હવામાન વિભાગની મોટી આગાહી: દેશમાં ૮૦ કિમીની ઝડપે ફૂંકાશે તોફાની પવન, જાણી લો તમારા રાજ્યની સ્થિતિ
દેશના વિવિધ ભાગોમાં ચોમાસાની વિદાય પહેલાં હવામાનનો મિજાજ ફરી એકવાર અત્યંત ભયાનક રૂપ ધારણ કરી રહ્યો છે. બંગાળની ખાડીમાં સર્જાયેલા નીચા દબાણ અને સક્રિય થયેલી ચક્રવાતી સિસ્ટમના કારણે ભારતીય હવામાન વિભાગ (IMD) દ્વારા ગુજરાત સહિત દેશના ૧૮ રાજ્યો માટે ભારે વરસાદ અને તોફાની પવનોનું હાઈ ઓલર્ટ જારી કરવામાં આવ્યું છે.
હવામાન વિભાગ અનુસાર, ઉત્તર પ્રદેશ, બિહાર, દિલ્હી, ગુજરાત અને મધ્ય પ્રદેશ જેવા રાજ્યોમાં આગામી ૨૪ થી ૪૮ કલાક દરમિયાન ગાજવીજ સાથે મુશળધાર વરસાદ પડી શકે છે. આ સમયગાળા દરમિયાન પવનની ગતિ ૭૦ થી ૮૦ કિલોમીટર પ્રતિ કલાક સુધી પહોંચવાની સંભાવના છે, જે ભારે વિનાશ સર્જી શકે છે.
સિસ્ટમ સક્રિય થતાં તોફાની પવનોનો ભય
હવામાન શાસ્ત્રીઓના જણાવ્યા અનુસાર, દક્ષિણ-પશ્ચિમ મધ્ય પ્રદેશ પર એક અપર-એર સાયક્લોનિક સર્ક્યુલેશન સર્જાયું છે. આ સિવાય દક્ષિણ હિમાચલ પ્રદેશથી લઈને અરબી સમુદ્ર સુધી એક મજબૂત ટ્રફ લાઈન વિસ્તરેલી છે. આ ભૌગોલિક સ્થિતિના કારણે પૂર્વ ભારત અને દક્ષિણ ભારતના દરિયાકાંઠાના વિસ્તારોમાં તોફાની પવનોની અસર સૌથી વધુ જોવા મળશે.
ઓડિશા, આંધ્ર પ્રદેશ અને પશ્ચિમ બંગાળના દરિયાકાંઠાના વિસ્તારોમાં ૮૦ કિમી/કલાકની ઝડપે ફૂંકાતા પવનોના કારણે મોટા વૃક્ષો ઉખડી જવાની અને વીજળીના થાંભલા ધરાશાયી થવાની ભીતિ સેવાઈ રહી છે. હિમાચલ પ્રદેશ અને ઉત્તરાખંડ જેવા પહાડી રાજ્યોમાં ભારે વરસાદને કારણે ભૂસ્ખલન (Landslide) ની આશંકા વ્યક્ત કરવામાં આવી છે, જેને પગલે પ્રવાસીઓને હવામાનની સ્થિતિ ચકાસ્યા વિના મુસાફરી ન કરવાની સલાહ આપવામાં આવી છે.
ગુજરાતમાં હવામાનની સ્થિતિ
ગુજરાતમાં ખાસ કરીને દક્ષિણ ગુજરાતના જિલ્લાઓમાં વરસાદી માહોલ વધુ ગંભીર બનવાની શક્યતા છે. સુરત, નવસારી, વલસાડ, તાપી, નર્મદા અને દાદરા નગર હવેલી માટે ભારે વરસાદ અને વાવાઝોડાની ચેતવણી આપવામાં આવી છે. આ વિસ્તારોમાં ૬૦ કિલોમીટર પ્રતિ કલાકની ઝડપે તોફાની પવનો ફૂંકાઈ શકે છે, જેનાથી વિઝિબિલિટી પર અસર પડશે અને નીચાણવાળા વિસ્તારોમાં પાણી ભરાઈ શકે છે.
ઉત્તર અને પૂર્વ ભારતના રાજ્યોની સ્થિતિ
દિલ્હી અને એનસીઆર: દિલ્હી-એનસીઆરમાં હળવાથી મધ્યમ વરસાદની સાથે ૧૫ થી ૨૦ કિમી/કલાકની ઝડપે પવન ફૂંકાશે. તાપમાન ૨૫ થી ૩૫ ડિગ્રી સેલ્સિયસ વચ્ચે રહેવાની સંભાવના છે.
ઉત્તર પ્રદેશ અને બિહાર: યુપીના કાનપુર, પ્રયાગરાજ, અયોધ્યા, આગ્રા, ગોરખપુર સહિત અનેક જિલ્લાઓમાં ૬૦ કિમી/કલાકની ઝડપે પવન ફૂંકાશે. બિહારના પટના, ગયા, પશ્ચિમ ચંપારણ અને પૂર્ણિયા સહિત મોટાભાગના વિસ્તારોમાં મુશળધાર વરસાદનું ઓલર્ટ છે.
ઉત્તરાખંડ અને હિમાચલ પ્રદેશ: દેહરાદૂન, ઋષિકેશ, શિમલા અને મનાલી જેવા પ્રવાસન સ્થળોએ ૫૦ થી ૬૫ કિમી/કલાકના પવનો સાથે ભારે વરસાદની આગાહી કરવામાં આવી છે.
પંજાબ, હરિયાણા અને રાજસ્થાન: પંજાબના લુધિયાણા, અમૃતસર અને રાજસ્થાનના જયપુર, જોધપુર, અજમેરમાં ૫૫ થી ૭૦ કિમી/કલાકની ઝડપે તોફાની પવન સાથે વરસાદની ચેતવણી અપાઈ છે.
ઓડિશા, મધ્ય પ્રદેશ અને છત્તીસગઢ
ઓડિશાના ભુવનેશ્વર, પુરી અને સંબલપુરમાં ૮૦ કિમી/કલાકની ઝડપે વાવાઝોડું ત્રાટકી શકે છે. મધ્ય પ્રદેશના ભોપાલ, ઉજ્જૈન અને વિદિશા તેમજ છત્તીસગઢના રાયપુર અને બિલાસપુરમાં પણ ૬૦ થી ૬૫ કિમી/કલાકની ઝડપે ફૂંકાતા પવનો સાથે વિજળીના કડાકા ભડકા વચ્ચે ભારે વરસાદની આગાહી છે.
આગામી છ થી સાત દિવસ સુધી ઉત્તર-પશ્ચિમ અને ઉત્તર-પૂર્વ ભારતમાં ચોમાસું ભારે સક્રિય રહેશે. વાવાઝોડા અને મુશળધાર વરસાદના કારણે વિવિધ રાજ્યોમાં તાપમાનમાં ૨ થી ૩ ડિગ્રી સેલ્સિયસનો ઘટાડો નોંધાશે. સ્થાનિક પ્રશાસનોને સતર્ક રહેવા અને લોકોને સુરક્ષિત સ્થળે રહેવા માટે અપીલ કરવામાં આવી છે.
