વાપીથી ટ્રેનમાં અમદાવાદ આવેલી ABVPની કાર્યકર યુવતીની રેલવે પોલીસના કોન્સ્ટેબલે જ છેડતી કરતા ભારે સનસનાટી મચી ગઇ છે. રેલવે સ્ટેશન પર કોન્સ્ટેબલ સાથે યુવતી લિફ્ટમાં હતી, ત્યારે કોન્સ્ટેબલે હાથેથી માસ્ક નીચે કરી અને ગાલ પર હાથ ફેરવ્યો હતો. જેથી હાથ દૂર કરી કોન્સ્ટેબલના પગ પર પગ મારી ત્યાંથી બહાર નીકળી ગઈ હતી. બાદમાં કોન્સ્ટેબલે તેનો પીછો કરી અને મોબાઈલ નંબર માગ્યો હતો. આ બાબતે ABVPના કાર્યકર્તા આવતા કોન્સ્ટેબલ ત્યાંથી જતો રહ્યો હતો. રેલવે પોલીસે ઘટનાના 5 દિવસ બાદ કોન્સ્ટેબલ સામે નામ વગર જ ફરિયાદ નોંધી હોવાનું સામે આવ્યુ છે.
આ આખી ઘટના અંગે ની પ્રાપ્ત થતી વિગતો મુજબ મૂળ દમણની અને હાલ પાલડી માં ABVPની કાર્યકર્તા 25 વર્ષીય યુવતી 31 જુલાઈના દિવસે યુવતી વાપીથી અમદાવાદ ટ્રેન માર્ગે આવી હતી જ્યાં કાલુપુર અમદાવાદ સ્ટેશન પર ઉતરી યુવતીની ટ્રોલીબેગ ન મળતા કોચમાં તપાસ કરી હતી પણ તેનો સામાન મળી આવ્યો ન હતો. જેથી યુવતી રેલવે ટ્રાફિક પોલીસ ચોકી ખાતે પહોંચી હતી અને પોલીસ ને પોતાની બેગ ચોરાઈ હોવાની જાણ કરતા પોલીસ અધિકારીએ સીવીલ ડ્રેસમાં હાજર એક કોન્સ્ટેબલ યુવતીની મદદ માટે મોકલ્યો હતો. યુવતી અને કોન્સ્ટેબલ પાણીના સ્ટોલ પર ગયા હતા. સ્ટોલવાળા એ જણાવ્યું હતું કે, સીસીટીવી રૂમમાં પ્લેટફોર્મ 1 પર બેગ લઈ ગયા છે. જેથી યુવતી અને કોન્સ્ટેબલ પ્લેટફોર્મ 1 પર જવા માટે લિફ્ટમાં જતા હતા તે દરમિયાન
અચાનક જ કોન્સ્ટેબલે પોતાના ઉપર કાબુ ગુમાવી યુવતીએ પહેરેલું માસ્ક નીચે કરી ગાલ પર હાથ ફેરવી છેડતી કરતા હેબતાઈ ગયેલી યુવતીએ કોન્સ્ટેબલના પગ પર પોતાનો પગ માર્યો હતો, અને લિફ્ટની બહાર નીકળી ગઈ હતી. યુવતીને તેની બેગ મળી જતા તે બેગ લઈને પેપર વર્ક કરી રેલવે સ્ટેશનની બહાર નીકળી હતી. ત્યારે પણ કોન્સ્ટેબલ તેનો પીછો કરી યુવતીનો મોબાઈલ નંબર માંગતા અને બરાબર આ સમયે યુવતીને લેવા માટે તેના જ સંગઠનનો એક યુવક આવ્યો હતો તેને યુવતીએ કોન્સ્ટેબલે કરેલી છેડતીની જાણ કરી હતી. ABVP સંગઠનના તમામ લોકો અને શહેર અધ્યક્ષ સાથે વાતચીત કરી રેલવે સ્ટેશન પોલીસ સ્ટેશનમાં કોન્સ્ટેબલ યુવકના વિરુદ્ધમાં ફરિયાદ નોંધાવતા પોલીસે છેડતીનો ગુનો દાખલ કરી વધુ તપાસ હાથ ધરી છે આ ઘટના ને પગલે ભારે ચકચાર મચી ગઇ છે.
