ભારત પેન્શનર્સ સમાજનો મોટો પ્રસ્તાવ: છેલ્લે ખેંચેલા પગારના ૬૭ ટકા પેન્શન આપવાની માંગ
કેન્દ્ર સરકારના વર્તમાન કર્મચારીઓની સાથે સાથે નિવૃત્ત થયેલા લાખો પેન્શનરો પણ 8મા પગાર પંચની રચના અને તેની ભલામણોને લઈને ભારે ઉત્સાહિત છે. વિવિધ પેન્શનર સંગઠનોએ કમિશન સમક્ષ માત્ર પેન્શન વધારાની જ માંગ નથી મૂકી, પરંતુ પેન્શન ગણતરીની પદ્ધતિ, તબીબી સેવાઓ, પેન્શન સમાનતા અને વય આધારિત વધારાના લાભો સહિત અનેક મહત્વપૂર્ણ સુધારાઓ માટે વ્યાપક પ્રસ્તાવો રજૂ કર્યા છે. આ સંદર્ભમાં ‘ભારત પેન્શનર્સ સમાજ’ (BPS) દ્વારા લઘુત્તમ પેન્શન વધારીને ₹૪૫,૦૦૦ કરવા તેમજ ફિટમેન્ટ ફેક્ટર ૩.૮૩ લાગુ કરવા માટે સત્તાવાર રજૂઆત કરવામાં આવી છે. જોકે, આ તમામ બાબતો હાલમાં સંગઠનો તરફથી મૂકવામાં આવેલી માંગણીઓ છે, જેને સરકાર કે 8મા પગાર પંચ દ્વારા હજુ સુધી આખરી મંજૂરી આપવામાં આવી નથી.
લઘુત્તમ પેન્શન અને ફિટમેન્ટ ફેક્ટરમાં ફેરફારની માંગ
ભારત પેન્શનર્સ સમાજે 8મા પગાર પંચ સમક્ષ નિવૃત્ત કર્મચારીઓના આર્થિક હિતોનું રક્ષણ કરવા માટે પાયાના ફેરફારોની માંગ કરી છે. સંગઠનનો પ્રસ્તાવ છે કે કર્મચારીઓ માટે લઘુત્તમ બેઝિક પગાર ₹૬૯,૦૦૦ નક્કી કરવામાં આવે અને તે જ આધારે ૩.૮૩ નું ફિટમેન્ટ ફેક્ટર લાગુ કરવામાં આવે. વધુમાં, નિવૃત્તિ વખતે મળતાં પેન્શનની ગણતરી કર્મચારીના છેલ્લા ખેંચેલા પગારના ૬૭ ટકા જેટલી કરવી જોઈએ. આ સાથે જ પરિવારના સભ્યો માટે અપાતા ફેમિલી પેન્શનને છેલ્લા મૂળ પગારના પ૦ ટકા સુધી વધારવાની પણ જોરદાર સરભર કરવામાં આવી છે. આ ગણતરી અમલમાં આવે તો લઘુત્તમ પેન્શન સીધું ₹૪૫,૦૦૦ ના સ્તરે પહોંચી શકે છે.
તબીબી સુવિધાઓ અને કેશલેસ સારવારમાં સુધારા
આર્થિક લાભો ઉપરાંત વરિષ્ઠ નાગરિકો માટે તંદુરસ્ત જીવનશૈલી સુનિશ્ચિત કરવા તબીબી સુવિધાઓમાં નોંધપાત્ર ફેરફારોની માંગણી કરવામાં આવી છે. સંગઠને ફિક્સ્ડ મેડિકલ એલાઉન્સ (FMA) વધારીને પ્રતિ માસ ₹૫,૦૦૦ કરવાની માંગ રજૂ કરી છે. Central Government Health Scheme (CGHS) હેઠળ હોસ્પિટલોમાં ડોક્ટરો, નિષ્ણાતો, દવાની ઉપલબ્ધતા અને કેશલેસ સારવારનું માળખું વધુ મજબૂત કરવાની જરૂરિયાત પર ભાર મુકાયો છે. ખાસ કરીને ગ્રામીણ અને નોન-CGHS વિસ્તારોમાં રહેતા પેન્શનરો માટે તબીબી સુવિધાઓનું સરળીકરણ કરવું અત્યંત જરૂરી ગણાવાયું છે.
રૂપાંતરિત પેન્શન (Commuted Pension) અને જૂની પેન્શન યોજના
પેન્શનરોની એક મુખ્ય માંગણી રૂપાંતરિત પેન્શન એટલે કે કમ્યુટેડ પેન્શન પુનઃસ્થાપિત કરવાની સમયમર્યાદા અંગેની છે. હાલમાં આ સમયગાળો ૧૫ વર્ષનો છે, જેને ઘટાડીને ૧૧ વર્ષ કરવાનો અથવા પેન્શનરની ઉંમર ૭૧ વર્ષ થાય ત્યારે તેને સ્વચાલિત રીતે પુનઃસ્થાપિત કરવાનો પ્રસ્તાવ મૂકવામાં આવ્યો છે.
આ સિવાય, અલગ-અલગ તારીખે નિવૃત્ત થયેલા કર્મચારીઓ વચ્ચે પેન્શનમાં જોવા મળતી અસમાનતા દૂર કરીને ‘એક સમાન પેન્શન’ ની નીતિ લાગુ કરવાની માંગ કરાઈ છે. સંગઠનોએ ફરી એકવાર જૂની પેન્શન યોજના (OPS) પુનઃસ્થાપિત કરવાનો મુદ્દો ઉઠાવ્યો છે. વય વધવાની સાથે સાથે પેન્શનરોનો તબીબી અને દૈનિક ખર્ચ વધતો હોવાથી, ૮૦ વર્ષ પહેલાંથી જ ચોક્કસ વયતબક્કે પેન્શનમાં વધારાની રકમ ઉમેરવાની ભલામણ પણ કમિશન સમક્ષ મૂકવામાં આવી છે.
