લુઆન-ડ્રે પ્રિટોરિયસે રચ્યો નવો ઇતિહાસ: ૨૦ વર્ષની વયે સદી ફટકારીને તોડ્યો અફઘાનિસ્તાનના ઝાઝાઈનો રેકોર્ડ
દક્ષિણ આફ્રિકાના યુવા અને વિસ્ફોટક ઓપનિંગ બેટ્સમેન લુઆન-ડ્રે પ્રિટોરિયસે આંતરરાષ્ટ્રીય ક્રિકેટમાં એક અદ્ભુત અને ઐતિહાસિક સિદ્ધિ હાંસલ કરી છે. તેણે પોતાની પ્રથમ T20 આંતરરાષ્ટ્રીય સદી ફટકારીને વિશ્વ ક્રિકેટમાં સનસનાટી મચાવી દીધી છે. આ વિસ્ફોટક ઈનિંગ્સની મદદથી તે T20 આંતરરાષ્ટ્રીય ક્રિકેટમાં સદી નોંધાવનાર ICC ના પૂર્ણ સભ્ય (Full Member) રાષ્ટ્રનો સૌથી યુવા ખેલાડી બની ગયો છે. પ્રિટોરિયસે આ કારનામું નામિબિયામાં રમાયેલી ત્રિકોણીય શ્રેણીની ફાઇનલ મેચ દરમિયાન કરી બતાવ્યું હતું.
હઝરતુલ્લાહ ઝાઝાઈનો ૭ વર્ષ જૂનો વર્લ્ડ રેકોર્ડ તૂટ્યો
નામિબિયા સામેની આ મહત્વપૂર્ણ ફાઇનલ મેચમાં ૨૦ વર્ષીય પ્રિટોરિયસે પોતાની કારકિર્દીની ૧૭મી T20 આંતરરાષ્ટ્રીય મેચ રમતા માયાવી સદીનો આંકડો પાર કર્યો હતો. આ પહેલા ઝિમ્બાબ્વે સામે રમાયેલી મેચમાં તે સદી ફટકારવાથી માત્ર છ રન દૂર રહી ગયો હતો અને ૯૪ રને આઉટ થયો હતો. પરંતુ આ વખતે તેણે કોઈ ભૂલ કર્યા વગર શાનદાર સદી પૂરી કરી હતી.
માત્ર ૨૦ વર્ષ અને ૧૬૧ દિવસની નાની ઉંમરે સદી ફટકારીને પ્રિટોરિયસે દક્ષિણ આફ્રિકા માટે T20I ક્રિકેટમાં સદી ફટકારનાર નવમો બેટ્સમેન બનવાનું ગૌરવ મેળવ્યું છે. આ સાથે જ તેણે T20 આંતરરાષ્ટ્રીય ક્રિકેટમાં પૂર્ણ સભ્ય રાષ્ટ્રના સૌથી યુવા સદીવીર બનવાનો વર્લ્ડ રેકોર્ડ પોતાના નામે કરી લીધો છે. અગાઉ આ રેકોર્ડ અફઘાનિસ્તાનના ઓપનર હઝરતુલ્લાહ ઝાઝાઈના નામે હતો, જેણે ૨૦૧૯ માં આયર્લેન્ડ સામે ૨૦ વર્ષ અને ૩૩૭ દિવસની ઉંમરે સદી ફટકારી હતી. પ્રિટોરિયસે ઝાઝાઈનો આ ૭ વર્ષ જૂનો રેકોર્ડ તોડીને નવો ઇતિહાસ રચ્યો છે.
૫૩ બોલમાં ૧૦૧ રનની તોફાની ઇનિંગ્સ
દક્ષિણ આફ્રિકાના આ ડાબા હાથના વિસ્ફોટક ઓપનરે નામિબિયન બોલરોની આકરી ઝાટકણી કાઢી હતી. પ્રિટોરિયસે માત્ર ૫૨ બોલમાં પોતાની સદી પૂરી કરી હતી અને આખરે ૫૩ બોલમાં ૧૦૧ રનની યાદગાર ઇનિંગ રમીને આઉટ થયો હતો. તેની આ તોફાની ઇનિંગ્સમાં ૫ દર્શનીય ચોગ્ગા અને ૮ ગગનચુંબી છગ્ગા શામિલ હતા. નામિબિયાના કેપ્ટન ગેરહાર્ડ ઇરાસ્મસે આખરે તેને આઉટ કરીને તેની ઇનિંગનો અંત આણ્યો હતો.
પ્રિટોરિયસને આંતરરાષ્ટ્રીય ક્રિકેટમાં અત્યંત આક્રમક T20 બેટ્સમેન ગણવામાં આવે છે. તેણે વર્ષ ૨૦૨૫ માં દક્ષિણ આફ્રિકા માટે T20I ડેબ્યૂ કર્યું હતું અને તેના એક જ વર્ષમાં તેણે આ મોટી સિદ્ધિ મેળવી લીધી છે. તેના એકંદર T20 ક્રિકેટ કરિયરમાં આ તેની બીજી સદી છે.
પ્રિટોરિયસ અને એસ્ટરહુઇઝનની ૧૫૬ રનની ભાગીદારી: દક્ષિણ આફ્રિકાનો ૨૨૮ રનનો મોટો સ્કોર
નામિબિયામાં આયોજિત આ ત્રિકોણીય શ્રેણીની ફાઇનલ મેચમાં ટોસ જીતીને પ્રથમ બેટિંગ કરવા ઉતરેલી દક્ષિણ આફ્રિકાની ટીમે તોફાની શરૂઆત કરી હતી. ઓપનર લુઆન-ડ્રે પ્રિટોરિયસ અને વિકેટકીપર બેટ્સમેન કોનોર એસ્ટરહુઇઝને પ્રથમ વિકેટ માટે માત્ર ૬૯ બોલમાં ૧૫૬ રનની વિશાળ ભાગીદારી નોંધાવી હતી.
એસ્ટરહુઇઝન પણ પોતાની સદીની એકદમ નજીક પહોંચી ગયો હતો, પરંતુ તે સદી ચૂક્યો હતો. તેણે માત્ર ૪૦ બોલમાં ૬ ચોગ્ગા અને ૮ છગ્ગાની મદદથી ૮૮ રનની આક્રમક ઇનિંગ રમી હતી. આ બંને ઓપનરોની તોફાની રમતને કારણે દક્ષિણ આફ્રિકાએ ૨૦ ઓવરમાં ૪ વિકેટના ભોગે ૨૨૮ રનનો પહાડ જેવો સ્કોર બનાવ્યો હતો.
નોંધનીય છે કે આ જ ત્રિકોણીય શ્રેણીની શરૂઆતી મેચમાં નામિબિયાની ટીમે દક્ષિણ આફ્રિકાને હરાવીને મોટો ઉલટફેર સર્જ્યો હતો, પરંતુ ફાઇનલ મેચમાં પ્રિટોરિયસની આ ઐતિહાસિક સદીના જોરે દક્ષિણ આફ્રિકાએ વાપસી કરીને મેચ પર પોતાની પકડ મજબૂત બનાવી લીધી હતી.
