેક એરલાઈન્સે ચીન તરફ જતી પોતાની તમામ રવિવારની ફ્લાઈટો રદ કરી દીધી હતી.
તાઈવાનના દરિયાકાંઠાના વિસ્તારોમાં વિશાળ મોજાં ઉછળવાના શરૂ થઈ ગયા છે અને સરેરાશ 162 કિલોમીટર પ્રતિ કલાકની ઝડપે ફુંકાઈ રહેલા પવનોને કારણે વૃક્ષો તથા વીજળીના થાંભલાઓને ભારે નુકસાન પહોંચ્યું છે.
શંઘાઈ એરપોર્ટ પર 60 ટકા ઉડાન રદ: હવાઈ વાહનવ્યવહાર ઠપ્પ
ચીનના આર્થિક કેન્દ્ર શાંઘાઈના એરપોર્ટ પર વાવાઝોડાની સૌથી ખરાબ અસર જોવા મળી છે. રવિવારે, શાંઘાઈના બે સૌથી મોટા એરપોર્ટ – હોંગકિયાઓ અને પુડોંગથી ચાલતી લગભગ 60 ટકા ફ્લાઇટ્સ રદ કરવાનો કઠોર નિર્ણય લેવામાં આવ્યો હતો.
સ્થાનિક સરકારી મીડિયાના અહેવાલો મુજબ, બંને એરપોર્ટ પરથી રદ કરાયેલી ઉડાનની સંખ્યા 1,300ને પાર કરી ગઈ છે. એરપોર્ટ પર હજારો મુસાફરો અટવાઈ પડ્યા છે અને એરલાઈન્સ કંપનીઓ મુસાફરોને ટિકિટના પૈસા રિફંડ કરવા અથવા રિ-શેડ્યૂલ કરવાની કામગીરીમાં લાગી ગઈ છે. માત્ર ચીન અંદરની ફ્લાઈટ્સ જ નહીં, પરંતુ આંતરરાષ્ટ્રીય ફ્લાઈટ્સના શિડ્યુલને પણ આ વાવાઝોડાએ બુરી રીતે પ્રભાવિત કર્યું છે.
3.9 લાખથી વધુ લોકોનું ભયાનક સ્થળાંતર
દરિયાઈ વિસ્તારોમાં વાવાઝોડું પ્રવેશવાના ભયને કારણે ચીની પ્રશાસન કોઈ જોખમ લેવા માંગતું નથી. ઝેજિયાંગ પ્રાંતના ‘તાઈઝોઉ’ શહેરમાંથી જ શનિવાર સાંજ સુધીમાં આશરે 3.9 લાખ લોકોને સલામત સ્થળે ખસેડી લેવામાં આવ્યા છે. તેવી જ રીતે, શંઘાઈના નીચાણવાળા અને જોખમી વિસ્તારોમાંથી પણ 30,000થી વધુ નાગરિકોને અસ્થાયી રાહત શિબિરોમાં ખસેડવામાં આવ્યા છે.
સ્થળાંતર કરાયેલા લોકો માટે ખોરાક, પીવાના પાણી અને દવાઓની વ્યવસ્થા કરવા માટે ચીનની ઈમરજન્સી મેનેજમેન્ટ ટીમો સતત કાર્યરત છે. તટીય ગામડાઓમાંથી લોકોને સુરક્ષિત સ્થળે પહોંચાડવા માટે બસો અને સ્પેશિયલ વાહનોની મદદ લેવામાં આવી રહી છે.
400 મીમી સુધીના અતિભારે વરસાદની ચેતવણી
ચીનના હવામાન વિભાગના પૂર્વાનુમાન અનુસાર, આ વાવાઝોડું ઝેજિયાંગ પ્રાંત અને તેની પડોશમાં આવેલા ફુજિયાન પ્રાંતના ઉત્તરી વિસ્તારોમાંથી પસાર થઈ રહ્યું છે. આ દરમિયાન તટીય વિસ્તારોમાં ભારેથી અતિભારે વરસાદની શક્યતા છે.
હવામાન શાસ્ત્રીઓના મતે આગામી બે થી ત્રણ દિવસમાં આ પ્રદેશોમાં 200 થી 400 મિલીમીટર જેટલો આંધી સાથેનો વરસાદ પડી શકે છે. આટલા ટૂંકા ગાળામાં આટલો બધો વરસાદ પડવાના કારણે પહાડી વિસ્તારોમાં ગંભીર ભૂસ્ખલન (Landslides) અને નીચાણવાળા વિસ્તારોમાં જળબંબાકારની સ્થિતિ સર્જાવવાની પૂરેપૂરી ભીતિ છે.
દરિયાઈ પ્રવૃત્તિઓ પર સંપૂર્ણ પ્રતિબંધ અને રાહત કામગીરી
ઝેજિયાંગ પ્રાંતિય સરકારે તાત્કાલિક અસરથી તમામ દરિયાઈ અને જળ- આધારિત પ્રવૃત્તિઓ પર રોક લગાવી દીધી છે. તમામ પ્રકારની ફેરી સર્વિસ, ટૂરિસ્ટ ક્રૂઝ અને માછીમારીની બોટોને દરિયામાં જવાથી સખત મનાઈ ફરમાવવામાં આવી છે. જે બોટો દરિયામાં હતી તેમને તાત્કાલિક બંદરો પર પાછી બોલાવી લેવામાં આવી છે.
ચીન સરકારના ઉચ્ચ અધિકારીઓએ તમામ બચાવ અને રાહત એજન્સીઓને ‘હાઈ એલેર્ટ’ પર રાખી છે. કોઈપણ આકસ્મિક પરિસ્થિતિને પહોંચી વળવા માટે સેના અને સ્થાનિક ઈમરજન્સી ટીમોને તૈયાર રાખવામાં આવી છે. પૂર અને ભૂસ્ખલનની ભયાનક શક્યતાઓને જોતા લોકોને આગામી કેટલાક દિવસો સુધી ઘરમાં જ રહેવાની અને બિનજરૂરી પ્રવાસ ન કરવાની સલાહ આપવામાં આવી છે.
